Levítico 5 - Mam Huehuetenango New Ortography

Qe chojb'il ti'j nimku txkaj il

1Qa at jun xjal ma txkonjtz tu'n tok te testiw tu'n t-xi tma'n aju otoq til ex qa otoq tb'i, ex qa ma kub' tewan tu'n mi'n t-xi tma'n, jun il jlu ex a kxel iqante il.

2Ax ikx qa at jun xjal ma tz'ok makonte jun ti'xti tz'il, ik tza'n t-ximlal jun jil tz'il ex kyimni, qa jun txkup ex qa jun alumaj, ex qa t-ximlal jun jil tz'il jaqu'n in xi' tk'u'j twitz tx'otx', ax ikx ktz'ilixtel xjal tu'n jlu, ex at til ti'j, maske minti' otoq tna' ok tik' takl ti'j.

3Qa at jun xjal ma tz'ok makonte t-ximlal jun xjal ttz'ilsan tib' noq tu'n alkyexku ttz'ilil, ex qa minti' ma tz'el tnik' ti'j, ex qa te tib'ajxi k'elel tnik' ti'j, at til ti'j jlu.

4Qa at jun xjal ma txi tziyante jun yol jurat naj, qa b'a'n ex qa mya b'a'n ju yol, ex qa mya ximamaj tu'n, ex qa minti' ma tz'el tnik' ti'j tujx or lu, ex qa te tib'ajxi k'elel tnik' ti'j, at til ti'j jlu.

5Aju xjal kb'inchalte il noq alkyexku jun kyxol qe jlu, il ti'j tu'n tjatz tpa'n aju il otoq tb'incha,

6ex il ti'j tu'n ttzaj tq'o'n jun ttxu ẍne'l ex qa jun ttxu chip te weye te chojb'il il otoq tb'incha; ex tu'ntzun chojb'il lu kchjetel til xjal tu'n pal.

7Qatzun minti' tpwaq xjal tu'n tlaq'et jun ttxu ẍne'l tu'n, b'a'n tu'n ttzaj ti'n kab'e ẍpo'q ex qa kab'e tal paloma te weye, te chojb'il il otoq tb'incha: jun te chojb'il il, atzun juntl te jun oyaj patun in kub'.

8Che tzajel ti'n tuk'il pal, atzunte pal, tnejel kxel tq'o'n ẍpo'q aju k'ajb'el te chojb'il il. Kjawil tb'alq'i'n ti'j tqul, ex mi'n tz'el ttzaqan twi' te jumajx;

9ex k'okel ttx'ito'n ch'in chik' te chojb'il il ti'j jun pak' tk'u'j altar, ex aju chik' kjel ten kb'elex tyatz'o'n t-xe tqan altar, tu'nju chojb'il il jlu.

10Atzun tkab'in ẍpo'q kb'el patit te oyaj ik tza'nx b'animaj ti'j; kyja'tzun tten kchjetel tu'n pal aju il otoq tb'incha xjal, ex knajseteltzun til.

11Qatzun minti' tpwaq xjal tu'n kylaq'et kab'e ẍpo'q ex qa kab'e tal paloma, b'a'n tu'n ttzaj ti'n kab'e libr arin tb'anilxix te jun oyaj te chojb'il til. Mi'n txi tq'o'n aseyt tuj ex mi'n kub' tq'o'n storak tib'aj, porke jun oyaj te chojb'il il jlu.

12Kpol ti'n tuk'il pal, atzunte pal ktzajel ti'n jun yub' arin ex kb'el tpatun tib'aj altar, junx kyuk'il qe oyaj patun in che kub' nwitze te jun oyaj kukx tu'n ttzaj na't xjal ti'j. Jun oyaj te chojb'il il jlu,

13tu'ntzun tchjet tu'n pal noq alkyex il otoq tb'incha xjal, ex knajseteltzun til. Aju oyaj kjel ten, te pal k'ajb'el, ik tza'nx in b'inchet ti'j oyaj twitz awal.

Qe chojb'il ti'j kyil xjal

14Tzaj yolin Qman tuk'il Moisés ex tma kyja':

15Qa at jun xjal noq minab'en ma tz'el ti'n ch'in kyi'j qe oyaj xjansamaj te Qman, il ti'j tu'n tetz ti'n kyxol qe t-ẍne'l jun tman ẍne'l minti' tpaltil tu'n t-xi tq'o'n te chojb'il til. Il ti'j tu'n tok malet jte' twi' tu'n saq pwaq ik tza'nx malb'il in ajb'en tuj tja Dios. A jlu jun chojb'il ti'j til.

16K'ajel tq'o'n aju otoq tz'el ti'n kyi'j qe oyaj xjansamaj te Qman ex kxel tq'o'n tjwe'yin tib'aj; kxel tq'o'n te pal, ex tu'ntzunju tman ẍne'l lu kchjetel til xjal tu'n pal, ex knajseteltzun til.

17Qa at jun xjal ma b'inchan il tu'nju in tb'incha'n jun ti'xti mya ik tza'n in kyma'n qe nmandamyente, maske minti' otoq tz'el tnik' ti'j ex at til ti'j, ex il ti'j kchjetel tu'n.

18Kyja'tzun ktzajel ti'n jun tman ẍne'l minti' tpaltil kyxol qe t-ẍne'l, ex aya k'okel malonte te jte' twi', ex kxel ti'n tuk'il pal te jun chojb'il til, kyja'tzun kchjetel tu'n pal aju il noq minab'en otoq tb'incha xjal, ex knajseteltzun til.

19Jun chojb'il ti'j il jlu, porke aju xjal lu at til nwitze.