1Xitzun ttzaq'we'n Job ex tma:
2Ax tok o'kx aqeye at kynab'le kyxol kykyaqil xjal, ex ok kykyime minti' juntl at tnab'l ik tza'n kyeye.
3Ax ikx weye at nnab'le, ex mya mas ch'in nnab'le kywitze. ¿Alkye jun minti' b'a'n tkyaqil jlu tu'n?
4Nej in chin kub'sane twitz Dios ex in chin tzaj tb'i'n, atzun ja'lo in che tze'n qe wamiwoye wi'je maske minti' wile ex minti' npaltile.
5Aju xjal b'a'n ta' nne'l tik'un aju myaxix b'a'n ta'; minti' tb'is ti'j tu'n t-xi tlamo'n aju kyja'toq tik' tz'aq.
6Qe xjal eleq' at tzalajb'il tuj kyja, qeju kyk'i' che niman Dios txub'txaj in che anq'in, aju kyipumal nno'k kyq'o'n te kydios.
7Qaninxa kye txkup ex qa kye chyu'j; jaku tzaj xnaq'tza'na kyu'n.
8Ax ikx te tx'otx' ex qe kyiẍ ate' tuj mar, b'a'n t-xi tqanina kye tu'n ttzaj xnaq'tza'na kyu'n.
9¿Atpe jun na'nx tb'inte qa tu'n tq'ab' Dios o b'ant tkyaqil?
10Tuj tq'ab' Dios ta' kychwinqlal kykyaqil qeju itz' twitz tx'otx', ax ikx kyanmi kykyaqil xjal.
11Aju ẍkyinb'aj b'a'n tu'n alkye t-xilen junjun yol, ik tza'n qk'o'n in tna'n qe tk'ok'jal.
12Qe tij xjal at kynab'l; ax ju kyab'q'iyil ma tzaj q'onte kynab'l.
13Ex ate Dios at nim tnab'l ex at nim tipumal, in kub' t-ximan alkyechaq taj, ex in japun tu'n.
14Aju in kub' t-xitun Dios, mi a'l jun jaku jaw b'inchante juntl maj, aju ma tz'okx tjpu'n Dios, mi a'l jun jaku tzoqpinte te.
15Qa ma we' jb'al tu'n, tkyaqil ktzqijel; qa ma tzaj tzoqpaj jb'al tu'n, knajel tx'otx'.
16Tu'n tipumal kb'el ti'j tkyaqil. Tuj tkwent Dios ta' ju xjal in kub' sb'u'n tuk'ix ju in sb'un.
17Nne'l ti'n kynab'l qe xjal q'ol nab'l ex in tzpet kynab'l qe kawil tu'n.
18Nne'l ti'n kyoklen qe rey ex in che'x ti'n pres.
19Nne'l ti'n kyoklen qe pal ex qeju nim kyoklen.
20Qe q'ol nab'l, aqeju q'uqlxix kyk'u'j xjal kyi'j, in che kyaj ten minti' kyyol, ex nne'l ti'n kyojtzqib'l qe tij xjal.
21Nne'l tik'un qe xjal nim kyoklen, ex nne'l ti'n kyipun qeju at kyipun.
22In tzaj ttx'olb'a'n aju kyximb'etz xjal at tuj ewaj ex in kub' tq'o'n tuj spik'un aju attoq tuj qlolj.
23In xi tq'o'n kyipun qe nasyon ex in che kub' t-xitun, in che el t-sputun ex in che ok tchmo'n juntl maj.
24Nne'l ti'n kynab'l qe nejenel kyuj qe tnam ex in che'x naj tu'n tuj jun lugar minti' kynajb'il xjal tuj, minti' b'e tu'n tknet kyu'n jatum tu'n kyxi',
25jatum noq xmakan in che b'et tuj qlolj, noq in takpaje' kyik' ik tza'n k'al q'e'n.
Who We AreWhat We EelieveWhat We Do
2025 by iamachristian.org,Inc All rights reserved.
