Salmos 31 - Mam Huehuetenango New Ortography

Ok qe'xix tk'u'j David ti'j QmanB'itz tu'n David

1Nman, ti'ja ma tz'ok nklon wib'e, mi'n taq'a amb'il tu'n tkub' nch'ixwiye. Chin tkloma porke aya jun Dios tz'aqlxix.

2Chin tb'intza, juratx chin tklom naja. Tz'okxwita te weye ik tza'n jun pik tu'ntzun nklete tu'na, tz'okxwita te jun matij ja kyuw tten te kolb'il wib'e ex kolol weye.

3Ik ttena te weye ik tza'n jun pik ex ik tza'n jun matij ja kyuwxix tten.

Chin t-ẍaqluma ex chin tkwentin oka tu'ntzun tjaw nimsa'n tb'iya.

4Chin ti'n etza tuj k'ob'il ma kub' kyq'o'n aj q'oj wi'je, porke aya kolol wi'je.

5Tuj tq'ab'a in xi woqxenane wanmiye; tzaja kolol wi'je Nman, aya Dios axix tok.

6In che el wik'une qe xjal in che k'ulun kywitz qe tilb'ilal minti' kyajb'en. O'kx ma tz'ok qe' nk'u'je ti'ja Nman.

7Chin tzalajele nim tu'nju at tk'ujlalila wi'je. Ma tila qe nb'ise, ojtzqi'n tu'na aju k'ixk'oj in tzaj wi'je;

8minti' ma chinx tq'o'na tuj kyq'ab' qe aj q'oj wi'je; kub' tq'o'na qine tuj jun lugar segurxix.

9Nman, q'aq'antz tk'u'ja wi'je porke atine tuj xob'ajil. Qe tb'aq' nwitze tuk'ix nximlale ex tuk'ix wanmiye minti'tl kyipun tu'n b'is.

10Niban tb'aj nchwinqlale tu'n k'ixk'oj. Jurat nib'an kyel wab'q'iyile; in b'aj wipune tu'n b'is, nib'an tb'aj tipun nximlale.

11Ma chin oke te kyxmayb'il qe aj q'oj wi'je, ax ikx kyu'n qe nvesine; noq in che el sek'paj qe wamiwoye wi'je. Aqeju in che ok ke'yinte weye tuj cay, b'i'x in che el oq wi'je.

12B'i'x ma tzik' nna'njtze kyu'n mer ik tza'n ma chin kyime. Ik ma chin oke ik tza'n jun xar ma b'aj pax.

13In nb'i'ne qe xjal in che si'min yol wi'je. At xob'ajil tuj tkyaqil part. Kykyaqil in b'aj kyximan mya b'a'n wi'je ex in b'aj kyximan tu'n nkyime kyu'n.

14Atzun weye Nman, q'uql nk'u'je ti'ja, in xi nma'ne: Aya Ndiose.

15Kwentin qine tu'na tuj tkyaqilju in b'aj wi'je; chin tkloma kywitz qe aj q'oj wi'je, aqeju lepcho'k wi'je tu'n nkub'e kyu'n.

16Chin tke'yintza tuk'il t-xtalb'ila, aqine tmajena, ex chin tkloma tu'nju tk'ujlalila.

17Ti'ja in jaw tq'ajq'ajel nwi'ye Nman, mi'n kub' tq'o'na nch'ixwiye. Q'onkuya kych'ixwi qe xjal b'inchal mya b'a'n ex q'onku'xa qe tuj kynajb'il kyimni tu'n mi kyq'ajt.

18B'inchama tu'n mi kyq'ajtl qe xjal nik'al yol in che ik'un ex jawni qe, ex in che yolin mya b'a'n ti'j ju xjal tz'aqlxix.

19Ma'xix t-xtalb'ila kyuk'il qeju in che niman teya. In xi tk'u'na ik tza'n jun q'inumab'l, ex kywitz qe xjal in xi t-sipana kye qeju q'uql kyk'u'j ti'ja.

20Tu'nju ate' tuk'ila, che kletel tuj mya b'a'n in b'aj kyximan xjal; in che okx tklo'na qe tuj tjaya kywitz qe yol mya b'a'n kyu'n qe aj q'oj kyi'j.

21Nimanxwit Qman tu'nju tk'ujlalil, tb'incha nimku b'a'n weye tej nklete tu'n tuj jun tnam tok muro ti'j.

22Tzaj nxob'ile ex xi nma'ne jun yol kyja': Ma chin kyaj koline tu'n Qman, nchiye, pero tej t-xi nqanine onb'il teya, tzaj tb'i'na tq'ajq'ajel nwi'ye.

23Kyk'ujlame Qman kykyaqile aqeye in che niman te. In che ok tkwentin Qman qeju in che b'et tuj tumelxix, ex qeju in jaw kyniman kyib', in kub' tq'o'n kycastiw tuj tumelxix.

24Tenx kyipune ex kyuwx kyk'u'je kykyaqile q'uql kyk'u'je ti'j Qman.