1B'aj kychmon kyib' kysoldad aj Filisteo tu'n tb'ant kyten tuj q'oj, ex ok kychmon kyib' tuj tnam Soco; aju tnam lu atzun ta' tuj tkwent Judá, ex atzun e kub' ten tuj Efes-damim aju tkub' t-xol tnam Soco ex Azeca.
2Ax ikx te Saúl ex qe aj Israel b'aj kychmon kyib' ex atzun e kub' ten tuj chq'ajlaj Ela, ex b'aj kytxolb'an kyib' tu'n kyq'ojin kyi'j aj Filisteo.
3Qe aj Filisteo atzun e kub' ten twi' jun witz, atzun qe aj Israel e kub' ten twi' juntl witz, ex kyaj ten jun chq'ajlaj kyxol.
4Kyxol aj Filisteo etz jun xinaq Goliat tb'i, aj Gat te, at nim tnab'l tu'n tq'ojin ex ox var tuk' mey twa'l.
5Tjax jun tpasb'il q'an k'uxb'il ttx'otx'il, ex tok jun tchikyet te jwe' arrob talil ax q'an k'uxb'il ttx'otx'il,
6ex ax q'an k'uxb'il ttx'otx'il ju toksa'n ti'j tqan te kolb'il, ex q'i'n jun tlans ch'in tqan k'alo'n ttzal ti'j; a jlu ax q'an k'uxb'il ttx'otx'il.
7Ex aju tqan juntl tlans q'i'n tuj tq'ab', ma' twa'l ex ma' tk'itz, ex ju k'uxb'il tok twi' te olaj libr talil. Ex aju onilte nejni twitz.
8Jawtzun we' Goliat ex xi tma'n kye soldad aj Israel:
—¿Tiqu'n ma b'aj kytxolb'an kyib'e tu'n kyq'ojine? Weye aj Filisteo qine, atzun kyeye tmajen Saúl qeye. Kysk'on jawe jun xinaq kyxole tu'n ttzaj q'ojlel wuk'ile.
9Qa jaku q'ojin wuk'ile ex qa ma chin kub'e tu'n, atzun qo'ye qo okel te kymajene; qatzun ate ma kub' wu'ne, atzun qeye che okel te qmajene.
10Ax ikx xi tma'n Goliat kyja': Chux qeye aj Israel, kyq'ontze jun xinaq tu'n tq'ojin wuk'ile ja'lo, chi Goliat.
11Tej tb'inte Saúl ex kykyaqil aj Israel tyol aj Filisteo, tzaj b'aj kyk'u'j ex tzaj nim t-xob'il kyi'j.
12Tuj tq'ijlalil tej tten Saúl, attoq jun xinaq aj Belén otoq tijin wen, Isaí tb'i. Aju xinaq lu attoq wajxaq tky'ajal ex kyxol qe jlu at jun David tb'i.
13Aqeju ox tky'ajal Isaí mas tij otoq che'x tuj q'oj tuk'il Saúl; aju nej k'wa'l, Eliab tb'i, atzunju tkab'in, Abinadab tb'i ex atzunju toxin, Sama tb'i.
14Ate David ch'i'p. Ex qeju ox ttzik otoq che'x lpe' ti'j Saúl.
15In xi ajtoq David jatum kykub'sa'n qe t-soldad Saúl, ex in aj meltz'aj tuj Belén tu'n t-xi' pastoril kyi'j qe t-ẍne'l tman.
16Atzunju xjal aj Filisteo kukxtoq in yolin tkyaqil prim ex tkyaqil qale tu'n kytzaj aj Israel q'ojlel tuk'il, ex tuj enter 40 q'ij o yolin ikju.
17At jun q'ij xi tma'n Isaí te David aju tky'ajal:
—Txi'ya max tuj campament kye soldad, q'inxa jwe' almi triw tx'ilsa'maj tuk'ix laj pan ex q'onxa kye ttzika.
18Ax ikx q'inxa laj kyes, b'ix txi tq'o'na te nejenel kye jun mil soldad, ex b'in b'aja tza'n ate' qe ttzika, ex q'intza tqanil wuk'ile tu'ntzun nb'inteye qa b'a'n ate', chi Isaí.
19Atzunte Saúl ex qe ttzik David, kyuk'ix kykyaqil xjal aj Israel, atzun ate'toq tuj chq'ajlaj Ela tb'i tu'n kyq'ojin kyi'j aj Filisteo.
20Tuj juntl q'ij primxix wen jaw we' David ex e kyaj toqxenan qe ẍne'l tuj tkwent juntl, xi'tzun ex xi ti'n tkyaqilju nik'b'eb'l otoq txi tq'o'n Isaí te. Tejtzun tpon tuj campament, matoq in b'aj kytxolb'an kyib' soldad tu'n kyxi' q'ojlel, ex in jawtoq tq'ajq'ajel kywi' wen tu'n ttzyet q'oj kyu'n.
21B'ajtzun kytxolb'an kyib' aj Israel ex aj Filisteo tu'n kyq'ojin. Qe aj Israel e kub' ten tuj jun pak', atzun kye aj Filisteo e kub' ten tuj juntl pak'.
22Atzunte David kyaj tq'o'n ju nik'b'eb'l q'i'n tu'n tuj tkwent ju kwentil kye makb'il in che ajb'en tuj q'oj ex wab'j, ex xi qelan jatum ate' qe soldad, ex okx kyxol tu'n t-xi tqanin tza'n ate' qe ttzik.
23Matoq in yolin David kyuk'il qe ttzik tej tetz ju xjal aj Filisteo aju aj Gat, Goliat tb'i, aju at nim tnab'l tu'n tq'ojin; etz kyxol qe soldad ex kyuw xi' kyi'j aj Israel ik tza'nx otoq tma nej. Ex o tb'i David aju o tma Goliat.
24Tej kylonte aj Israel aju xinaq lu, tzaj nim kyxob'il ex e je'l oq twitz,
25ex kyma: ¿Mape kyile aju xinaq ma tz'etz? Ma tzul tu'n qoktz tik'le'n. Qatzun at jun ma kub' xjal lu tu'n, jaku txi tq'o'n rey nim tq'inumab'l, ex jaku txi tq'o'n tme'jel tu'n tok te t-xu'jil, ex aju tman ex qe terman mlay che chojin ti'j chojenj ex mlay che aq'nan ti'j taq'un rey.
26Xitzun tqanin David kye qeju ate' ttxlaj:
—¿Alkye jaku txi q'o'n teju xinaq qa ma kub' ju xjal aj Filisteo tu'n, tu'ntzun mi'n kukx ttzaj kych'ixwi aj Israel tu'n? Ex ¿ti toklen aj Filisteo lu aju mya nimal Dios, tu'nju kukx kyok tik'le'n qe soldad teju Dios itz'?
27Atzun kye xjal xi kyma'n te axju yol otoq kyma nej, alkye tu'n t-xi q'o'n teju xinaq qa ma kub' Goliat tu'n.
28Atzunte Eliab aju ttzik David o tb'i tej tyolin David kyuk'il qe xinaq, tzajtzun tq'oj ti'j ex xi tma'n te:
—¿Ti til saja tzalu? ¿Al uk'il ma che kyaj tq'o'na kab' ox ẍne'l ate' tuj lugar minti' kynajb'il xjal tuj? B'a'n wu'ne aju tnimb'il tib'a ex ju t-ximb'etza mya b'a'n; ma tzula tzalu noq tu'n tke'yina ti'j q'oj.
29Atzunte David xi ttzaq'we'n te:
—¿Alkyetzun ma nb'inchaye ja'lo? Malpe in chin yolin ch'ine.
30Eltzun tpa'n naj tib' ti'j ttzik, ex tej t-xi tqanin kye txqantl xjal, ax yol tzaj kyma'n te ik tza'nx otoq tzaj q'ma'n te nej.
31At junjun o kyb'i tej tyolin David kyuk'il xjal, e je'xtzun q'malte te Saúl; atzunte Saúl xi tma'n tu'n t-xi txokb'aj David.
32Xitzun tma'n David te Saúl:
—Mi jun b'a'n ttzaj b'aj tk'u'j noq tu'n tlaj aj Filisteo lu, porke aqine jun ajb'el teya Tat Rey, chin xe'le q'ojlel tuk'il.
33Atzunte Saúl xi ttzaq'we'n:
—Mlay b'ant tu'n t-xi'ya q'ojlel tjunala tuk'il aj Filisteo lu, porke teya ma tal ku'xuna, atzunte xjal lu atxix tuj tku'xumal ok te soldad.
34Atzunte David xi ttzaq'we'n:
—Aya Tat Rey, tej in chin pastorintoqe kyi'j qe t-ẍne'l nmane, qa at jun b'alun ex qa jun oso in pon tu'n t-xi ti'n jun ẍne'l,
35in chinx lpe'ye ti'j ex nne'l nxk'ayine tuj ttzi', ex ok tok tzoqpaj wi'je, in tzaj ntzyu'ne tjaq' ttzi' ex nno'k npeq'une max okxi tkyim.
36Qa jun b'alun ex qa jun oso, in kub' nb'yo'ne aqine ajb'el teya. Ikxtzun ktela ju aj Filisteo lu wu'ne, aju mya okslal ti'j Dios, tu'nju ma che ok tik'le'n qe t-soldad ju Dios itz'.
37Ate Qman o klonte weye tuj kytzi' qe b'alun ex qe oso, ikxtzun chin kletele tu'n tuj tq'ab' aj Filisteo lu.
Xitzun tma'n Saúl te:
—Txi'ya ex awt Qman txi' tuk'ila.
38Xitzun tq'o'n Saúl t-xb'alun aju in ajb'en tu'n tuj q'oj, tu'n tok ti'j David, ex jax tq'o'n jun pasb'il tuj twi' q'an k'uxb'il ttx'otx'il, ex ok tq'o'n jun tchikyet k'uxb'il te kolb'il te.
39Oktzun tyob'an David aju t-spad Saúl tk'u'j ti'jxi t-xb'alun ex ok ten b'etel, ex tu'nju mya naq'l tu'n kyajb'en tkyaqil jlu tu'n, xi tma'n te Saúl:
—Mlay b'ant nb'ete tu'n tkyaqilju tok wi'je, ex mi naq'l qine.
Eltzun ti'n David tkyaqil jlu ti'j.
40Tzajtzun ti'n tky'aqo'ch, ku'x tuj tq'ab' xaq ex jaw t-sk'o'n jwe' tal ab'j qtz'umin kyi'j, ku'x tq'o'n tuj tpa, ex xi' tuk'ix ju t-xob'l tuj tq'ab' ex pon laq'e' twitz aj Filisteo.
41Atzunte aj Filisteo cheb'a tzaj laq'e' tu'n tul jatum ta' David ex nejni ju onilte twitz.
42Tejtzun tilwaj David tu'n aj Filisteo, ex tej tke'yinte qa jun tal ku'xun ex ju tilb'ilal kyaqyin ke'yin ex puro tb'anil, kyja'tzun el tik'un tu'nju noq ch'in toklen ela tuj twitz,
43ex xi tma'n te:
—¿Baqa tx'yan qine tuj twitza tu'nju ma tzaja tuk'il tze' tu'n tok tzoqpaja wi'je?
Ex ok ten xmayil ti'j David ex xi tqanin kye qe tdios tu'n tkyim David kyu'n.
44Ax ikx xi tma'ntl te David:
—Ttzaja tzalu tu'n t-xi nq'o'ne t-ximlala te kychi k'utz in che lipan twitz kya'j, ex te kychi' qe txkup te tjaq' k'ul.
45Atzunte David xi ttzaq'we'n:
—Ma tzaja wi'je tuk'il spad ex lans, tuk'ix juntl wiq lans ch'in tqan, atzun weye chin okel tzoqpaje ti'ja tuj tb'i Dios aju Tajaw Tkyaqil, aju Kydios qe soldad aj Israel aqeju ma che ok tik'le'na tu'n kyq'ojin tuk'ila.
46Ja'lo ate Dios ktzajel q'onte teya tuj nq'ab'e tu'n tkub' ti'ja wu'ne, ex texju or lu kb'el nb'yo'ne ex k'elel ntx'e'mine twi'ya. Atzun kyximlal soldad aj Filisteo, che kxel nq'o'ne te kychi k'utz in che lipan twitz kya'j ex te kychi txkup te tjaq' k'ul. Kyja'tzun tten tuj tkyaqil twitz tx'otx' k'elel kynik' xjal ti'j qa at jun Dios kyxol aj Israel,
47ex kykyaqil qeju kychmon kyib' tzalu, k'elel kynik' ti'j qa ate Dios mya tu'n spad ex mya tu'n lans in che klet xjal tu'n, porke ate Dios kq'ojl kyi'je, ex axte Dios ktzajel q'onte kyeye tuj qq'ab'e tu'n tkub' kyi'je qu'ne.
48Tzajtzun b'et aj Filisteo tu'n tul ti'j David; ax ikx te David xi qelan naj tu'n tok tzoqpaj q'ojlel ti'j aj Filisteo.
49Ku'xtzun tq'ab' David tuj tal tpa ex jatz ti'n jun tal ab'j ex xi t-xo'n tu'n t-xob'l ti'j aj Filisteo. Atzun ok ab'j tib'aj twitz aj Filisteo, ex b'i'x kyaj q'e't ab'j ex kub' mutzq'aj aj Filisteo twitz tx'otx'.
50Kyja'tzun tten kub' ti'j aj Filisteo tu'n David noq tu'n jun xob'l ex jun tal ab'j, ex b'i'x kyim. Tu'nju minti'toq t-spad David q'i'n,
51xi qelan ttxlaj aj Filisteo ex jatz ti'n t-spad aj Filisteo tuj tjayil; tu'nxju spad lu kub' tb'antzin ex el ttx'emin twi'.
Tejtzun kyke'yinte aj Filisteo otoq kyim ju nejenel kye tuj q'oj, e je'l oq,
52atzun qe soldad aj Israel ex qe aj Judá e jaw sch'in kyuw wen, ex e ok lpe' kyi'j aj Filisteo tu'n tkub' kyi'j kyu'n, max tejxi kypon ttxa'n tnam Gat ex ttzi tlamel tnam Ecrón. Tuj tkyaqil b'e in xi' tuj lugar Saaraim tu'n tpon tuj tnam Gat ex tuj tnam Ecrón, lu kyximlal soldad aj Filisteo tx'ilch kykub', otoq che b'aj kyim.
53T-xilenxitzun kykolin aj Israel tu'n kyok lpe' kyi'j aj Filisteo, e ajtz meltz'aj ex xi kyi'n tkyaqil ti'xti o knet kyu'n tuj campament jatum otoq che kub' ten aj Filisteo.
54Tzajtzun ti'n David aju twi' aj Filisteo ex xi ti'n tuj Jerusalén, atzun qeju ti'xti in che ajb'en te tq'ojb'il e okx tq'o'n tuj tja, xb'alun ja.
55Tej ttil Saúl tej t-xi tzoqpaj David ti'j aj Filisteo, xi tqanin te Abner aju nejenel kye t-soldad:
—Aya Abner, ¿alkye tman q'a lu?
56—Tat Rey, kxel nma'ne jun yol axix tok twitza, minti' ojtzqi'n wu'ne alkye tman q'a lu, chi Abner xi ttzaq'we'n.
—Kxel nq'o'ne tuj tkwenta tu'n t-xi tqanina alkye tman q'a lu, chi rey.
57Kyja'tzun, tej tajtz meltz'aj David tkub'lenxi aj Filisteo tu'n, ex q'i'n twi' aj Filisteo tu'n tuj tq'ab', xi q'i'n David tu'n Abner twitz Saúl,
58ex xi tqanin Saúl te:
—Aya q'a, q'mantza weye alkye tmana.
Xi ttzaq'we'n David:
—Aqine tky'ajal Isaí aju ajb'el teya ex aj Belén.
Who We AreWhat We EelieveWhat We Do
2025 by iamachristian.org,Inc All rights reserved.
