Isaías 60 - Mam Huehuetenango New Ortography

Aju tajwalil ak'aj tnam Jerusalén

1We'ktza tnam Jerusalén, qoptz'ajxa, porke ma tzul kanun spik'un teya ex in qoptz'aj t-spik'umal Qman tib'aja.

2Ma tz'ok yupj twitz tx'otx' tu'n qlolj, ma che kyaj ten qe nasyon tuj qxopin, atzun teya kqoptz'ajel t-spik'umal Qman tib'aja ex kb'el tyek'un tib' tajwalil tib'aja.

3Che ul qe nasyon tuj t-spik'umala ex che ul qe rey tuj t-spik'umala, mer ik tza'n ok in jawil q'ij.

4Q'in jaw twitza ex ke'yinxa ti'jeleya, kykyaqil xjal in b'aj kychmon kyib' ex che ul tuk'ila. Qe tk'wa'la xinaq ate' najchaq che ul ex qe tk'wa'la xu'j che ul palo'n.

5Oktzun tke'yinteya jlu, kjawil tzalaja ex knojel tuj tanmiya tu'n tzalajb'il; qe tnam ate' ttzi mar tzul kyi'n qe ti'xti tb'anil ex wi'yilxix te teya, ax ikx ktzajel kyq'o'n qe nasyon kyq'inumab'l teya.

6Nim txqan chej camey che ul tuk'ila, max che tzajel tuj tnam Madián ex tuj tnam Efa; che ul kykyaqil aj Sabá iqan q'an pwaq ex storak kyu'n, ex ok kyq'a' tqanil ti'j tajwalil Qman.

7Kykyaqil qe ẍne'l ate' tuj tx'otx' Cedar che okel te teya, qe kyẍne'l aj Nebaiot che ajb'el teya tu'n kykub' tb'yo'na tib'aj altar te Qman ik tza'n jun oyaj in tzalaj ti'j, ex aju tja tb'anilxix ke'yin k'okel mas tb'anilxix tu'n.

8¿Alkye qe jlu in che lipan wen ik tza'n muj ex ik tza'n paloma kyja' kypon tuj kyja?

9Barc qe, kyja' kytzaj junx kyuk'il qe barc te tnam Tarsis, nejni kywitz qe txqantl, q'i'n qe tk'wa'la kyu'n, tzajni qe najchaq tuk'ix q'an pwaq ex saq pwaq at kye, te jun nimb'il tb'i Qman aju Dios Xjan kye aj Israel, aju ok q'onte toklena ma'xix.

10Stranjer xjal qe che jawil b'inchante juntl maj qe muro toksa'n ti'ja ex qe kyrey che ajb'el teya; maske kub' tcastiwoya tu'n Qman tej ttzaj tq'oj ti'ja, ja'lo noq tu'nju t-xtalb'il ma tzaj tz'e'y tk'u'j ti'ja.

11Qe tlamela kukx che kyjel kate'; mi'n che lamet q'ijl ex mi qonik'an, tu'ntzun tul q'i'n kyq'inumab'l qe nasyon te teya ex tu'n kyokx qe rey kyuk'ix qe txqantl kyuk'il uk'in.

12Qa at jun tnam minti' ma tz'ajb'en teya, b'i'x knajel ex che b'ajel xitj qe nasyon.

13Chi Qman te tnam Jerusalén: Aju q'inumab'l at twi witz Líbano tzul tuk'ila: Qe tze' tzaj, qe k'ol ex qe wi'ten che ajb'el tu'n tok njaye tb'anilxix ke'yin, tu'ntzun tjaw nimsa'n ju lugar jatum ax atine.

14Qe kyk'wa'l qeju e yajlante teya che ul twitza ex kb'el kymansin kyib' twitza, ex kykyaqil qeju e el ik'unte teya che b'el ẍmeje' t-xe tqana ex k'okel kyq'o'n tb'iya: “Aju tnam etzan tu'n Qman”, “Aju tnam Sión etzan tu'nju Dios Xjan kye aj Israel”.

15Otoq kyaj kolina nej ex otoq tz'el ik'una ex minti' xjal najl tuja, atzun ja'lo k'okel nq'o'ne te ma' toklena ex tu'n tajb'ena te tzalajb'il te jumajx.

16Tzul kyq'o'n qe nasyon tb'anil wab'j teya ex ktzajel kyi'n qe rey kyq'inumab'l teya, ex atzun k'elel tnik'a ti'j aqine Dios ex Klol teya, aqine Tdios Jacob at nim wipumale ex aqine kolpil teya.

17Te t-xel q'an k'uxb'il, kxel nq'o'ne q'an pwaq teya, ex te t-xel k'uxb'il, kxel nq'o'ne saq pwaq; te t-xel tze', kxel nq'o'ne q'an k'uxb'il, ex te kyxel qe ab'j, kxel nq'o'ne tb'anil k'uxb'il. Che tele tuj txub'txaj wu'ne ex kb'antel aju tz'aqlxix kyu'ne, ex atzun qe jlu che okel ik tza'n jun kawil kyeye.

18Tuj ttx'otx'a mlay b'injtz juntl maj tq'ajq'ajel q'oj kyxol xjal, mlay che naj qe kytanmiya ex mlay che kub' xitj, noq o'kx k'okel tq'o'na tb'i ju muro toksa'n ti'ja: “Colbil” ex k'okel tq'o'na kyb'i qe tlamela: “Aq'b'il chjonte”.

19Mya il ti'j te teya tu'n tjawil t-spik'umal q'ij, mi t-spik'umal xjaw te qonik'an, ex ax qine chin okel te spik'un tuja te jumajx, aqine Tdiosa chin okele te t-spik'umala.

20Aju q'ij mlay tz'ex ex mlayx tz'ok yupj xjaw, porke aqine chin okele te t-spik'umala te jumajx, ex qeju q'ij te tb'isa kb'ajel kywi'.

21Kykyaqil xjal ate' tuja che okel te tz'aqlxix ex che okel te tajwil kytanmi te jumajx, porke ik kyten ik tza'n t-xul jun wi' awal ku'x wawa'ne, taq'unb'en nq'ab'e tu'ntzun t-xi nyek'une wajwalile.

22Aju tal b'yuj xjal lu kchmetel kyb'aj tuj milen, ex aqeju noq nik'xi kyb'aj ja'lo che okel te jun nintz nasyon. Aqine Dios, kb'antel naj jlu wu'ne tujxix tq'ijlalil.