1Tzaj yolin Qman tuk'il Moisés ex tuk'il Aarón, chi kyja':
2Qa at jun xjal ma jaw mal ch'in tchib'jal, ex qa at ronch ti'j, ex qa ronch saq ke'yin, ex qa ik che ke'yin jlu ik tza'n tx'a'k minti' q'anb'il ti'j, kxel q'it xjal lu tuk'il pal Aarón ex qa tuk'il jun kye qe pal ax tiyjil Aarón.
3Atzunte pal kb'ajel tke'yin tx'a'k tok ti'j xjal. Qatzun otoq saqix xya'n jatum toksa'n tx'a'k ex qa otoq tz'okx laq'e' tx'a'k tuj tchib'jal, atzun tx'a'k jlu minti' q'anb'il ti'j. Tb'ajlenxitzun ke'yin xjal tu'n pal, kxel tma'n qa ate xjal lu tz'il ta'.
4Qa saq ke'yin aju señ tok ti'j ttz'umal xjal, ex qa minti' otoq tz'okx laq'e' tx'a'k tuj tchib'jal ex minti' otoq saqix xya'n jatum toksa'n tx'a'k, k'okextzun lamo'n xjal wuq q'ij tu'n pal.
5Tuj twuqin q'ij kb'ajel tke'yin pal juntl maj, ex qatzun ttenx tx'a'k ex minti' otoq tz'el laq'e', k'okextzun japu'n xjal wuq q'ijtl tu'n pal.
6Oktzun tjapun wuq q'ijtl, kb'ajeltzun ke'yit juntl maj, ex qatzun kyja' tkub' naj tx'a'k ex minti' otoq tz'el laq'e', kxe'ltzun tma'n pal qa saq ta' xjal lu ex qa noq e'lajx jun tx'a'k otoq jaw jlet ti'j. Atzunte xjal kjawitz ttx'jo'n ti'j t-xb'alun ex ksaqseteltzun.
7Qatzun ma tz'el laq'e' tx'a'k ti'j xjal juntl maj tb'ajlenxi ke'yit ex otoq tma pal qa saq ta', il ti'j tu'n t-xi' juntl maj tu'ntzun tb'aj ke'yin tu'n pal.
8Oktzun tb'aj ke'yin xjal tu'n pal, ex qa ma til otoq tz'el laq'e' tx'a'k ti'j, kxe'ltzun tma'n qa tz'il ta' xjal lu, ex yab' tu'n tx'a'k minti' q'anb'il ti'j.
9Qa at jun xjal at tx'a'k ti'j, aju tx'a'k minti' q'anb'il ti'j, kxel q'it twitz pal.
10Atzunte pal kb'ajel ke'yinte te, ex qa saq ke'yin tchib'jal xjal otoq jaw mal, qa otoq saqix xya'n, ex qa malekj tchib'jal xjal tuj ju otoq jaw mal,
11atzun jlu tx'a'k minti' q'anb'il ti'j, ex otoq lok'in tuj tchib'jal. Atzunte pal kxel tma'n qa tz'il ta' xjal lu, ex mya il ti'j tu'n tokx japut, ex tz'il ta'.
12Qa at jun xjal at tx'a'k ti'j ex qa otoq noj ti'j t-ximlal tu'n, xi'ynix kyi'j tqan ex max japun b'aj tuj twi', noq jatum b'a'n tpon b'aj twitz pal ti'j,
13kb'ajel tke'yin pal; ex qatzun otoq b'aj t-sipan tib' tx'a'k ti'j tkyaqil t-ximlal, ex qa otoq tz'ok saq ke'yin, kxel tma'n pal qa saq ta' xjal lu; atzunte yab' saq ta'.
14Ex qa ma jaw jlet juntl maj tx'a'k ti'j tchib'jal xjal, ex qa q'ancha'lin aku tchib'jal; tu'n jlu b'i'xtzun ktz'ilixtel xjal.
15Kb'ajeltzun tke'yin pal tchib'jal xjal otoq jatz jlet ex kxel tma'n qa tz'il ta' xjal lu, ex qa tchib'jal xjal otoq jatz jlet, tz'il jlu, atzun tx'a'k minti' q'anb'il ti'j.
16Qatzun ma saqix tchib'jal xjal, aju otoq jatz jlet, il ti'j tu'n t-xi' xjal tuk'il pal,
17tu'ntzun tok tke'yin, ex qa ma til pal otoq saqix ke'yin tx'a'k, kxel tma'n qa saq ta' xjal lu, ex saq ta' xjal.
18Qa at jun xjal at jun kyaqk'u ti'j, ex qa ma b'anix,
19ex qa otoq txi mal tik'len ex saq otoq tz'ok ke'yin, ex qa skolin ke'yin, il ti'j tu'n t-xi' yek'ul tib' twitz pal.
20Qatzun ma til pal mas otoq tz'okx laq'e' tik'len tx'a'k, ex qa otoq saqix ke'yin xya'n, kxe'ltzun tma'n pal qa tz'il ta' xjal lu, porke aju tx'a'k tok ti'j, atzunju minti' q'anb'il ti'j.
21Qatzun minti' jun xya'n saq ke'yin ma til tuj tik'len tx'a'k, ex minti' otoq tz'okx laq'e' tx'a'k ti'j tchib'jal xjal, qa noq leq'an tkub' naj, k'okextzun tjapu'n pal xjal lu wuq q'ij.
22Qatzun in laq'e' tel tx'a'k ti'j, kxe'ltzun tma'n pal qa tz'il ta' xjal lu, porke aju tx'a'k tok ti'j, atzunju minti' q'anb'il ti'j.
23Qatzun minti' ma tz'el laq'e' tx'a'k, noqtzun tik'len atx, ex kxel tma'n pal qa saq ta' xjal lu.
24Qa at jun xjal ma tz'e'y, ex qa ma jatz jlet tchib'jal skolin ex qa saq ke'yin jatum otoq tz'e'y,
25kb'ajel tke'yin pal. Qa otoq saqix ke'yin xya'n tok ttzi', ex otoq tz'okx laq'e' tx'a'k ti'j tchib'jal xjal, atzun tx'a'k lu aju minti' q'anb'il ti'j otoq jaw jlet jatum otoq tz'e'y; kyja'tzun kxel tma'n pal qa tz'il ta' xjal lu tu'nju otoq jaw jlet tx'a'k ti'j, aju minti' q'anb'il ti'j.
26Oktzun tb'aj tke'yin pal aju tx'a'k, ex qa minti' jun xya'n ma til saq ke'yin tkub' ttzi', ex qa minti' otoq tz'okx laq'e' tx'a'k tuj tchib'jal xjal, ex qa noq kyja' tkub' naj, k'okextzun tjapu'n pal xjal lu wuq q'ij.
27Tujtzun twuqin q'ij kb'ajel tke'yin pal xjal juntl maj, ex qatzun otoq tz'el laq'e' tx'a'k ti'j, kxe'ltzun tma'n te qa tz'il ta', porke aju tx'a'k tok ti'j, atzunju minti' q'anb'il ti'j.
28Qatzun minti' ma tz'el laq'e' tx'a'k ti'j ex qa kyja' tkub' naj, noqtzun tik'len aju otoq tz'e'y atx; kyja'tzun kxel tma'n pal qa saq ta' xjal lu, porke noq tik'len aju otoq tz'e'y atx.
29Qa at jun xinaq ex qa jun xu'j ma jaw jlet tx'a'k ti'j twi' ex qa ti'j t-xk'aw',
30kb'ajel tke'yin pal tx'a'k lu. Qa otoq tz'okx laq'e' tx'a'k tuj tchib'jal xjal ex aju xya'n otoq tz'ok q'anyin ke'yin, ex qa nib'an tel pulj, kxe'ltzun tma'n pal qa tz'il ta' xjal lu, ex sal tok ti'j ex qa aju tx'a'k minti' q'anb'il ti'j tok ti'j twi' ex qa ti'j t-xk'aw'.
31Ok tb'aj tke'yin pal aju tx'a'k, qa ma til minti' otoq tz'okx laq'e' tx'a'k tuj tchib'jal xjal ex minti' xya'n q'eq ke'yin tkub' ttzi', k'okextzun tjapu'n pal xjal lu wuq q'ij.
32Tujtzun twuqin q'ij kb'ajel tke'yin pal aju tx'a'k, ex qatzun minti' otoq tz'el laq'e' tx'a'k, ex minti' otoq tz'okx laq'e' tuj tchib'jal xjal ex mya q'anyin ke'yin xya'n tkub' ttzi',
33kxe'ltzun tma'n pal te xjal tu'n tel ti'n ttzmal twi' ex t-xmatz, atzun qe xya'n kyokxsa'n tuj tx'a'k mi'n tz'el ti'n, ex k'okex japu'n xjal tu'n pal wuq q'ijtl.
34Tb'ajlenxi wuq q'ijtl, k'okel tke'yin pal juntl maj tx'a'k; qatzun minti' otoq tz'el laq'e' tx'a'k ex minti' otoq tz'okx laq'e' tx'a'k tuj tchib'jal xjal, kxe'ltzun tma'n pal qa saq ta' xjal lu. Kjawitz ttx'jo'n xjal ti'j t-xb'alun ex ksaqseteltzun.
35Qatzun ma tz'el laq'e' juntl maj tx'a'k ti'j xjal t-xilenxi q'ma'n te qa otoq saqix,
36kb'ajel tke'yin pal juntl maj; qatzun otoq tz'el laq'e' tx'a'k ti'j, mya il ti'j tu'n t-xi tjyo'ntl pal aju xya'n q'anyin ke'yin: aju xjal lu tz'il ta'.
37Ex qa tuj tnab'l pal otoq b'anix tx'a'k ti'j xjal, ex otoq tzaj jlet xya'n q'eq ke'yin tuj tik'len tx'a'k, otoqtzun b'ant tx'a'k; aju xjal saq ta', ex kxel tma'n pal qa saq ta' te xjal lu.
38Qa at jun xinaq ex qa jun xu'j otoq che jawil manch saq ke'yin ti'j,
39kb'ajel tke'yin pal ti'j t-ximlal, ex qa ma til ch'in manch saqyin ke'yin ti'j, noqtzun e'lajx manch otoq jaw jlet ti'j; saq ta' xjal lu.
40Qa at jun xinaq ma ku'tz pulj ttzmal twi' ex tz'a'j ma kyaj tuj twi', saq ta' te xjal lu.
41Ex qa ma ku'tz pulj ttzmal twi' ttzi twitz, tz'a'jtzun tib'aj twitz; ax ikx saq ta' te xjal lu.
42Ex qa ma jaw jlet tx'a'k skolin ke'yin jatum otoq tz'el b'aj ttzmal twi', qa tuj twi' ex qa tib'aj twitz, atzun tx'a'k lu minti' q'anb'il ti'j nib'an tjaw jlet ti'j.
43Atzunte pal kb'ajel tke'yin, ex qa otoq txi mal tx'a'k skolin ke'yin ik tza'n tx'a'k minti' q'anb'il ti'j, jatum minti' ttzmal twi', qa tuj twi' ex qa tib'aj twitz,
44yab'tzun xjal lu tu'n tx'a'k minti' q'anb'il ti'j; ti'j twi' tok yab'il. Aju xjal lu tz'il ta', ex kxel tma'n pal qa tz'il ta' xjal lu.
45Aju xjal at tx'a'k ti'j, aju minti' q'anb'il ti'j, sb'it'umaj t-xb'alun k'okel tq'o'n, kxel tchitpu'n twi', k'okel tpotzin ttzi' ex kjawil sch'in kyja': Tz'il qine, tz'il qine.
46Tz'il ktel akux at tx'a'k ti'j, knajal junx te ti'jxi campament.
47Qa ma jlet sb'ak ti'j jun xb'alun lan ex qa ti'j jun xb'alun lino,
48ex qa ti'j jun xb'alun lino ex qa lan chmo'n in che ku'tz, ex qa ti'j jun tz'u'm, ex qa ti'j juntl ti'xti b'inchamaj ti'j tz'u'm,
49ex qa aju sb'ak tok kyi'j qe ti'xti lu cha'xyin ex qa kyaqyin ke'yin, atzun tx'a'k tok kyi'j aju minti' q'anb'il ti'j, ex il ti'j tu'n t-xi yek'b'aj te pal.
50Atzunte pal kb'ajel ke'yinte aju sb'ak lu ex aju ti'xti otoq tz'ok sb'ak ti'j, ex k'okex tlamo'n wuq q'ij.
51Tujtzun twuqin q'ij kb'ajel tke'yin pal aju sb'ak; qatzun otoq tz'el laq'e' sb'ak ti'j xb'alun ex qa ti'j chemaj, qa ti'j tz'u'm ex qa ti'j jun makb'il tz'u'm, atzun tx'a'k lu mya b'a'n, minti' q'anb'il ti'j, ex atzun qe makb'il lu tz'il qe.
52Kyja'tzun kb'el patit noq alkyexku jun ti'xti, qa xb'alun, qa chemaj, qa tz'u'm ex qa jun makb'il tz'u'm at sb'ak ti'j, b'i'x kb'el patit, ex atzun tx'a'k mya b'a'n jlu, aju minti' q'anb'il ti'j.
53Ex qa ok tb'aj tke'yin pal ex qa ma til minti' otoq tz'el laq'e' sb'ak,
54kxel tma'n tu'n tb'aj tx'jet ti'xti lu, ex k'okex tlamo'n wuq q'ijtl.
55Tb'ajlenxitzun tx'jet ti'xti lu ex tel-lenxi wuq q'ijtl, kb'ajel tke'yin pal juntl maj, ex qa ma til minti' otoq kub' naj sb'ak, k'okeltzun jlu te tz'il ex b'i'x kb'el patit maske na'nx tel laq'e' sb'ak, tu'nju aju sb'ak lu lo'n tel xb'alun tu'n, qa tujxi ex qa ti'jxi.
56Qatzun ok tb'aj tke'yin pal aju sb'ak ex qa ma til noq nib'an tkub' naj tb'ajlenxi tx'jet, k'eleltzun tqesin jun piẍ xb'alun, qa tz'u'm ex qa chemaj, jatum tok sb'ak.
57Ex qa ma jaw jlet ex ma tz'el laq'e' juntl maj sb'ak ti'j xb'alun, ex qa ti'j ttze'yil chemaj ex qa ti'j twa ex qa ti'j tz'u'm, k'okextzun patit ti'xti lu.
58Atzunju xb'alun ex qa chemaj ex qa tz'u'm otoq kub' naj sb'ak ti'j tej tjatzlen tx'jo'n, il ti'j tu'n tjatz tx'jet ti'j juntl maj, ex b'i'xtzun k'okel te saq.
59Atzun qe ley lu ti'j sb'ak kyi'j qe xb'alun b'inchamaj ti'j lan ex qa ti'j xb'alun lino, ex qa ti'j ttze'yil chemaj, ex qa ti'j twa ex qa ti'j jun ti'xti tz'u'm, tu'ntzun t-xi q'mat qa saq ate' ex qa tz'il.
Who We AreWhat We EelieveWhat We Do
2025 by iamachristian.org,Inc All rights reserved.
