1Jaw tb'incha'n David qe tja tuj tnam tok tb'i Ttanmi David; ax ikx b'aj tb'incha'n jun lugar jatum tu'n tkub' ten kax k'ub'l tley Dios, ex jaw tb'incha'n jun ja xb'alun tu'n tokx ten kax tuj.
2Atzunte David xi tma'n: O'kx qe aj Leví at kyoklen tu'n t-xi kyi'n kax k'ub'l tley Dios, porke ate Qman jaw sk'onte kye tu'n t-xi kyi'n kax k'ub'l tley ex tu'n kyajb'en te te jumajx.
3Oktzun tchmo'n David kykyaqil aj Israel tuj Jerusalén tu'n tik' laq'b'at kax k'ub'l tley Dios, tu'n tpon tuj lugar otoq b'aj tb'incha'n.
4Ax ikx ok tchmo'n David kykyaqil tiyjil Aarón ex qe aj Leví.
5Qe tiyjil Coat japun jun syent tuk'il winqin kyb'aj, ex aju nejenel kye, atzun Uriel.
6Qe tiyjil Merari japun kab' syent tuk'il winqin kyb'aj, ex aju nejenel kye, atzun Asaías.
7Atzun qe tiyjil Gersón japun jun syent tuk'il 30 kyb'aj, ex aju nejenel kye, atzun Joel.
8Qe tiyjil Elizafán japun kab' syent kyb'aj, ex aju nejenel kye, atzun Semaías.
9Atzun qe tiyjil Hebrón japun 80 kyb'aj, ex aju nejenel kye, atzun Eliel.
10Atzun qe tiyjil Uziel japun jun syent tuk'il kab'laj kyb'aj, ex aju nejenel kye, atzun Aminadab.
11E tzajtzun ttxko'n David qe pal Sadoc ex Abiatar, ax ikx e tzaj ttxko'n junjun aj Leví, ex atzun qe jlu: Uriel, Asaías, Joel, Semaías, Eliel ex Aminadab,
12ex xi tma'n kye: Tu'nju aqeye nejenel kyxol junjun k'loj tiyjil Leví, kyxjansa'n b'aj kyib'e, kyuk'ix qe kyermaniye, tu'ntzun tik' kylaq'b'a'ne kax k'ub'l tley Qman, aju Qdios aj Israel qo', ex tu'n tul kyi'ne tuj lugar b'animaj wu'ne;
13ex tnejel maj mya a qeye e tzaj q'inte kax k'ub'l tley Dios, kyja'tzun kub' qcastiw tu'n Qman, ex tu'nju minti' xi qqanin te alkye mer tumel.
14B'ajtzun kyxjansan kyib' qe pal ex qe aj Leví tu'ntzun tik' laq'b'at kax k'ub'l tley Dios, aju Kydios aj Israel.
15Ex atzun qe aj Leví e tzaj q'inte kax k'ub'l tley Dios, ex kyq'o'n qe tze' kyuj qe argoy ate'k ttxlaj kax ex tzaj kyiqan kax twi kysemil, ik tza'nx otoq kyaj tma'n Moisés, aju q'mamaj te tu'n Qman.
16Ax ikx xi tma'n David kye nejenel kye aj Leví tu'n tjaw kysk'o'n junjun kyerman ex tu'n t-xi q'ot kyoklen tu'n kyb'itzan, ex tu'n kychimb'an kyi'j chnab', kitar, arpa ex qe tal laq k'uxb'il, ex tu'n tok kyq'ajtza'n in che tzalaj wen.
17Atzun kye aj Leví ok kyq'o'n toklen Hemán aju tky'ajal Joel, tuk'ix Asaf aju tky'ajal Berequías, aju at t-xilen tuk'il Hemán; ex kyxol qe tiyjil Merari ok kyq'o'n toklen Etán aju tky'ajal Cusaías, ax at t-xilen tuk'il Hemán ex Asaf.
18Ax ikx ok q'o'n kyoklen juntl k'loj te onil, ax at kyxilen kyuk'il qeju otoq che ok q'o'n tnejel, ex atzun qe jlu: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, tuk'ix Obed-edom ex Jehiel, aqeju xq'uqil ttzi ja.
19Aqeju b'itzal, Hemán, Asaf ex Etán, tuj kykwent ta' tu'n tok kyq'ajtza'n qe tal laq q'an k'uxb'il,
20atzun kye Zacarías, Aziel, Semiramot, Jehiel, Uni, Eliab, Maasías ex Benaía, q'i'mlex kitar kyu'n tu'n tok kyq'ajtza'n tq'ajq'ajel tzinin twi'.
21Atzun kye Matatías, Elifelehu, Micnías, Obed-edom, Jeiel ex Azazías, q'i'ntoq arpa kyu'n tu'n tok kyq'ajtza'n tq'ajq'ajel julin twi' te tmoj kyb'itz qeju in che b'itzan.
22Atzunte Quenanías nejenel kye qe b'itzal aj Leví, ex ax tkyajsa'n te nejenel tu'n tjaw juk'et b'itz, porke attoq nim tnab'l ti'j.
23Atzunte Berequías tuk'ix Elcana, kwentil te kax k'ub'l tley Qman.
24Atzun qe pal Sebanías, Josafat, Natanael, Amasai, Zacarías, Benaía ex Eliezer, atzun qe in che q'ajtzan chun twitz kax k'ub'l tley Dios. Ax ikx kye Obed-edom tuk'ix Jehías, kwentil kax qe.
25Atzunte David kyuk'ix qe tij xjal kyxol aj Israel ex qe nejenel kye jun milchaq soldad, e je'x tja Obed-edom tuk'il nim tzalajb'il q'ilte kax k'ub'l tley Dios.
26Ex tu'nju ate Dios onin kyi'j aj Leví tej tik' laq'b'at kax k'ub'l tley Dios, kyja'tzun xi kyq'o'n wuq tal tor ex wuq tman ẍne'l te chojb'il.
27Ex toktoq jun tkapiẍay David tb'anilxix, ax ikx kye kykyaqil aj Leví, aqeju q'i'n kax kyu'n, ex qe b'itzal, ax ikx te Quenanías aju nejenel ti'j b'itz kyxol qe b'itzal; kykyaqil qe jlu tok kyxb'alun ẍjo'w tb'anilxix, ax ikx toktoq jun tkapiẍay David tb'anilxix b'anin ti'j xb'alun lino.
28Kyja'tzun tten xi kyi'n aj Israel kax k'ub'l tley Dios, in che sch'in tu'n tzalajb'il, ex nno'k kyq'ajtza'n tkach ẍne'l ex chun ex qe tal laq k'uxb'il, tuk'ix kitar ex arpa.
29Tejtzun tpon kax k'ub'l tley Dios tuj tnam tok tb'i Ttanmi David, ate Mical aju tme'jel Saúl etz tke'yin ttzi ventan, ex o til lu rey David in b'ixantoq tuk'il tzalajb'il, ex tzajtzun jun ik'b'il tuj tanmi ti'j David.
Who We AreWhat We EelieveWhat We Do
2025 by iamachristian.org,Inc All rights reserved.
