2 Samuel 17 - Mam Huehuetenango New Ortography

Kub' xitj t-ximb'etz Ahitofel tu'n Husai

1Te tib'ajxi jlu xi tma'n Ahitofel te Absalón:

—Q'ontza amb'il weye tu'n tjaw nsk'o'ne kab'laj mil xinaq, ex tujx qonik'an ja'lo chin elexe tu'n tkub' ti'j David wu'ne.

2Oktzun tb'aj tipun ex ok t-sikt wen, chin okel tzoqpaje ti'j tu'n ttzaj t-xob'il wu'ne, ex kykyaqiltzun qe xjal ate' tuk'il che elel oq. Noq o'kx te rey David kb'el nb'yo'ne,

3ex b'i'x che tzajel wi'ne kykyaqil xjal tu'n kyten tuk'ila. Aju teya tajb'il atzun, tu'n tkyim o'kx jun xinaq, tu'ntzun kykyaj ten kykyaqil xjal tuj txub'txaj.

4Aju t-ximb'etz Ahitofel b'a'n ela tuj twitz Absalón ex tuj kywitz kykyaqil qe kytijil xjal aj Israel.

5Ax ikx xi tma'n Absalón tu'n t-xi txokb'aj Husai aju aj Arquitas, tu'ntzun tmante jun te tyol ti'j jlu.

6Tejtzun tpon Husai twitz Absalón, xi tma'n Absalón te:

—Aju t-ximb'etz Ahitofel atzun jlu, ¿okpelo kb'antel qu'n ex qa mi'n? Q'mantz jun teya tyol ti'j jlu.

7Atzunte Husai xi ttzaq'we'n:

—Aju t-ximb'etz Ahitofel ja'lo mya b'a'n ta',

8porke b'a'n tu'na, aju tmana ex qe t-soldad puro kyuw kyk'u'j tuj q'oj, ex pyorlo ja'lo malo tzaj nimxix kyq'oj, ik tza'n in tzaj tq'oj jun ttxu oso te tjaq' k'ul ok in che el q'i'n qe tal. Ax ikx tmana jun xinaq at nim tnab'l tu'n tq'ojin, ex mlay ten kyxol xjal tuj qonik'an ja'lo.

9Ya malo txi tewan tib' tuj jun toy' pik ex qa tuj juntl lugar. Ex qa b'i'x ma che kub' junjun teya t-soldad ok ttzyet q'oj, ex qa at junjun ma kyb'i jlu, oklo kyma kyja': Qe xjal ma che ok lpe' ti'j Absalón ma kub' kyi'j, che chilo.

10Kyja'tzun, kyuk'ixpe qe xinaq kyuw kyk'u'j tuj q'oj ex qe xinaq at nim kyipun ik tza'n tipun jun nintz b'alun, jumajx ktzajel b'aj kyk'u'j tu'n jlu; ex kykyaqil qe aj Israel b'a'n kyu'n, ate tmana ex qe xinaq lepcho'k ti'j, puro kyuw kyk'u'j tuj q'oj.

11Ja'lotzun kxel nq'o'ne jun tconseja: Chmon b'aja kykyaqil xjal aj Israel, ktzajelx qe' tuj Dan tu'n tpon b'aj max tuj Beerseba, porke aju kyajlal xjal lu ik tten ik tza'n ttxa tza'n at ttzi mar, ex twitzelkuya k'okel te nejenel kyxol tuj q'oj.

12Jakutzun qo ok tzoqpaj ti'j tmana noq alkyex lugar jatum ta'. Noq minab'en ktzyetel q'oj qu'n kyi'j, tu'nju nimxix qe qb'aj, ex mi jun kyjel anq'in qu'n, mi tmana ex mi qe soldad uk'in tu'n.

13Qa ma pon kyklon kyib' tuj jun tnam, qkyaqil aj Israel qo' kxel qi'n qsaqb'aq ti'j tnam lu, tu'ntzun kyku'tz jawet qe ab'j kyok te muro ti'j, ex che xel qjawo'n kykyaqil ab'j tu'n kypon jawet max tuj tq'ab' xaq, ex mi jun ab'j kyjel ten ma chixin, chi Husai.

14Atzunte Absalón ex kykyaqil aj Israel moje' kyyol qa aju te Husai tconsej mas b'a'n ela twitzju te Ahitofel. (Porke tu'n Qman b'aj ttzaksa'n t-ximb'etz Ahitofel aju otoq tma tuj tumelxix, tu'ntzun tkub' tz'aq ju mya b'a'n tib'aj Absalón.)

15Te tib'ajxi xi tma'n Husai kye pal Sadoc ex Abiatar aju consej otoq txi tq'o'n Ahitofel te Absalón ex kye qe kytijil xjal aj Israel, ax ikx aju te tconsej otoq txi tma'n.

16Xi tma'n kye tu'n t-xi kyma'n naj tqanil te David, tu'n mi'n tkyaj ten David tuj qonik'an lu kytxlaj xajb'il a' tuj lugar minti' kynajb'il xjal tuj, noq o'kx tu'n tik'x jlajxi nima Jordán tu'ntzun mi'n kykub' b'yo'n, mi a David ex mi qe t-soldad.

17Atzun ate'toq Jonatán tuk'ix Ahimaas jatum in jatz jlet twi a' En-rogel tb'i, porke minti' tumel tu'n t-xi kyyek'un kyib' tuj tnam, kyja'tzun noq jun majen xu'j pon q'malte tqanil kye, e je'xtzun naj tu'n t-xi kyma'n te rey David.

18Ex e ilwaj tu'n jun ku'xun, ex xi' naj ju ku'xun q'malte te Absalón. Ex ate Jonatán tuk'ix Ahimaas jurat e ik' naj ex e pon tja jun xinaq at tuj Bahurim, ex e ku'x naj tuj jun jul jatum in jatz a', tkub' ttxa'n pe'n.

19Aju t-xu'jil ju xinaq lu jurat naj kub' tlik'un jun xb'alun te maqsib'l ttzi jul, ex kub' t-sputun triw b'ajumaj tib'aj ju xb'alun tkub' ttzi jul. Kyja'tzun mi jun el tnik' ti'j.

20Tejtzun kypon qe xinaq otoq che'x sama'n tu'n Absalón, xi kyqanin te xu'j:

—¿Jatum ta' Ahimaas tuk'ix Jonatán?

—Atzun ẍe ex tzalu tu'n kypon ttzi nima, chi xu'j xi ttzaq'we'n.

Atzun kye xinaq e je'x jyol kye, ex tu'nju minti'x e knet kyu'n e aj meltz'aj juntl maj tu'n kypon tuj tnam Jerusalén.

21Kyajlenxitzun qe xinaq lu, e jatz Ahimaas tuk'ix Jonatán tuj jul, ex e je'x ojqelan tu'n kypon q'olte tqanil te rey David; ex xi kyma'n te tu'n tik' ex tu'n tik'x naj tuj nima, porke ate Ahitofel otoq b'aj consejarinte kye xjal tu'n kyok tzoqpaj kyi'j.

22Atzunte David kyuk'ix kykyaqil xjal ate' tuk'il e ik' naj ex e ik'x tuj nima Jordán. Ya tej qsqix te juntl q'ij, kykyaqil otoq che ik'x tuj nima.

23Tejtzun tel tnik' Ahitofel ti'j qa minti' otoq txi kyniman xjal ju tconsej otoq txi tma'n, ok tq'o'n t-siy tbur ex aj meltz'aj tja max tuj ttanmi. Tb'ajlenxitzun tma'n kye qeju ate' tuj tja alkye tu'n tb'ant kyu'n, ok tk'alo'n tqul ex jaw tyob'an tib' tu'n tkyim. Kyja'tzun tten kyim Ahitofel, ex ax ku'x maqu'n jatum otoq ku'x maqu'n qtzan tman.

Pon David tuj tnam Mahanaim

24Otoq pon David tuj tnam Mahanaim tej tik'x Absalón tuj nima Jordán kyuk'ix kykyaqil aj Israel.

25Otoq tz'ok tq'o'n Absalón ju xjal Amasa tb'i te nejenel kye soldad te t-xel Joab. Ate Amasa tky'ajal jun xinaq aj Israel Itra tb'i, aju otoq kub' tmojb'an tib' tuk'il ju xu'j Abigail tb'i, aju tme'jel Nahas ex terman Sarvia aju ttxu' Joab.

26Ate Absalón kyuk'ix qe aj Israel, atzun e kub' ten tuj tx'otx' Galaad.

27Tejtzun tpon David tuj tnam Mahanaim, e etz ox xjal kanul ti'j, ex atzun qe jlu: Sobi aju tky'ajal Nahas aju aj Rabá aju ta' tuj tkwent Amón; tuk'ix Maquir aju tky'ajal Amiel aju aj Lodebar; ex tuk'ix Barzilai aju aj Rogelim aju ta' tuj tkwent Galaad.

28Tzaj kyi'n qe pop te kyjaq' xjal, kyuk'ix qe palangan ex qe k'il; ax ikx tzaj kyi'n triw, sebad, arin, triw tx'ilsamaj, xkarbans, tuk'ix jun wiq chenaq' lenteja tb'i,

29tuk'ix ta'l kab', manteca, kyes, ex kyuk'ix qe ẍne'l, tu'ntzun tajb'en te tchi' David ex kyuk'ix qe xjal ate' tuk'il, tu'nju kub' kyximan qa otoq che sikt ex nne'l kyk'u'j ex in txqet ti'j kyk'u'j tu'nju otoq che tzaj tuj lugar minti' kynajb'il xjal tuj.