Jeremías 34 - Mam Huehuetenango New Ortography

Aju tqanil tu'n tpon tuk'il rey Sedequías

1Ate Nabucodonosor aju rey te Babilonia, kyuk'ix qe t-soldad ex qe xjal ate'kxtoq tjaq' tkawb'il aqeju e tzaj kyuj kykyaqil nasyon twitz tx'otx', tej in che q'ojintoq kyi'j aj Jerusalén ex kyi'j qe tnam ate' ti'jele, tzajtzun yolin Qman tuk'il Jeremías chi kyja':

2Aqine Dios aju Kydios aj Israel kxel nma'ne teya jlu: Txi'ya tuk'il Sedequías aju rey kye aj Judá, ex q'manxa te: Chitzun Qman kyja': Kxel nq'o'ne tnam lu tu'n tkyaj tjaq' tkawb'il rey te Babilonia, ex k'okel tq'o'n tq'aq'al.

3Atzun teya, mlayx tzoqpaja tuj tq'ab'; ktzyetela kyu'n xjal ex kxel q'o'na tuj tq'ab' Nabucodonosor, k'okel tke'yina twitz, k-yolila tuk'il ex kxel q'i'na max tuj Babilonia.

4Aya Sedequías rey kye aj Judá, b'intza aju kxel nma'ne teya: Mlay kub' b'yo'na tu'n spad.

5Tuj txub'txaj kymela, ex kb'el patun tk'ok'jal tib'aja ok tkyima ik tza'n kub' patun kyib'aj qtzan t-xe'chela tej kykyim, aqeju e kawin tej na'nxtoq tok teya te rey; che oq'el xjal ti'ja ex ok kyma' kyja': Ay Tat, che chilo. Aqine Dios in chin q'mante jlu, ex kb'antel wu'ne ikju.

6Xitzun tma'n Jeremías aju t-sanjel Dios tkyaqil jlu te rey Sedequías tuj Jerusalén

7tej in che q'ojintoq qe t-soldad rey te Babilonia ti'j tnam Jerusalén, ti'j tnam Laquis ex ti'j tnam Azeca. O'kxtzun qe tnam lu na'nxtoq ttzyet tu'n Nabucodonosor, aqeju tok muro kyi'j tuj Judá.

Minti e tzoqpet qe aj hebreo majen

8Tzaj yolin Qman tuk'il Jeremías tkyajlenxi b'ant ti'j jun tyol rey Sedequías kyuk'il aj Jerusalén, tu'n kytzoqpet qe xjal tzyu'n te majen.

9Aju yol otoq b'ant ti'j, tu'n kyxi tzoqpet qe xinaq ex xu'j aj Hebreo aqeju tzyu'ntoq te majen, tu'ntzun mi'n tok jun xjal Judiy te jumajx te tmajen juntl xjal ax Judiy.

10Kykyaqil qe nejenel ex kykyaqil tnam xjal xi kyniman aju yol otoq b'ant ti'j kyu'n, ex xi kytzoqpi'n kymajen, ex ya minti' ok kyq'o'n il kyi'j tu'n kyaq'nan ti'j kyaq'un.

11Ex te tib'ajxi ch'expet kyximb'etz tu'n tlaj t-xilen kytzoqpi'n qe, ex ok kyq'o'n il kyi'j juntl maj tu'n kyok te kymajen.

12Tzajtzun yolin Qman tuk'il Jeremías ex tma kyja':

13Aqine Dios aju Kydios aj Israel, kyaj b'ant ti'j jun nyole kyuk'il qtzan kyxe'chele ojtxi tej kyetz wi'ne tuj Egipto jatum in che ajb'entoq te majen, ex xi nma'ne kye kyja':

14Tuj wuqchaq ab'q'i kxel kytzoqpi'ne noq alkyex aj Hebreo otoq txi tk'ayin tib' te majen kyeye, noq qaq ab'q'i che ajb'el kyeye ex te tib'ajxi che xel kytzoqpi'ne, nchiye xi nma'ne kye, ex minti' okx tuj kywi' qtzan kyxe'chele ex minti' inx kyniman.

15Atzun kyeye otoq b'aj kych'expu'ne kyximb'etze ex otoq b'ant kyu'ne aju in chin tzalaje ti'j, tu'nju otoq txi kytzoqpi'ne kyxjalile, aqeju kyoktoq te kymajene, ex otoq txi kytziyane jlu nwitze tuj njaye in ajb'en te nimsab'l nb'iye.

16Ex te tib'ajxi ma b'aj kych'expu'ne kyximb'etze, ex ma chin ok kyq'o'ne te minti' woklene, tu'nju ma che tzaj kyi'ne juntl maj kymajene, aqeju otoq txi kyq'o'ne amb'il kye tu'n kyxi tzoqpet, ex ma che ok kylajwersine tu'n kyok juntl maj te kymajene.

17Kyja'tzun aqine Dios kxel nma'ne jlu: Aqeye minti' ma chinx kynimane, minti' ma txi kytzoqpi'ne kyxjalile aqeju tzyu'n te kymajene; tu'ntzun jlu che xel ntzoqpi'ne tu'n kykyime tuj q'oj, tu'n tx'u'j yab'il ex tu'n we'yaj, ex che elel ik'une kyu'n kykyaqil xjal kyuj kykyaqil nasyon twitz tx'otx'. Aqine Dios in chin q'mante jlu.

18-19Tej tb'ant ti'j jun yol nwitze kyu'n qe nejenel kye aj Judá ex kye aj Jerusalén, kyuk'ix qe xjal at kyoklen ttxlaj rey, kyuk'ix qe pal ex kyuk'ix txqantl xjal, kub' kyi'n tmij jun tal tman wakẍ ex kub' kyq'o'n te kab'e piẍun tten ex e okxtzun b'et kyxol kab'e piẍ wakẍ lu, te kyuwsab'l yol, ex jurat naj ma tz'el kyik'un aju yol kyaj b'ant ti'j kyu'n, ex minti' ma japun kyu'n aju xi kytzi'yan.

20Kyja'tzun che xel nq'o'ne tu'n kykub' tz'aq tuj kyq'ab' aj q'oj kyi'j, aqeju kyaj tu'n kykub' b'yonte kye, ex aju kyximlal k'ajb'el te kychi' qe jil b'a'n che lipan twitz kya'j, ex te kychi' qe txkup te tjaq' k'ul.

21Ax ikx te Sedequías aju rey kye aj Judá, kyuk'ix qe xjal at kyoklen ttxlaj, che xel nq'o'ne tuj kyq'ab' aj q'oj kyi'j, aqeju kyaj tu'n kykub' b'yonte kye, ex tuj kyq'ab' qe t-soldad rey te Babilonia, aqeju ma txi kykolin ch'in tu'n kyq'ojin kyi'j.

22Ex kxel nma'ne kye tu'n kyajtz meltz'aj q'ojlel ti'j tnam lu; che okel tzoqpaj ti'j, ktzyetel kyu'n ex k'okel kyq'o'n tq'aq'al. Ax ikx txqantl tnam ate' tuj Judá, b'i'x che b'el xitj ex mi jun xjal kyjel ten kyuj. Aqine Dios in chin q'mante jlu.