Éxodo 9 - Mam Huehuetenango New Ortography

Aju k'ixb'isab'l tu'n kykyim alumaj

1Tzajtzun tma'n Qman te Moisés:

—Tokxa twitz Faraón ex q'manxa te kyja': Chi Qmane, aju Qdiose aqo'ye aj Hebreo: Che ttzoqpi'mexa qe xjal etzan wu'ne, tu'n kyk'ulun weye, chi Qman.

2Qatzun mi'n ma che ex ttzoqpi'na, ex qa kukx ma che kub' ttzyu'na,

3tzul t-sama'n Qmane jun yab'il kyuwxix kyib'aj qe taluna ate' tuj kojb'il, qe tcheja, qe tburra, qe tcheja camey, qe twakẍa, qe t-ẍne'la ex qe tchipa.

4Atzun qe kyalun aj Israel che elel tpa'n Qmane kyi'j qe kyalun aj Egipto, ex mi jun kyalun aj Israel kymel, chikuya te.

5B'i'x o tma Qman alkye q'ij tu'n ttzaj k'ixb'isab'l lu: Nchi'j b'ant jlu wu'ne tuj tx'otx' Egipto, chi Qmane, chi Moisés.

6Tujtzun juntl q'ij tzaj k'ixb'isab'l lu tu'n Qman. E b'aj kyim kykyaqil kyalun aj Egipto; atzun kye aj Israel mi jun kyalun o kyim.

7Xitzun t-sama'n Faraón jun xjal b'ilte te, ex mi jun kyalun aj Israel otoq kyim. Maske ikju, ex kukx kub' tkyuwsa'n tanmi, ex minti' e je'tz ttzoqpi'n qe aj Israel.

Aju k'ixb'isab'l tu'n tx'a'k

8Xi tma'n Qman te Moisés ex te Aarón kyja': Kyjato'n jawe noq jte' yub' tza'j ttzi jorni, ex kjawix tchitun Moisés twitz kya'j twitz Faraón.

9K'okel tza'j lu te puj tib'aj tkyaqil tx'otx' Egipto; ex tu'nju puj lu, tzul jlet tx'a'k kyi'j xjal ex kyi'j alumaj tuj tkyaqil tx'otx' Egipto, chi Qman.

10Jawtzun kyjato'n tza'j ttzi jorni, ex e pon twitz Faraón. Jax tchitun Moisés tza'j twitz kya'j, ex jawil jlet tx'a'k kyi'j xjal ex kyi'j alumaj.

11Atzun kye chman minti' b'ant kywe' twitz Moisés, tu'n tlaj tx'a'k jaw jlet kyi'j ex kyi'j kykyaqil aj Egipto.

12Ex kub' tkyuwsa'n Qman tanmi Faraón, ex minti' xi tb'i'n kyyol Moisés ex Aarón, ik tza'n otoq tma Qman te Moisés.

Aju k'ixb'isab'l tu'n saqb'aqun

13Tzajtzun tma'n Qman te Moisés:

—Primx jaw we'ya nchi'j, we'kuya twitz Faraón ex q'manxa te kyja': Chi Qmane aju Qdiose aqo'ye aj Hebreo: Che ttzoqpi'mexa qe xjal etzan wu'ne, tu'n kyk'ulun weye,

14ex qatzun mi'n, ktzajel nsama'ne kykyaqil nk'ixb'isab'le ti'ja, kyi'j qeju at kyoklen ttxlaja ex kyi'j qe t-xjalila, tu'ntzun tel tnik'a ti'j mi a'l juntl ik tza'n qine tuj tkyaqil twitz tx'otx'.

15Noqwit xi nyek'une wipumale tu'n tk'ixb'iseta tu'n yab'il, owtlo kyima kyuk'ix qe t-xjalila,

16ex ma kyaj anq'ina wu'ne tu'n tel tnik'a ti'j wipumale, ex tu'n tel tqanil nb'iye tuj tkyaqil twitz tx'otx'.

17¿Maj kukxtzun che b'el ttzyu'na qe xjal etzan wu'ne tu'n mi'n kyex ttzoqpi'na?

18B'intza, tloqju nchi'j ktzajel nchitune saqb'aqun alxix wen, aju b'ajx tzaj jun maj ikju atxix tuj q'ij tkub'len xe't tnam lu, ex matzun ja'lo.

19Samanxtzuna xjal tu'n kytzaj chmet qe taluna ex tkyaqilju at teya tuj kojb'il. Qatzun mi'n ma che b'aj tchmo'na tu'n kyul tjaya, che kymel tu'n saqb'aqun kb'el tz'aq kyib'aj tuj kojb'il, qa xjal ex qa alumaj, chi Qmane, chikuya te Faraón.

20Aqeju xi kyniman tyol Qman kyxol qeju attoq kyoklen ttxlaj Faraón, okx kyq'o'n qe kymajen ex qe kyalun kyuj kyja;

21atzun qeju minti' xi kyniman tyol Qman, ax e kyaj kyq'o'n qe kymajen ex qe kyalun tuj kojb'il.

22Tzajtzun tma'n Qman te Moisés kyja':

—Nuqpinx tq'ab'a twitz kya'j tu'ntzun ttzaj saqb'aqun tib'aj tkyaqil tx'otx' Egipto, kyib'aj qe xjal ex qe alumaj, ex tib'aj tkyaqil awal tuj kojb'il tuj Egipto.

23Xitzun tnuqpi'n Moisés tky'aqo'ch twitz kya'j. Tzaj julin q'ankyoq tu'n Qman, ex tzaj saqb'aqun. Tzaj qoptz'aj tqan q'ankyoq, ex tzaj chitj saqb'aqun tu'n Qman tib'aj tx'otx' Egipto.

24Ku'tz chitj saqb'aqun twitz kya'j tuk'ix tqan q'ankyoq nimxix wen; b'ajx tzaj jun maj ikju atxix tkub'len xe't tnam Egipto.

25Tkyaqilju attoq tuj kojb'il tuj tx'otx' Egipto o naj tu'n saqb'aqun, tza'nx qe xjal ax ikx qe alumaj. Ax ikx o naj tkyaqil awal, ex kykyaqil tze' b'i'x e b'aj naj.

26O'kx tuj tx'otx' Gosén jatum najltoq qe aj Israel, minti' kub' saqb'aqun.

27Xitzun txokb'aj Moisés ex Aarón tu'n Faraón, ex xi tma'n kye kyja':

—Ma chin b'inchane il ja'lo. Ate Kymane tz'aqlxix, atzun weye ex qe nxjalile aj il qo'ye.

28Che kub'sane twitz Kymane tu'n twe' saqb'aqun ex q'ankyoq in julin tu'n. Jaku che ex ntzoqpi'ne qe xjal ex mlay che kub' ntzyu'ntle, chi Faraón.

29Xitzun tma'n Moisés te:

—B'i'x ok wexe ja'lo tuj tnam lu, kxel nnuqpi'ne nq'ab'e, chin kub'sale twitz Qmane, ex kweb'el q'ankyoq ex saqb'aqun tu'ntzun tel tnik'a ti'j, te te Qmane aju Qdiose tkyaqil twitz tx'otx'.

30Ex b'a'n wu'ne, mlay txi kynimane Qmane aju Qdiose, mi aya ex mi qeju at kyoklen ttxlaja, chi Moisés.

31Aju awal lino tuk'ix sebad, b'i'x e b'aj naj tu'n saqb'aqun, porke matoq in japun twitz sebad, ex matoq in xmakalin lino.

32Atzun te triw tuk'ix senteno, minti' e naj, tu'nju na'nxtoq tul kyq'ij.

33Etztzun Moisés twitz Faraón, elpun ti'jxi tnam, e je'x tnuqpi'n qe tq'ab' ex kub'san twitz Qman. We'tzun q'ankyoq ex saqb'aqun, ex we' tu'n ttzaj jb'al.

34Tej tke'yinte Faraón otoq we' jb'al tuk'ix saqb'aqun ex q'ankyoq, o b'inchan il juntl maj ex kub' tkyuwsa'ntl tanmi, kyuk'ix qeju attoq kyoklen ttxlaj.

35O kyuwix tanmi Faraón, ex minti' e je'tz ttzoqpi'n qe aj Israel, ik tza'n otoq tma Qman tu'n Moisés.