1Tzaj yolin Qman tuk'il Moisés kykyimlenxi kab'e tky'ajal Aarón, aqeju e kyim tu'nju e pon laq'e' niqayin twitz Qman,
2ex tzaj tma'n te kyja':
—Q'manxa te termaniya Aarón: Mya noq alkyex or b'a'n tokx tuj Lugar Xjanxix ti'jxi xb'alun tkub' tuj tmij njaye, twitz tlamel kax, tu'ntzun mi'n tkyim; porke kb'el nyek'un wib'e tuj jun muj tib'aj tmaqsil kax.
3Noq o'kx b'a'n tokx Aarón tuj Lugar Xjanxix ok kyb'ant qe jlu tu'n: Ok ttzaj ti'n jun tal tor te chojb'il til ex jun tman ẍne'l te chojb'il patun in kub'.
4Aju t-xb'alun k'okel atzun qe jlu: T-ẍjo'w tuk'ix tcalsonsiy, tuk'ix k'alb'il tk'u'j ex k'alb'il twi'; kykyaqil xb'alun lu lino qe ex xjansamaj qe, che okel tq'o'n ti'j tb'ajlenxi chin.
5Atzun kye aj Israel kxel kyq'o'n kab'e tman chip te Aarón te chojb'il il, ex jun tman ẍne'l te chojb'il patun in kub'.
6Ktzajeltzun ti'n Aarón tal tor te chojb'il te til, tu'ntzun tnajset tex til ex kyil qeju ate' tuj tja.
7Te tib'ajxi ktzajel ti'n qeju kab'e tman chip ex che b'el tq'o'n nwitze, ttzi ja xb'alun te mojb'ab'l tib'il.
8Kjawil ti'n Aarón swert kyi'j kab'e tman chip lu, tu'ntzun tel tnik' ti'j alkye te Qman ex alkye tu'n t-xi tzoqpet tu'n t-xi tiqan kyil xjal.
9Aju tman chip kb'el suert tib'aj tu'n tok te Qman, kb'el tb'yo'n Aarón te chojb'il il.
10Atzun tman chip ma kub' tz'aq suert tib'aj tu'n t-xi tzoqpet, ktzajel ti'n Aarón ex kb'el tq'o'n twitz Qman tu'ntzun tnajset kyil xjal, ex maxitzun kxel tzoqpet, ex kxel samet tuj lugar minti' kynajb'il xjal tuj.
11Te tib'ajxi jlu ktzajel ti'n Aarón tal tor te chojb'il tex til, ex k'okex tqesin tjaq' tqul, tu'ntzun tnajset tex til ex kyil qeju ate' tuj tja.
12Maxitzun ktzajel ti'n jun ẍla'k nojni tu'n xq'a'l otoq tzaj ti'n tib'aj altar tkub'sa'n twitz Qman, tuk'ix kab'e jot storak che'majtl, ex k'okex ti'n ti'jxi xb'alun tkub' tuj tmij njaye;
13ex k'okex tq'o'n storak tib'aj q'aq' tku'x tuj ẍla'k, tu'ntzun tkub' tq'o'n nwitze, atzun t-sib'el storak kmaqsilte tlamel kax k'ub'l nleye, tu'ntzun mi'n tkyim Aarón.
14Ktzajel ti'n ch'in tchk'el tal tor, kxel ttx'ito'n ch'in chik' tu'n twi' tal tq'ab' tib'aj kax tuj tumlal tjawitz q'ij. Ax ikx kxel ttx'ito'n ch'in chik' lu wuq maj ti'j tmaqsil kax.
15Te tib'ajxi jlu, kb'el tb'yo'n Aarón aju tman chip te chojb'il kyil tnam xjal, ex k'okex ti'n tchk'el ti'jxi xb'alun tkub' tuj tmij njaye; ex kxel ttx'ito'n ch'in chik' lu tib'aj tmaqsil kax, tuk'ix ti'j, ik tza'nx otoq tb'incha ti'j tchk'el tal tor.
16Iktzun tten ksaqsetel lugar xjanxix tu'n tlaj kytz'ilil aj Israel, tu'n tlaj mib'an che niman ex tu'n tlaj kyil. Ax ikx il ti'j tu'n t-saqset ja xb'alun te mojb'ab'l tib'il, aju tkub'sa'n kyxol qe xjal at nim kytz'ilil.
17Ok tokx Aarón tuj Lugar Xjanxix qanil te Dios tu'n tnajset kyil xjal, mi jun xjal b'a'n tokx ten tuj ja xb'alun te mojb'ab'l tib'il. Maxi b'a'n tokx, okxi tetz Aarón tb'ajlenxi tq'o'n chojb'il ti'j tex til, tuk'ix ti'j kyil qeju ate' tuj tja, ex kye kykyaqil tnam xjal aj Israel.
18K'eletztzun Aarón tu'n t-saqset altar tkub'sa'n nwitze. Ktzajel ti'n ch'in tchk'el tal tor ex ch'in tchk'el tman chip, ex k'okel t-su'n tkyaqil kyi'jele tkach altar,
19ex wuq maj kxel ttx'ito'n chik' tu'n twi' tal tq'ab' tib'aj altar te patb'il chojb'il. Iktzun tten ksaqsetel altar tu'n tlaj ttz'ilil kyb'inchb'en aj Israel, ex iktzun tten kxjansetel.
20Oktzun tb'aj saqset Lugar Xjanxix tu'n Aarón, ex ja xb'alun te mojb'ab'l tib'il, tuk'ix altar te patb'il chojb'il, kxel tma'n tu'n ttzaj laq'b'a'n tman chip itz'x;
21ex che b'el tq'o'n tq'ab' Aarón tib'aj twi' tman chip, ex kjawitz tpa'n tkyaqil kyb'inchb'en aj Israel mya b'a'n, tuk'ix kypaltil ex kyil. Iktzun tten kb'el tq'o'n kyil xjal tib'aj twi' tman chip, ex aju xjal b'animaj ti'j kxel ti'n tman chip lu tuj lugar minti' kynajb'il xjal tuj.
22Kyja'tzun tten kxel ti'n tman chip tkyaqil kyil aj Israel tuj tx'otx' minti' kynajb'il xjal tuj, ex kxel ttzoqpi'n xjal tman chip tuj lugar minti' kynajb'il xjal tuj.
23Te tib'ajxi jlu k'okex Aarón tuj ja xb'alun te mojb'ab'l tib'il, ex k'elel ti'n t-xb'alun lino, aju otoq tz'ok tq'o'n tu'n tokx tuj Lugar Xjanxix; axtzun kyjel tq'o'n
24ex k'okex chil tuj Lugar Xjan. Ex toklenxi t-xb'alun, aju tok tu'n tkyaqil maj, k'eletz tu'n t-xi tq'o'n chojb'il til ex chojb'il kyil aj Israel, tu'ntzun tnajset tex til tuk'ix kyil xjal.
25Atzunju t-sebyil alumaj te chojb'il il kb'el tpatun tib'aj altar te patb'il chojb'il.
26Atzunju xinaq otoq txi q'inte tman chip tu'n t-xi tzoqpet, kb'ajel ttx'jo'n ti'j t-xb'alun; ax ikx te, il ti'j tu'n tchin. Te tib'ajxitzun b'a'n tu'n tokx tuj kycampament aj Israel.
27Atzunju tal tor tuk'ix tman chip otoq che'x q'ot te chojb'il il, ex otoq tz'okx tx'itet ch'in kychk'el tuj Lugar Xjanxix te najsb'il il, che elex q'it ti'jxi campament, ex che b'el patit tuk'ix kytz'umal, kychib'jal ex kytxa'.
28Aju xjal kb'el patunte te, il ti'j tu'n tjatz ttx'jo'n ti'j t-xb'alun ex tu'n tchin, ex te tib'ajxi jlu b'a'n tu'n tokx tuj campament.
29Lu jun ley lu te jumajx kyjel ten te kyeye: Tuj tlajin q'ij te twuqin xjaw kb'el kyyo'ne we'yaj ex mi a'l jun k'aq'nal; tza'nx kyeye, ax ikx qe stranjer xjal ate' kyxole,
30ex atzun q'ij lu knajsetel kyile nwitze, ex che kyjel tene saqxix, ya minti'tl kyile.
31Aju q'ij lu k'okel te ojlab'l ex ma' toklen te kyeye. Tuj q'ij lu mi'n che wa'ne, ex a jlu jun ley kyjel ten kyuk'ile te jumajx.
32Aju pal kyjel ten te nejenel kye pal te t-xel tman kb'antel tkyaqil jlu tu'n, tu'ntzun tnajset tkyaqil il. K'okel tq'o'n t-xb'alun lino aju xjansamaj,
33ex ksaqsetel Lugar Xjanxix tu'n, tuk'ix ja xb'alun te mojb'ab'l tib'il, tuk'ix altar te patb'il chojb'il, ex kchjetel kyil kykyaqil pal ex kyil kykyaqil aj Israel tu'n.
34A jlu jun ley kyjel ten te kyeye te jumajx: Jun maj kb'antel jlu tuj tkyaqil ab'q'i, tu'n tnajset kyil aj Israel, chi Dios te Moisés.
Ex o b'ant tkyaqil jlu ik tza'nx otoq kyaj tma'n Qman te Moisés.
Who We AreWhat We EelieveWhat We Do
2025 by iamachristian.org,Inc All rights reserved.
