1Tejtzun tb'inte Is-boset aju tky'ajal Saúl qa otoq kyim Abner tuj Hebrón, b'i'xtzun tzaj b'aj tk'u'j te jumajx, ex kykyaqil aj Israel tzaj nim kyxob'il.
2Attoq kab'e xinaq in che ajb'entoq te Is-boset, ex nejenel qe jlu kye txqan soldad eleq' qe. Baana tb'i jun, ex atzun juntl Recab tb'i, tky'ajal Rimón qe jlu aju aj Beerot, ex tiyjil Benjamín qe porke aju tnam Beerot toktoq tuj kykwent qe tiyjil Benjamín,
3ex otoq che ex oq qe xjal ate' tuj tnam Beerot tu'n kypon tuj Gitaim, ex atzun e najan ik tza'n b'etin xjal qe, ax ikx ja'lo.
4Ex ate Jonatán aju tky'ajal Saúl attoq jun tky'ajal, Mefi-boset tb'i, ex koxtoq qe tqan. Matoq jwe' ab'q'i Mefi-boset tej ttzaj jun xjal tuj Jezreel q'malte tqanil qa otoq che kyim Saúl tuk'ix Jonatán. Tzajtzun q'i'n Mefi-boset tu'nju xu'j kwentil te ex el oq tuk'il, ex tu'nju in qelan wen tej tel oq, el tz'aq Mefi-boset tu'n, ex tu'ntzun jlu b'i'x ok te kox.
5Atzunte Recab tuk'ix Baana aqeju tky'ajal Rimón aju aj Beerot, e je'x tu'n kypon jatum ta' tja Is-boset, ex atzun e pon tuj or tej at nimtoq ta'w kyaq, ex matoq in tan Is-boset tb'ajlen wa'n.
6Aju xu'j xq'uqil ttzi ja otoq tz'ok ten saqsal tuj triw, ex te tib'ajxi ik' tan, kyja'tzun tten e okx Recab tuk'ix Baana aju terman, ex mi a'l jun o ke'yinte kye.
7Tej kyokx tuj ja, lutoq Is-boset in tan twi twatb'il tuj cuart jatum in tan; kub'tzun kyb'yo'n ex el kytx'emin twi', ex te tib'ajxi jlu xi kyi'n twi', ex tuj enter aq'b'il e b'et tuj b'e tuj lugar Arabá tb'i,
8tu'ntzun t-xi kyq'o'n te David, tu'nju atzun ta'toq David tuj tnam Hebrón. Ex xi kyma'n te kyja':
—Tat Rey, lu twi' Is-boset lu, aju tky'ajal Saúl, aju aj q'oj ti'ja ex ok tilil tu'n tu'n tkyima tu'n. Ex ja'lo ma tzaj tq'o'n Qman amb'il tu'n t-xelin tu'na ti'j Saúl, ex kyi'j qe tiyjil.
9Xitzun ttzaq'we'n David kye:
—Kxel nma'ne jun yol axix tok twitz Qman aju ma chin klete tu'n tuj tkyaqil xob'ajil,
10tej tpon jun xjal wuk'ile, tuj twitz qa jun b'a'n tqanil tu'n ttzaj tq'o'n weye, pon q'malte qa otoq kyim Saúl, ex tu'nju tqanil lu b'i'x tzyet wu'ne ex kub' nb'yo'ne tuj tnam Siclag.
11Tu'n jlu ax kb'antel wu'ne kyi'je aqeye b'inchal mya b'a'n, tu'nju ma kub' kyb'yo'ne jun xinaq minti' til tej matoq in tan tuj tex tja. Kyja'tzun kchjetel kyu'ne tu'nju ma kub' kyb'yo'ne Is-boset. Che najele wu'ne tu'n mi'n kytentle twitz tx'otx'.
12Xitzun tq'o'n David orden kye qeju at kyoklen ttxlaj, ex kyu'ntzun qe jlu e kub' b'yo'n; el kytx'emin qe kyq'ab' kyuk'ix qe kyqan, ex e jaw kyyob'an jatum ta' nintz pil tuj tnam Hebrón. Te tib'ajxi tzaj kyi'n twi' Is-boset ex ku'x kymaqu'n tuj Hebrón, tujx tpantyón Abner.
Who We AreWhat We EelieveWhat We Do
2025 by iamachristian.org,Inc All rights reserved.
