Proverbios 3 - Mam Huehuetenango New Ortography

Jun yol tza'n tten tu'n tten qnab'l

1Nk'wa'l, mi'n tzik' kyna'l qe nxnaq'tzb'ile tu'na ex k'u'nxa qe nmandamyente tuj tanmiya,

2porke kleq'eb'il tuj tq'ija kyu'n ex k'anq'ila tuj txub'txaj.

3Mi'n kyaj tkolina aju k'ujlalil ex ju yol axix tok; q'o'n kub'a qe tqula ik tza'n jun uwj. Awa'n ku'xa qe tuj tanmiya;

4qa ma tb'inchaya ikju, ktzalajel Dios ti'ja ax ikx qe xjal.

5Qe'k tk'u'ja ti'j Qman tu'n tkyaqil tanmiya ex mya tu'n tok qe' tk'u'ja ti'j texa tnab'la.

6Na'ntza Qman ti'j tkyaqilju kb'antel tu'na, ex a Qman kxel ẍaqlun teya tuj b'e jiqun ti'j.

7Mi'n jaw tniman tib'a qa at nim tnab'la; nimana te Qman ex pa'n el tib'a ti'j mya b'a'n:

8ex atzun jlu ik tza'n jun q'anb'il teya tu'n tok tipun t-ximlala.

9Q'onxa nimb'il te Qman ex q'onxa jun oyaj te ti'j tq'inumab'la ex ti'j tnejel twitz tawala;

10qa ma tb'inchaya ikju, che nojel qe ttx'utx'a wen ex qe tkub'il ta'l twitz t-uvaya.

11Nk'wa'l, qa ma kub' kawina tu'n Qman, mi'n tz'el tik'una, ex mi'n tzaj tq'oja ok tok ilina tu'n;

12porke te Qman in che kub' tkawin qeju k'ujla'n qe tu'n, ik tza'n jun mamb'aj in che kub' tkawin tk'wa'l k'ujla'nxix tu'n.

13At tzalajb'il teju xjal in knet nab'l tu'n ex nne'l tnik' ti'j alkye b'a'n tu'n tb'ant tu'n;

14ex mas ma' t-xilen jlu twitz saq pwaq ex mas nim tajb'en twitz q'an pwaq.

15Aju nab'l mas ma' t-xilen kywitz qe tb'anil ab'j perla kyb'i; ex mi jun juntl ti'xti tb'anil in pon kyk'u'j xjal ti'j, jaku pon ik tza'n jlu.

16Aju nab'l, nej in tzaj tq'o'n chwinqlal, ex te tib'ajxi in tzaj tq'o'n q'inumab'l ex nimb'il.

17Qa ma qo ok lpe' ti'j b'e q'i'n tu'n, puro b'a'n jlu; ex qa ma qo b'et tuj tb'e, jaku qo ten tuj tzalajb'il.

18Tzul q'o'n tchwinqlal xjal aju in knet nab'l tu'n; at tzalajb'il te kye qeju minti' in xi kytzoqpi'n.

19Tu'n tnab'l Qman kub' tb'incha'n tx'otx', ex tu'n tojtzqib'l kyuwset kya'j;

20tu'n tnab'l e jaqet twi a', ex tzaj jb'al tuj muj tu'n.

21Nk'wa'l, kukx tu'n tten tnab'la, ex mi'n kyaj tkolina aju tnab'la b'a'n,

22ex kyu'n jlu ktzajel q'o'n tchwinqlala ex che okel ik tza'n jun adorn te teya.

23Kyja'tzun ok tb'eta tuj tb'eya minti' t-xob'il ti'ja, ex mlayx jaw tolja.

24Ok tojlana minti' tu'n t-xob'a, ex ok tkub' koẍe'ya, txub'txaj ktala.

25Mlay xob'a kywitz qe xob'ajil minab'enku che tzajel, ex mi twitz ju k'ixb'isab'l tzul kyib'aj qe b'inchal mya b'a'n,

26porke ate Qman kq'uqb'alte tk'u'ja, ex ok kletela tu'n tu'n mi'n tkub' tz'aqa tuj k'ob'il.

27Mi'n kub' t-xk'ayin tib'a tu'n tb'inchanteya jun xtalb'il teju xjal in qanin teya; qa jaku b'ant tu'na, b'inchama.

28Qa at tumel tu'n t-xi tq'o'na onb'il q'onxa ja'lo, mi'n kyaj tq'o'na te nchi'j.

29Mi'n kub' t-ximana tu'n tb'inchanteya mya b'a'n ti'j tvesina aju najl ttxlaja ex q'uql tk'u'j ti'ja.

30Mi'n tz'ok tena q'ojlel ti'j juntl qa minti' jun mya b'a'n otoq tb'incha ti'ja.

31Mi'n tzaj lo'ch tk'u'ja ti'j jun xjal jurat in jaw q'ojl, ex mi'n tz'el tkano'na aju in tb'incha'n;

32porke ik'un tu'n Qman qe xjal b'inchal mya b'a'n; atzun qeju in kyb'incha'n tz'aqlxix, at tmojb'ab'l tib' kyuk'il.

33In tzaj tq'o'n Qman mya b'a'n kyib'aj qeju ate' tuj tja ju xjal b'inchal mya b'a'n, atzun qeju ate' tuj tja ju xjal tz'aqlxix, in che kub' tky'iwla'n.

34In xmayin Qman kyi'j qeju b'a'n che xmayin, atzun qeju mans in tzaj tq'o'n Dios t-xtalb'il kye.

35Aqeju at kynab'l, che jawil nimsa'n, atzun qeju minti' kynab'l, ktzajel kych'ixwi.