Romanos 12 - Mam Huehuetenango New Ortography

Sk'o'maj qo' tu'n Dios tu'n qajb'en o'kx te

1Erman, ma tzaj q'aq'an tk'u'j Dios q'ij, kyja'tzun chin kub'sale kywitze tu'n t-xi kyq'o'ne kyximlale te Dios ik tza'n jun oyaj itz', tekuxix Dios ex b'a'n nne'la tuj twitz, atzun kyk'ulb'ile axix tok twitz Dios.

2Ex mi'n che ok lpe'ye ti'j kynab'l xjal mya b'a'n, noq o'kx kych'expum kynab'le tu'n kyoke te ak'aj, tu'ntzun kyojtzqinteye alkye tajb'il Dios, tu'n tel kynik'e ti'j alkye b'a'n, ex alkye in tzalaj Dios ti'j ex alkye ju tz'aqlxix.

3Noq tu'n t-xtalb'il Dios ma tzaj q'o'n woklene, kyja'tzun kxel nma'ne kyeye kykyaqile, mi jun tu'n t-ximan ti'jx qa at mas toklen ex b'alo minti', noq o'kx tu'n t-ximan ti'jx tujxix tumel, ik tza'nx tokslab'l junjun tzaj tmalo'n Dios.

4Porke ik tza'n qximlal nimku iqan tu'n ex mya junx ta' kyaq'un,

5ikxtzun qten, maske nimku qb'aj pero noq jun qximlal tu'nju qmojb'ab'l qib' tuk'il Crist, ex qkyaqil qtzuylaj qib' ti'j jun qximlal.

6Kyja'tzun, junxilchaq toklen junjun qe ma tzaj tq'o'n Dios ik tza'nx tajb'il, b'a'n tu'n qajb'en tuj tumelxix. Alkye at toklen tu'n t-xi tpakb'a'n tyol Dios, b'a'n tu'n t-xi tpakb'a'n ik tza'nx tokslab'l tzaj tmalo'n Dios.

7Alkye at toklen tu'n tajb'en kye txqantl, b'a'n tu'n tajb'en. Alkye at toklen tu'n tq'onte xnaq'tzb'il, b'a'n tu'n t-xi tq'o'n xnaq'tzb'il.

8Alkye at toklen tu'n t-xi tq'o'n kynab'l txqantl, b'a'n tu'n t-xi tq'o'n kynab'l. Alkye b'a'n q'on kotzb'aj, q'onx tu'n tkyaqil tk'u'j. Alkye b'a'n tok te nejenel, b'a'n tu'n tok tq'o'n kwent ti'j; ex alkye in q'aq'an tk'u'j ti'j juntl, oninx tu'n tkyaqil tzalajb'il.

Aju tu'n kyb'inchante okslal

9Aju kyk'ujlalile myawt noq tten. Kyik'un ele aju mya b'a'n, che lpe'ke ti'j ju b'a'n.

10Kyk'ujlam kyib'e kyxolxe porke kyitz'in kyib'e; tz'ok tililx kyu'ne tu'n kynimanjtz qe txqantl okslal ex mya o'kx aqeye tu'n kynimanjtze.

11Tz'ok tililx kyu'ne ex mi'n che oke ky'aj; tenwt t-sek'al kyanmiye ex che ajb'ene te Qajaw.

12Che tzalajxe tu'nju q'uql kyk'u'je tu'n kytene tuk'il Qajaw; tzik'xwit yajb'il kyu'ne; ex mi'n che q'ajene tu'n kyna'ne Dios.

13Che onine kyi'j okslal ti'j ju atx taj kye; ex kyq'onxe kyposad okslal.

14Che kub'sane twitz Dios tu'n kykub' ky'iwla'n qeju in che yajlan kyeye; kyqaninxe ky'iwb'il kyib'aj, ex mi'n txi kyqanine mya b'a'n kyib'aj.

15Che tzalajxe kyuk'il qeju in che tzalaj; che oq'e kyuk'il qeju in che oq'.

16Junxwit kynab'le kyxolxe; mi'n jaw kyniman kyib'e; kymojb'an ok kyib'e kyuk'il qeju noq ch'in kyoklen. Mi'n che ximane ti'j qa mas at kynab'le.

17Qa ma b'inchanjtz mya b'a'n kyi'je, mi'n tz'aj kyq'o'ne t-xel mya b'a'n; tz'ok tililx kyu'ne tu'n tb'ant aju b'a'n tuj kywitz kykyaqil xjal.

18Qa jaku b'ant kyu'ne, tz'ok tililx kyu'ne tu'n kytene b'a'n kyuk'il kykyaqil xjal.

19Aqeye erman at nk'u'je kyi'je, mi'n tz'aj kyq'o'ne t-xel mya b'a'n, noq o'kx kyq'onkje tuj tkwent Dios; porke in tma'n tuj Tu'jil: Wu'ne k'ajel t-xel; aqine chin q'olte castiw, chi Qman.

20Kyja'tzun, aju aj q'oj ti'ja, qa at we'yaj ti'j, q'onxa twa; ex qa at txqetle'n ti'j, q'onxa tk'a'; qa ma tb'inchaya ikju ktzajel tch'ixwi, chi tuj Tu'jil.

21Mi'nwt kub' ti'ja tu'nju mya b'a'n, noq o'kx tu'n tkub' ti'j mya b'a'n tu'na tu'nju tb'inchb'ena b'a'n.