2 Crónicas 13 - Mam Huehuetenango New Ortography

Tej tkawin Abías tuj Judá 1 Reyes 15.1-8

1Tzyettzun tkawin Abías tuj Judá tej otoq b'ant wajxaq laj ab'q'i ttzyetlen tkawin Jeroboam kyib'aj aj Israel,

2ex o kawin Abías ox ab'q'i tuj Jerusalén. Aju ttxu', Micaías tb'i, ex tme'jel Uriel aju aj Gabaa.

Ok q'oj kyxol Abías tuk'il Jeroboam.

3Tzyettzun q'oj tu'n Abías kyuk'ix kyaje syent mil soldad otoq che jaw t-sk'o'n. Ax ikx te Jeroboam b'ant tten tu'n tq'ojin ti'j Abías, kyuk'ix wajxaq syent mil soldad sk'o'maj tu'n.

4Tejtzun kypon qe soldad aj Judá twi witz Zemaraim aju tkub' tuj tiwitz tx'otx' kye aj Efraín, xi sch'in rey Abías ti'j rey Jeroboam ex kyi'j aj Israel ex xi tma'n kyja': Chin kyb'intze:

5¿Minti'pe b'a'n kyu'ne, ate Qman aju Kydios aj Israel o txi tq'o'n ju kawb'il te jumajx te David ex kye qe tiyjil, ex aju yol o tzaj ttziyan Dios te David mlay ch'expet?

6Ex ate Jeroboam aju tky'ajal Nabat ex tmajen Salomón, jaw ti'n tib' ti'j Salomón aju tky'ajal David,

7ex ok kychmon kyib' junjun xinaq tuk'il, ky'aj qe ex mya b'a'n kymod, ex mas ik' nej kyyol twitz tyol Roboam aju tky'ajal Salomón, porke ate Roboam matoq ku'xunx ex na'nxtoq tb'ant t-ximan ti'j alkye tu'n tb'ant tu'n. Kyja'tzun minti' ten tipun tu'n twe' kywitz.

8Atzun ja'lo kyaje tu'n tkub' ti'j tkawb'il Qman kyu'ne, aju at tuj kyq'ab' qe tiyjil David, noq tu'nju nimxix kyeye kyb'et ex tu'nju at qe kyilb'ilal tal wakẍ q'an pwaq kyuk'ile, aqeju e kub' tb'incha'n Jeroboam tu'n kyok te kydiose.

9Ax ikx o tz'ex kylajo'ne qe pal te Qman, aqeju tiyjil Aarón, kyuk'ix qe aj Leví, ex o tz'ok kyq'o'ne kyoklen junjun xjal te pal tu'n kyajb'en kyxole ik tza'n in kyb'incha'n qe nasyon mya nimal Dios. Noq alkye jun xjal ma tzul xjansal tib' q'i'n jun tal wakẍ tu'n tuk'ix wuq ẍne'l, jaku tz'ok te pal tu'n tajb'en kye qe tilb'ilal nno'k kydiosine.

10Atzun qeye, aju Qdiose a Qman, ex minti' ma kyaj qkoline. Aqeju qeye qpal in che ajb'en te Qman, tiyjil Aarón qe ex atzun qe aj Leví in che onin kye;

11tkyaqil prim ex tkyaqil qale in xi kyq'o'n qe oyaj patun in che kub' te Qman, tuk'ix storak, ex in che kub' kyq'o'n qe pan twi mes xjansamaj, ex tkyaqil qale nno'k kytxaqo'n qe kandil tu'n kyk'ant twi kykub'il q'an pwaq kytx'otx'il. Ex qeye in japun qu'ne aju in tzaj tma'n Qman aju Qdiose, atzun kyeye ma kyaj kykoline.

12Tz'elx kynik'e ti'j, ate Dios at quk'ile tu'n tkub' nej qwitze, ex qe pal in che ajb'en te b'anin kyten tu'n tok kyq'ajtza'n qe chun tu'n tok q'oj qu'ne kyuk'ile. Kyja'tzun, aqeye aj Israel, mi'n che q'ojine ti'j Qman aju Kydios qtzan qxe'chel, ex mlay kub' ti'j kyu'ne, chi Abías.

13Pero e je'x t-sama'n Jeroboam txqan soldad kyi'jxi aj Judá tu'ntzun kytzaj q'ojlel kyi'j, atzun txqantl t-soldad Jeroboam e kyaj ten kywitz aj Judá tu'ntzun kyok tzoqpaj q'ojlel kyi'j.

14Tejtzun kylonte aj Judá kyja'toq kyok tzoqpaj t-soldad Jeroboam q'ojlel kyi'jxi ax ikx kywitz, e kub'san twitz Qman ex e oktzun ten qe pal q'ajtzalte chun.

15Tejtzun kyjaw sch'in aj Judá tu'n tok q'oj, kub' ti'j Jeroboam kyuk'ix kykyaqil aj Israel tu'n Abías ex kyu'n aj Judá, noq tu'n tipumal Dios.

16E eltzun oq aj Israel kywitz aj Judá, ex ax te Dios otoq txi q'onte kye tuj kyq'ab' aj Judá.

17Nimxix xjal kyim tu'n Abías ex kyuk'ix qe t-soldad, kub' kyb'yo'n jwe' syent mil soldad, aqeju mejor che q'ojin ate' kyxol aj Israel.

18Kyja'tzun tten kub' kyi'j aj Israel tuj tq'ijlalil lu, ex aqe aj Judá e kamb'an ex ok qe' kyk'u'j ti'j Qman aju Kydios qtzan kyxe'chel.

19Kukx ok ten Abías q'ojlel ti'j Jeroboam ex el ti'n qe tnam lu tuj tkwent: Betel, Josana ex Efraín, kyuk'ix qe ky-aldey.

20Minti'tl ok tipun tkawb'il Jeroboam tej itz'xtoq Abías. Te tib'ajxi ok k'ixb'isa'n Jeroboam tu'n Qman ex b'i'x kyim,

21atzunte Abías ok mastl tipun tkawb'il. O ten kyajlaj t-xu'jil ex tzaj 22 tky'ajal ex qaqlaj tme'jel.

22Aju ch'intl tx'olb'ab'en ti'j Abías ex ti'j tkyaqilju o tb'incha tuj tanq'ib'l, atzun tz'ib'an tuj libro kyaj ttz'ib'an Iddo aju t-sanjel Dios.