Nahum 1 - Mam Huehuetenango New Ortography

Aju tq'oj Dios ti'j tnam Nínive

1Atzun tqanil lu tzaj tma'n Dios te Nahum aju aj Elcos. Aju tqanil lu ti'j tnam Nínive.

2Tokxix twitz Qman ti'j tkyaqil ex nna'j tq'o'n t-xel mya b'a'n. Nna'j tq'o'n t-xel mya b'a'n kye qeju in jaw kyi'n kyib' ti'j ex at-xix tq'oj, ex in tzaj tq'oj kyi'j qe aj q'oj ti'j.

3Yaj in tzaj tq'oj Qman ex at nimxix tipumal, mlay tzik'x ti'j tu'n mi'n tkub' tcastiw xjal at til. In b'et Qman tuj kyq'iq' jb'al ex xkyaqinpaẍ, ex aju muj, atzun quq in jaw kyu'n tqan.

4In xi tmayo'n aju mar ex b'i'x in tzqij tu'n, ex in che tzqij kykyaqil qe nima tu'n. Qe kojb'il tuj tx'otx' Basán ex tuj Carmelo in che tzqij, ax ikx in che tzqij qe b'ech ate' tuj Líbano.

5Qe nmaq witz in che jaw lu'lun twitz, ex qe tal witz in che kub' ulj twitz. Ok tyek'unte tib', in tzaj lu'lun tkyaqil tx'otx' ex kyuk'ix qeju najlqe twitz.

6¿Alkye jun jaku kub' we' twitz ok ttzaj tq'oj? ¿Alkye jun jaku tzik'x tu'n aju tq'oj? In tzaj nim ttx'u'jil ik tza'n q'aq', ex tu'n in che kub' pax qe pik.

7B'a'nte Qman; ate jun kolb'il tuj tq'ijlalil xob'ajil, kwentin tu'n qeju q'uql kyk'u'j ti'j.

8Atzun qeju in jaw kyi'n kyib' ti'j che najel tu'n, ik tza'n in naj tkyaqil tu'n jun nima otoq ch'iy wen, ex qe aj q'oj ti'j che xel tlajo'n tuj qlolj.

9¿Tiqu'n in che ximane tu'n kyq'ojine ti'j Qman? Che najele tu'n te jumajx, mya il ti'j tu'n tkub' kab' maj kycastiwoye tu'n.

10Maske ik kyten ik tza'n ch'i'x t-sakun tib', ex maske chyo'mni kywi' tu'n q'e'n, che b'ajel tz'e'y te jumajx mer ik tza'n tzqij ch'im.

11Aya tnam Nínive, tuja etz aju xjal kub' ximante tu'n tb'inchante mya b'a'n ti'j Qman; jun xjal q'ol nab'l jumajx mya b'a'n.

12Tu'ntzun jlu in tma'n Qman kye qe xjal etzan tu'n: Maske nimxix kyb'aj qe aj Asiria ex nimxix kyipun, pero at jun q'ij che b'el b'yo'n ex che najel. Wu'ne ma che k'ixb'isanjtze, ex ja'lo ya mlay che ok nk'ixb'isa'ntle.

13Kb'ajel npaẍu'ne aju yuw tkub' kyib'aje ex che b'el ntzaqine qe caden tok kyi'je, chi Qman.

14Atzun kyeye aj Nínive, ma tma Qman kyi'je kyja': Mlay che tentl qe kyiyjile tu'n kukx ttzaj na'n kyb'iye; kb'el nxitune tkyaqil wiq tilb'ilal ate' tuj tja kydiose, ex atzun che b'elex nmaqu'ne ma chixin, porke jumajx mya b'a'n qeye.

Tqanil tu'n tnaj tnam Nínive

15Kyke'yinxe kywi' qe witz, lu sanjel tzul q'olte tqanil b'a'n te kolpib'l kyeye. Aqeye aj Judá, kyik'sa'n kub'e qe ninq'ij; japunx kyu'ne aju o txi kytziyane te Dios. Qe xjal mya b'a'n mlay che ultl q'ojlel kyi'je; ma che naj te jumajx.