1Ay b'ek'b'il twitza tnam Asiria, tu'nju ma che naj txqantl tnam tu'na ex atzun teya minti' ma naja, noq minab'en nno'k tzoqpaja kyi'j tnam b'a'n kyten tuk'ila ex atzun teya mi a'l jun nno'k tzoqpaj ti'ja. Oktzun kyb'aj naj txqantl tnam tu'na, ax ikx teya knajela, ex ok t-xi tkolina tu'n tok tzoqpaja kyi'j qe tnam, ax ikx che okel tzoqpaj ti'ja.
2Nman, ttzaj tz'e'y tk'u'ja qi'je, porke o'kx in qo ayone ti'j kolb'il tu'na. Kuchiwt tz'onina qeye tkyaqil prim ex kolina qi'je tuj tq'ijlalil yajb'il.
3Ok tb'injtz tq'ajq'ajel twi'ya kyuwxix te xob'tzab'l, che elel oq qe tnam; ex ok tok tzoqpaja kyi'j qe nasyon, kb'ajel kysputin kyib' qe xjal ate' kyuj.
4Qe aj q'oj mer ik tza'n txqan ẍplon, in che tzaj tu'n kyok tzoqpaj kyi'j qe nasyon ex in xi kyi'n kyq'inumab'l qeju otoq kub' kyi'j kyu'n.
5Ma'xix toklen Qman, ex atzun ta' tnajb'il tuj kya'j; qe xjal ate' tuj tnam Sión ma che ok te tz'aqlxix tu'n ex tuj tumelxix in kyb'incha'n jun ti'xti,
6ex segurxix che okel tkwentin. Aju nab'l ex aju ojtzqib'l ik kyten ik tza'n jun q'inumab'l in che klet xjal tu'n; ex aju tu'n qxob' twitz Qman jun qq'inumab'l jlu.
7Kyb'inxe, qe xjal kyuw kyk'u'j tuj q'oj in che sch'in tuj cay tu'n kyb'is, ex lu nno'k oq'el kyu'n qe xjal e je'x sama'n q'olte tqanil tu'n twe' q'oj.
8Ma che kyaj kolin qe b'e ex minti' jun xjal in b'et kyuj. Ma kub' xitj ju yol ex ju trat kyaj b'ant ti'j, ex mi jun xjal in niman te juntl.
9Aju tx'otx' puro b'is ta' ex qe tze' twi witz Líbano ya ma tzqij kyxaq ex tuj ch'ixb'ajil ate'; aju chq'ajlaj Sarón ma tz'ok ik tza'n tzqij tx'otx', ex qe tze' tuj tx'otx' Basán kyuk'ix qeju ate' twi witz Carmelo, ma kub' b'aj tilj kyxaq.
10Chi Qman kyja': Chin jawil we'ye ja'lo tu'n t-xi nyek'une tkyaqilju woklene ma'xix ex ju wajwalile.
11Aju ximb'etz ma b'aj kynak'u'ne ti'j tu'n tb'ant kyu'ne, k'okel ik tza'n ch'im ex ik tza'n tz'is; ax kyxewe nne'tz tuj kytzi'ye k'okel ik tza'n q'aq' tu'n kynaje tu'n.
12Qe tnam che okel te tza'j ok kynaj tu'n q'aq', ik che okel ik tza'n tqan ch'i'x in jaw tx'emit ex nno'kx q'ot tuj q'aq' tu'n tk'ant.
13Aqeye xjal najchaq ate'ye, kyb'intze aju o nb'inchaye, ex aqeye niqayin ate'ye, tz'elx kynik'e ti'j wipumale.
14Qe xjal aj il tuj tnam Sión nimxix kyxob'il ma tzaj, ex qe xjal b'inchal mya b'a'n ma che jaw lu'lun ex in kyma'n: ¿Alkye jun qe jaku kyaj anq'in tuj jun q'aq' in b'aj naj tkyaqil tu'n? ¿Alkye jun qe jaku kyaj anq'in tuj jun q'aq' in k'ant te jumajx?
15Aju xjal in b'et tuj tumelxix, ex in yolin axix tok, ex mya tu'n pwaq nne'l ti'n te juntl xjal nno'k te q'inun, ex minti' in tqanin oyaj tu'n t-xi tb'incha'n kyi'j xjal, ex minti' in xi tb'i'n kyyol qe xjal kyaj tu'n tkub' kyb'yo'n juntl xjal, ex minti' nno'k tq'o'n twitz ti'j ju mya b'a'n,
16k'anq'il tuj txub'txaj ex mi a'l jun klab'tel ti'j, knetel jun tkolb'il tib' kywi' qe matij pik, ex kukx knetel twa ex tk'a.
17Ok kyila'ye aju rey tuj tajwalil, ex najchaq kpol b'aj tmojonil tx'otx'.
18Ok ttzaj kyna'ne aju tchiylal ik' kyi'je, ok kyma'ye kyja': ¿Jatum ta' aju q'il tajlal qe chojb'il? ¿Jatum ta' aju malol pwaq qa cabal ta'? ¿Jatum ta' aju q'il kyajlal qe ja ma' kywa'l te kykolb'il kyib' xjal? Che chiloye.
19Mlay tz'ok kyke'yintle qe aj q'oj jawni kywitz, aqeju minti' nne'l qnik' ti'j kyyol, jun yol t-skun tib' ex mi a'l jun nne'l tnik' ti'j.
20Kyke'yinxe aju tnam Sión, jatum in nik'set qninq'ij, k'okel kyke'yine aju tnam Jerusalén tuj txub'txaj ta'; ik k'okel ik tza'n jun xb'alun ja mlay tzik' yukut, mlay che jatz b'aqet qe stak te tzuyb'il te ex mlay che tzaqj qe k'alb'il te.
21Atzun tzul tyek'un tib' Qman qe tuk'il tajwalil. Tuj lugar lu ate' qe nima ma' kywitz, mlayx che pon laq'e' aj q'oj kyuk'il kybarc, mi qeju kyu'nx in xi kyjawo'n kybarc kyu'n txqan palet, ex mi qe barc matij.
22Porke ate Qman k'okel te qjwes, a kq'olte ley qe, a k'okel te qrey ex a kolol qi'j.
23Minti' ma tzyet ju tze' tkub' tuj kymij qe nmaq barc kyu'n qe taq'al, ex aju xb'alun jatum nno'k kyq'iq' te lamob'l kye barc minti' ma b'ant tlik'et. Nimxix q'inumab'l k'elel q'i'n kyi'j aj q'oj, ex kyuk'ix qe kox che okel ten q'ilte q'inumab'l.
24Mi jun xjal najl tuj tnam ok tma' kyja': Yab' qine, chiwt, porke kb'el tnajsa'n Dios aju kyil aj Sión.
Who We AreWhat We EelieveWhat We Do
2025 by iamachristian.org,Inc All rights reserved.
