Isaías 63 - Mam Huehuetenango New Ortography

Kb'el tq'o'n Dios kycastiw qe aj q'oj ti'j

1¿Alkye jun xjal tzul, ma tz'etz tuj tnam Bosra aju nintz tnam te Edom, tok t-xb'alun kyaq ke'yin, kyja' ttzaj toksa'n t-xb'alun in qoptz'aj wen ex in b'et tuk'il tkyaqil tipumal?

—Aqine, in chin yolin jun yol tz'aqlxix ex at nim wipumale tu'n kyklete wu'ne.

2¿Tiqu'ntzun kyaq ke'yin t-xb'aluna toksa'n, mer ik tza'n t-xb'alun jun xjal ok nne'l tpatz'u'n ta'l twitz uva tu'n tqan?

3Ax tok o chin patz'une ta'l twitz uva njunalxe ex mi a'l jun o onin wi'je, tuk'il nim ntx'u'jile e b'aj nwab'ane qe aj q'oj wi'je, e b'aj nb'etz'ane tu'n nq'oje; ma tz'ok tx'itl chik' ti'j nxb'alune ex ma b'aj naj ti'j tkyaqil tu'n.

4Kub' nximane tu'n tpon tq'ijlalil tu'n tkub' kycastiw aj q'oj wu'ne, tu'nju otoq tzul kanun tq'ijlalil tu'n kykolpet qe xjal etzan wu'ne.

5B'aj nke'yine, ex mi a'l jun tu'n t-onin wi'je; b'i'x in jaw lab'ine tu'nju mi a'l jun tu'n tqe' nk'u'je ti'j. Kyja'tzun, tu'nx nq'ab'e kub' kyi'j aj q'oj ex ax nq'oje o q'onte wipumale.

6Tu'nju nim nq'oje tzaj, e b'aj nb'etz'ane qe nasyon, b'i'x e naj tu'n nq'oje ex o b'et tel kychk'el wu'ne twitz tx'otx', chi Qman.

T-xtalb'il Dios kye aj Israel

7Waje tu'n nyoline ti'j tk'ujlalil Qman, ex tu'n nb'itzane tu'ntzun tjaw nimset tb'i ti'j tkyaqilju b'a'n ma tb'incha qi'j, tu'nju nimxix t-xtalb'il kyi'j qe kyiyjil aj Israel ex tu'nju o tb'incha tu'n tq'aq'b'il tk'u'j ex tu'n tk'ujlalil.

8Chi Qman o tma: Etzan qe xjal lu wu'ne, k'wa'lin qe wu'ne ex mlay chin sb'unjtze kyu'n. Kyja'tzun e klet tu'n.

9Tuj tkyaqil yajb'il tzaj kyi'j, ax ikx te o yajlanjtz. Ax t-anjel Qman o klonte kye. A o kolpin kye tu'nju tk'ujlalil ex tu'nju tq'aq'b'il tk'u'j; e jaw twab'an ex e jaw tchle'n; iklex o tb'incha atxix ojtxi.

10Atzun kye jaw kyi'n kyib' tu'n kyq'ojin ti'j Qman, kyja'tzun, tzaj tb'is T-xew Dios tu'n kyb'inchb'en mya b'a'n ex ok te aj q'oj kyi'j ex ax o q'ojin kyi'j.

11Qe xjal etzan tu'n Qman tzaj kyna'n aju tq'ijlalil te ojtxi tej tten Moisés, ex in b'aj kyqanin kyxolx kyja': ¿Jatum ta' Dios aju kolpinte kye xjal tuj mar, tuk'ix Moisés aju pastor kyi'j qe xjal etzan tu'n Qman? ¿Jatum ta' Dios aju xi q'onte T-xew tu'n tten kyuk'il,

12ex xi tq'o'n tipumal ma' toklen tu'n tten tuk'il Moisés? ¿Jatum ta' Dios aju kub' pa'nte mar kywitz qe xjal etzan tu'n, tu'ntzun tb'injtz aju tqanil ti'j tipumal te jumajx?

13¿Jatum ta' aju ik'x q'inte kye xjal tuj tmij mar ex minti' e jaw tolj, ik tza'n qe chej minti' in che jaw tolj tuj tzqij tx'otx',

14ex ik tza'n qe wakẍ in che ku'tz kywi witz tu'n kykub'il tuj chq'ajlaj? Axte Dios ẍaqlul kye. Kyja'tzun tten e je'x t-ẍaqlu'n qe xjal etzan tu'n ex kyja'tzun tten o tkamb'a tu'n tyolinjtz jun tqanil b'a'n ti'j ex tu'n tjaw nimsa'n tb'i.

In che kub'san xjal twitz Dios

15Qman, qo tke'yintza max tuj kya'j, max tuj lugar xjan ex ma' toklen jatum najliya. ¿Jatum ta' tk'ujlalila ma'xix ex tipumala? ¿Mape b'aj tq'aq'b'il tk'u'ja qi'je?

16Aya Qmane maske minti' ojtzqi'n qo'ye tu'n qxe'chele Abraham ex minti' in qo ule ti'j tk'u'j Jacob, pero aya Qmane; ma b'et-xi q'ij axte kolpil qeye.

17Qman, ¿Tiqu'n in tq'o'na amb'il tu'n qel txalpaje ti'j tb'eya ex in tkyuwsa'na qanmiye tu'n mi'n qnimane teya? Tajtz meltz'aja juntl maj quk'ile noq tu'n tk'ujlalila qi'je, aqo'ye tmajena ex aqo'ye aj Israel etzan qo'ye tu'na.

18Noq ch'in tuj o oke tajwil qtanmiye, aqo'ye qpa'n qib'e tu'n qajb'ene teya. Qe aj q'oj qi'je ma b'aj kywab'an aju tjaya xjan.

19Ato'ye mer ik tza'n b'ajx kawina jun maj qib'aje ex mer ik tza'n b'ajx tz'ok tb'iya qi'je.