Éxodo 23 - Mam Huehuetenango New Ortography

Qe ley tza'n tten tu'n tb'ant aju tz'aqlxix

1Mi'n txi kyq'o'ne jun tqanil mya ax tok. Mi'n tz'ok kyq'on kyib'e te tuk'il jun xjal b'inchal mya b'a'n, tu'n kyoke te testiw ti'j ju mya ax tok.

2Mi'n che ok lpe'ye ti'j tnimal xjal tu'n kyb'inchanteye aju mya b'a'n.

Ok kyokxe kywitz jwes te testiw, mi'n txi kyq'o'ne kywi'ye kyi'j tnimal xjal tu'n tb'ant aju mya tuj tumel,

3ax ikx mi'n che koline kyi'j qe meb'a xjal qa at kyil.

4Qa ma txi tzpet twakẍ ex qa tbur jun aj q'oj ti'ja, ex qa ma tz'ok noja ti'j, q'on aja te.

5Qa at jun xjal nne'l ik'unte teya, ex qa ma tila ma kub' tz'aq tbur tjaq' tiqatz, mi'n noq tz'ok tke'yina, k'onila ti'j tu'n tjaw we' tbur.

6Mya tu'nju meb'a jun xjal mi'n txi kyb'incha'ne ti'j ok tpon twitz ley.

7Kypa'mil kyib'e ti'j nik'aj yol ex mi'n kub' kyb'yo'ne jun xjal minti' til ex tz'aqlxix, ex mlay tz'ok nq'o'ne te tz'aqlxix aju xjal at til.

8Mi'n tzaj kyk'mo'ne pwaq in kyq'o'n b'inchal mya b'a'n, porke tu'nju pwaq lu in moẍix kywitz qe xjal tu'n mi'n tel kynik' ti'j ju tz'aqlxix, ex in b'aj tch'expu'n kyyol qeju xjal tz'aqlxix.

9Mi'n b'aj kyyajla'ne qe stranjer xjal, tu'nju ojtzqi'n kyu'ne tza'n tten tchwinqlal jun stranjer xjal, porke ikx kyeye o che tene te stranjer xjal tuj tx'otx' Egipto.

Qe ley ti'j ojlab'l

10Qaq ab'q'i che awale twitz tx'otx' ex kjawil kychmo'ne twitz kyawale;

11Atzun tuj twuqin ab'q'i mi'n ku'x kyawa'ne awal tuj tx'otx', tu'ntzun kywa'n qe meb'a, aqeju najl tuj kytx'otx'e, ti'j t-xpoq'il awal; atzunju kyjel ten kxel kywa'n qe txkup te tjaq' k'ul. Ax ikx kyb'inchame jlu ti'j tqan uva ex tqan olivo.

12Qaq q'ij che aq'nale, atzun tuj twuqin q'ij che ojlale tu'ntzun kyojlan kywakẍe ex kyburre, ex tu'n tok t-xel kyipun qe kyal kymajene xu'j ex qe stranjer xjal.

13Japunx kyu'ne tkyaqilju ma txi nma'ne kyeye. Mi'n tzaj kyna'ne kyb'i junxitl dios, ex mi'n che yoline kyi'j.

Qe ox ninq'ij ma' kyoklen Éxodo 34.18-26; Deuteronomio 16.1-17

14Teyle junjun ab'q'i kb'el kyik'sa'ne ox ninq'ij te nimb'il weye.

15Kb'el kyik'sa'ne aju ninq'ij tu'n kywa'ne pan minti' t-samel tuj tu'n tjaw mal tk'u'j. Wuq q'ij che wa'le pan minti' t-samel tuj, ik tza'n o nmaye kyeye. Ok kyb'incha'ye jlu tuj tq'ijlalil b'animaj ti'j tuj xjaw Abib, porke tuj xjaw lu e je'tze tuj Egipto. Mi jun tu'n tul nwitze qa minti' q'i'n tu'n.

16Ax ikx kb'el kyik'sa'ne aju ninq'ij kyi'j tnejel twitz kyawale otoq ku'x kyawa'ne tuj kojb'il, ax ikx aju ninq'ij ok tjaw kychmo'ne tkyaqil twitz kyawale ok tb'aj ab'q'i.

17Ox maj tuj ab'q'i che pol kykyaqil xinaq yek'ulte kyib' nwitze, aqine Kymane.

18Ok ttzaj kyq'o'ne jun alumaj te chojb'il weye, mi'n tzaj kyq'o'ne tchk'el junx tuk'il pan at t-samel tuj tu'n tjaw mal tk'u'j, ex mi'n txi kyk'u'ne t-sebyil te juntl q'ij.

19Ktzajel kyi'ne tuj njaye aju tb'anilxix ti'j tnejel twitz kyawale ktzajel tuj kytx'otx'e. Aqine Kymane ex Kydiose.

Mi'n jax kytxko'ne tal chip tujx ta'l tim ttxu'.

Aju t-anjel Qman

20Kyb'intze, kxel nsama'ne n-anjele tu'n tkub' nej kywitze, tu'n kyok kwentine tu'n tuj b'e, ex tu'n kyxi q'i'ne tu'n tuj tx'otx' b'animaj wu'ne te kyeye.

21Ten tchiylal kyeye, kynimanxe, ex mi'n che oke chkyinwi'. Mlay kub' tnajsa'n kyile, porke aqine samalte te.

22Qa axix tok ma txi kyb'i'ne tyol ex qa ma kyb'inchaye tkyaqilju in xi nma'ne kyeye, chin okeltzune aj q'oj kyi'j qe aj q'oj kyi'je, ex che b'ajel nyajla'ne qeju che yajlalte kyeye.

23Kb'eltzun nej n-anjele kywitze, ex che xel q'i'ne tu'n tuj kytx'otx' aj Amorreo, aj Heteo, aj Ferezeo, aj Cananeo, aj Heveo ex aj Jebuseo, porke b'i'x che najel qe jlu wu'ne.

24Mi'n che kub' ẍmeje'ye kywitz kydios ex mi'n che k'ulune kye. Mi'n kyb'inchaye ik tza'n kye in kyb'incha'n. Noq o'kx che b'ajel kyb'uchine qe tilb'ilal ex qe ab'j nno'k kyq'o'n te xjan.

25Che k'ulune weye, aqine Kymane ex Kydiose, ex ktzajeltzun nq'o'ne kywaye ex kyk'a'ye a', ex k'elel wi'ne yab'il kyi'je.

26Mi jun xu'j ktel kyxole mib'an alin ex mi jun noq kukx k'elel tal. Mlay che kyime qa na'nxtoq kytijine.

27Kxel nsama'ne xob'sab'l kyib'aj nasyon jatum che okexe, b'i'x knajel kynab'l wu'ne ex che eleltzun oq qe aj q'oj kyi'je.

28Che xel nsama'ne ttxu sichil kywitze tu'n kyex kylajo'n qe aj Heveo, qe aj Cananeo ex qe aj Heteo.

29Mya tuj junx ab'q'i che elex nlajo'ne qe xjal lu kywitze, tu'ntzun mi'n tkyaj ten tx'otx' mi a'l xjal tuj, ex tu'n mi'n kychmet txkup te tjaq' k'ul tuj tu'n kyb'inchante mya b'a'n kyi'je.

30Cheb'a che elex b'aj qe xjal lu wu'ne okxi tchmet mas kyb'aje, ex okxi kyoke tajwil tx'otx'.

31Aju tmojonil kytx'otx'e kyjel nq'o'ne, atzun jlu: Kxel qe' ttzi Mar Kyaq Ke'yin ex kpol b'aj ttzi mar kye aj Filisteo. Kxel qe'tl ti'j tzqij tx'otx' ex kpol b'aj ttzi nima Éufrates. Che xel nq'o'ne tuj kyq'ab'e qe xjal najl tuj tx'otx' lu, ex che elex kylajo'ne kywitze.

32Mi'n kyaj b'ant ti'j jun kyyole kyuk'il, mi kyuk'il qe kydios.

33Mi'n kyaq'e amb'il tu'n kynajan qe xjal lu tuj kytx'otx'e, tu'ntzun mi'n kyb'inchane il nwitze ok kyk'ulune kywitz kydios, ex qa ma kyb'inchaye jlu che najele, chi Dios.