1Kykyaqil qe rey kye aj Amorreo, aqeju najlqe ttxlaj nima Jordán tuj telex q'ij, ex qe rey kye aj Canaán, aqeju ate' niqayin ttzi Nintz mar, tej kyb'inte tza'n tten otoq tz'aj tzqij nima Jordán tu'n Qman tej matoq in che ik'x qe aj Israel tuj, b'i'x tzaj b'aj kyk'u'j ex minti' kynimarin kyib' tu'n kyok tzoqpaj q'ojlel kyi'j aj Israel.
2Tujtzun tq'ijlalil lu xi tma'n Qman te Josué kyja': B'inchan b'aja junjun kchil ab'j qe, ex sircunsidarin b'aja juntl maj qe aj Israel.
3E b'anttzun qe kchil tu'n Josué ex e b'aj t-sircunsidarin qe xinaq aj Israel twi witz Aralot.
4E b'aj t-sircunsidarin kykyaqil xinaq, porke aqeju matoq q'i'n kyipun tej kyetz tuj Egipto otoq che b'aj kyim tuj b'e tuj lugar tzqij tx'otx'.
5Aqeju e je'tz tuj Egipto, kykyaqil otoq che b'aj sircunsidarit, ex aqeju e itz'j tuj b'e te tib'ajxi tuj lugar tzqij tx'otx', na'nxtoq kyb'aj sircunsidarin.
6Tu'nju e b'et aj Israel 40 ab'q'i tuj tzqij tx'otx', kyja'tzun kykyaqil xinaq q'i'n kyipun tej kyetz tuj Egipto otoq che b'aj kyim, tu'nju minti' xi kyniman tyol Qman. Kyja'tzun xi tma'n Qman jun yol axix tok, tu'n mi'n kyokx qe xjal lu tuj tx'otx' aju otoq tzaj ttziyan kye kyxe'chel tu'n ttzaj tq'o'n kye aj Israel, aju tx'otx' lu q'inun tx'otx'xix ex tb'anilxix.
7Kyja'tzun e b'aj t-sircunsidarin Josué kyky'ajal qe xinaq e kyim tuj tzqij tx'otx', aqeju otoq che ok tq'o'n Qman te kyxel kyman, tu'nju na'nxtoq kysircunsidarit te tjaq'xi tu'nju ate'toq tuj kyb'e.
8Tejtzun kyb'aj sircunsidarit kykyaqil, e kyaj ten tuj campament tejxi kyb'anix.
9Xitzun tma'n Qman te Josué kyja': Tu'nju sircunsisyón lu ma tz'el wi'ne kych'ixwiye, aju otoq tzaj kyu'n qe aj Egipto, chi Dios. Kyja'tzun, ax tb'i lugar tok ja'lo, Gilgal.
10Atzun e kub' ten aj Israel tuj lugar Gilgal, ex tuj kyajlaj tajlal xjaw te qale, kub' kyik'sa'n Xjan Q'ij tuj chq'ajlaj tkub' ttxlaj Jericó.
11Tuj juntl q'ij e wa'n pan minti' t-samel tuj, e wa'n triw tx'ilsamaj ex e wa'n ti'j twitz awal in tzaj tq'o'n tx'otx' Canaán,
12ex tujtzun juntl q'ij ya minti'tl tzaj tq'o'n Dios maná. Kyja'tzun, tuj ab'q'i lu e wa'n qe aj Israel ti'j twitz kyawal xjal aj Canaán.
Tej tok tk'ulb'an tib' Josué tuk'il nejenel kye t-soldad Qman13At jun q'ij tej attoq Josué niqayin ttxlaj tnam Jericó o til lu jun xinaq wa'l tkub' twitz, tuk'ix jun spad q'i'n tu'n. Xi laq'e' Josué ex xi tqanin te:
—¿Apeya quk'ile ex qa aj q'oja qi'je?
Xi ttzaq'we'n xinaq:
14—Mya tuk'il jun k'loj ex mya tuk'il juntl k'loj. Ma chin ule tzalu, aqine nejenel kye t-soldad Qman Dios, chi xinaq.
Kub'tzun ẍmeje' Josué tejxi tpon takl tib'aj twitz twitz tx'otx', ex xi tqanin te:
—Tat, ¿ti ktzajel tma'na weye, aqine tmajena?
15Atzunte nejenel kye t-soldad Qman tzaj ttzaq'we'n:
—Q'imel t-xajb'iya porke aju lugar jatum tkub'a, xjante.
Atzunte Josué xi tniman.
Who We AreWhat We EelieveWhat We Do
2025 by iamachristian.org,Inc All rights reserved.
