Hechos 26 - Mam Huehuetenango New Ortography

Aju tkolb'il tib' Pablo twitz rey Agripa

1Xitzun tma'n rey Agripa te Pablo:

—At amb'il teya tu'n tyolina te tkolb'il tib'a.

Atzunte Pablo xi tyek'un tq'ab', oktzun ten yolil te tkolb'il tib', ex tma:

2—In nna'ne jun tzalajb'il, aya tat rey Agripa, tu'n t-xi nma'ne ja'lo aju nkolb'il wib'e twitza ti'j tkyaqilju in kyma'n xjal judiy wi'je.

3Tnejelxix in chin tzalaje porke ojtzqi'n tu'na tkyaqil kycostumr xjal judiy ex aju in yolinjtz kyxol; kyja'tzun chin kub'sale twitza tu'n tten ch'in tpasensa tu'n t-xi tb'i'na nyole.

O yolin Pablo ti'j tza'n tten tchwinqlal nej tej na'nxtoq tokslan

4Kykyaqil xjal judiy ojtzqi'n kyu'n tza'n tten nchwinqlale nej tej matoq ku'xunx qine, tza'nx tej ntene tuj ntanmiye ax ikx tuj tnam Jerusalén.

5Ex b'a'n kyu'n noqwit kyaj tu'n ttzaj kyma'n, atxix ojtxi fariseo we qin, ax in tene kyxol jun k'loj aju mas in japunxix qokslab'l kyu'n.

6Atzun ja'lo, ma chin oke tuj xjel tu'n tlaj ju yol in xi nma'ne, ok che jawil anq'in qe kyimni tu'n Dios, ik tza'nx tzaj ttziyan Dios kye qxe'chel.

7Qe kab'laj k'loj qiyjil in che ayon ti'j tu'n kyk'monte aju tziyimaj tu'n Dios, tokxix tilil kyu'n tu'n kyk'ulun twitz Dios ex tu'n kyajb'en te q'ijl ex qonik'an. Tu'n tlaj q'uql nk'u'je ti'j qa ok che jawitz anq'in qe kyimni tu'n Dios, tu'ntzunju in kyma'n xjal judiy qa at wile, aya tat rey Agripa.

8¿Tiqu'n in kub' kyximane qa mlayx che jaw anq'in qe kyimni tu'n Dios?

O yolin Pablo ti'j tza'n tten e yajlanjtz okslal tu'n nej tej na'nxtoq tokslan

9Ax tok, weye kub' nximane nej alkye tu'n nb'inchanteye, nim in q'ojine ti'j Jesús aj Nazaret;

10b'anttzun wu'ne tuj Jerusalén. Nimku okslal e okx nq'o'ne tuj pres, tu'nju otoq tzaj q'o'n woklene kyu'n qe nejenel kye pal; ex tej kykub' b'yo'n qe okslal kyu'n, ikx weye xi nma'ne qa b'a'n jlu.

11Nimku maj e b'aj nk'ixb'isa'ne kyuj kykyaqil ja te k'ulb'il, ex e ok njwersine tu'n tkyaj kykolin kyokslab'l. Ex tu'nju nimxix nq'oje tzaj kyi'j, inxe yajlal kye kyuj qe tnam najchaq.

Xi tchik'b'a'n Pablo juntl maj tza'n tten ajtz ti'j tanmi ex tza'n tten okslan Hechos 9.1-19; 22.6-16

12In nb'incha'ntoqe jlu, kyja' nxi'ye tuj tnam Damasco, otoq tzaj q'o'n woklene ex otoq tzaj q'o'n orden weye kyu'n qe nejenel kye pal.

13Ex kyja'toq nxi'ye tuj b'e, tat rey, o wile kub' qoptz'aj jun spik'un tzaj tuj kya'j te chilkuq'ij, mas in qoptz'aj twitz t-spik'umal q'ij, kub' qoptz'aj wib'aje ex kyib'aj qeju in che b'et wuk'ile.

14Qkyaqiltzune o kub' tz'aqe twitz tx'otx', ex o nb'iye jun tq'ajq'ajel tzaj tma'n weye tuj yol hebreo chi kyja': Saulo, Saulo, ¿tiqu'n in chin b'aj tyajla'na? Tu'nx tib'a in b'aj tk'ixb'isan tib'a ik tza'n jun wakẍ nne'tz t-xajo'n puy, chi weye.

15Atzun weye xi nma'ne te: ¿Alkyeya Tat? Atzunte Qajaw tma: Aqine Jesús, aqine in chin b'aj tyajla'na.

16Ex we'ktza porke ma kub' nyek'un wib'e twitza tu'n tok nq'o'na te ajb'el weye ex tu'n toka te testiw ti'j tkyaqilju ma tila ex ti'j ju kxel nyek'untle teya.

17Kkletela wu'ne tuj kyq'ab' qe t-xjalila, ex tuj kyq'ab' txqantl xjal jatum kxel nsama'na ja'lo kyxol.

18Kxel nsama'na tu'n tjaqet kywitz tu'na, tu'n kyetz tuj qlolj ex tu'n kyul tuj spik'un, ex tu'n kyetz tjaq' tipumal Satanás tu'n kyul tuk'il Dios; ex tu'n kyokslan wi'je, tu'ntzun tkub' najset kyil ex tu'n kyk'monte jun etzb'il kyxol qeju pa'nmaj qe tu'n Dios tu'n kyajb'en o'kx te.

Xi tniman Pablo aju tzaj q'ma'n te ik tza'n tuj witzik'

19Kyja'tzun aya tat rey Agripa, xi nnimane aju tzaj q'ma'n weye tej nlonteye aju spik'un tzaj tuj kya'j.

20Tnejelxixtzun xi npakb'a'ne kye qeju ate' tuj Damasco, ax ikx tuj Jerusalén ex tuj tkyaqil tx'otx' Judea, ax ikx kye xjal mya judiy qe, xi nma'ne tu'n tajtz ti'j kyanmi ex tu'n kyul meltz'aj tuk'il Dios, ex tu'n kyb'inchante aju b'a'n tu'ntzun tel nik'b'aj kyi'j qa otoq tz'ajtz ti'j kyanmi.

21Tu'ntzun tlaj jlu in tzaj tzyu'ne kyu'n xjal judiy tuj tja Dios, o kyajb'e tu'n nkub' b'yo'ne kyu'n.

22Ex noq tu'nju onb'il in tzaj tq'o'n Dios weye, kukx wa'l qine ja'lo, in xi nchik'b'a'ne tyol Dios kye kykyaqil, qeju ma' kyoklen ex qeju ch'in kyoklen, minti' in xi nma'ne juntl, noq o'kx aju o kyma t-sanjel Dios ex o tma Moisés,

23kyma qa ilxix ti'j tu'n tkyim ju Crist aju at toklen tu'n Dios, ex qa ate tnejel tu'n tjaw anq'in kyxol kyimni, tu'n tq'onte tqanil kolb'il kye qxjalil ex kye txqantl xjal kyuj txqantl nasyon, chi Pablo.

Xi tma'n Pablo te Agripa tu'n tok te okslal ti'j Crist

24Tejtzun tmante Pablo jlu te tkolb'il tib', jaw tq'ajq'ajel twi' Festo kyuw, ex tma:

—Pablo, ma tz'oka te lok. Tu'nju nim in xnaq'tzana ma tz'oka te lok, chi Festo.

25Atzunte Pablo tma:

—Mya lokwe qin, tat Festo aya ma' toklena, o'kx in xi nma'ne aju yol ax tok ex tuj tumelxix.

26Ex lu rey Agripa lu, tkyaqil jlu b'a'n tu'n, kyja'tzun in qe'xix nk'u'je tu'n nyoline twitz. Porke tuj nnab'le minti' jun minti'wt b'a'n tu'n; porke mya tuj ewaj b'ant jlu.

27¿Oksla'npe kyyol t-sanjel Dios tu'na, aya tat rey Agripa? B'a'n wu'ne oksla'n tu'na.

28Atzunte Agripa xi tma'n te Pablo:

—Tuj tnab'la qa jurat naj jaku chin oke okslal ti'j Crist.

29Ex xi tma'n Pablo:

—Qa jurat naj ex qa yajxi, kuchiwt tu'n toka okslal ti'j Crist ik tza'n weye, ax ikx kykyaqil qeju in che b'in ti'j nyole ja'lo, pero myatzun wajb'ile tu'n kyok k'alete tu'n caden ik tza'n weye.

30Tejtzun tb'aj tma'n Pablo jlu, jaw we' rey tuk'ix gobernador, tuk'ix Berenice ex kyuk'ix qeju q'uql qe'toq kyuk'il.

31Tejtzun kyel laq'e' kyjunalx, e ok ten yolil kyxolx:

—Minti' jun mya b'a'n ma tb'incha xjal lu tu'n tkyim ex qa tu'n tokx tuj pres, che chi.

32Ex tma Agripa te Festo:

—Mawtlo txi tzoqpet ju xjal lu noqwit minti' o tma tu'n tpon twitz tat gobierni tu'n tok tuj xjel, chi rey Agripa.