Colosenses 3 - Mam Huehuetenango New Ortography

1Tu'nju ma che jaw anq'ine tuk'il Crist, kyq'o'nk kyximb'etze ti'j ju at tuj kya'j, jatum ta' Crist q'uql ttxlaj Dios tuj b'anq'ab'aj.

2O'kx che ximane ti'j ju at tuj kya'j, mya aju at twitz tx'otx'.

3Porke o che kyime, ex aju kychwinqlale ewan junx tuk'il Crist tuj tkwent Dios.

4Oktzun tyek'unte tib' Crist, aju q'ol kychwinqlale, ax ikx kyeye ok che yek'etele junx tuk'il tu'n kytene tuk'il tuj tajwalil.

Aju ojtxi qchwinqlal ex aju ak'aj qchwinqlal tu'n Crist

5Kyja'tzun, kytzoqpinkje tkyaqilju mya b'a'n in kyb'incha'n xjal: Aju yaẍb'il, ex ju ttz'ilil, tuk'ix ju achb'il mya b'a'n, tuk'ix ju kyajb'ile mya b'a'n, tuk'ix ju in pon kyk'u'je ti'j nimku; junx ta' jlu ik tza'n in che k'ulune kywitz qe tilb'ilal.

6Tu'n tlaj tkyaqil jlu in tzaj tq'oj Dios kyi'j qe xjal mib'an che b'in; ma'xix jun castiw tzul kyi'j.

7Ik tza'n kyeye, o kyb'inchaye tkyaqil jlu ojtxi tej ate'xtoqe tuj.

8Atzun ja'lo kyq'onkje tkyaqil jlu: Mi'n che q'ojine, mi'n tzaj tlo'ch kyk'u'je, mi'n kyb'inchaye mya b'a'n, mi'n che yasune, mi'n che yoline ti'j tk'ayil yol.

9Mi'n che nik'ane yol kyxolxe, porke ma tz'el kykotpi'ne aju ojtxi kytene tuk'ix ju ojtxi kyb'inchb'ene.

10Ex ma tz'ok kyq'o'ne ju ak'aj kytene kukx tu'n kyoke te ak'aj, ik tza'n tilb'ilal Dios aju ch'isal kyeye, ex tu'n telxix kynik'e ti'j.

11Tu'ntzun jlu, mya part kyxilen xjal griego mi xjal judiy, mya part xjal sircunsidarin mi xjal mya sircunsidarin, mya part jun xjal te junxitl tnam najchaq mi qeju xjal minti'x ch'in b'a'n kyu'n, mya part kyxilen qe majen tzyu'n ex qe xjal tzoqpi'n, noq o'kxte Crist tib'aj tkyaqil ex at quk'il qkyaqil.

12Q'aq'anx kyk'u'je ti'j juntl, kyb'inchame xtalb'il, mi'n jaw kyniman kyib'e, che oke mans, ten kypasense; kyb'inchame jlu porke k'ujla'n qeye tu'n Dios ex sk'o'maj qeye tu'n, tu'n kyoke tekuxix.

13Tzik'x kyu'ne aju kypaltil junjuntl, kynajsam kyile kyxolxe qa at jun at tyol ti'j juntl; ik tza'n te Crist kub' najsa'n kyile tu'n, ax ikx kyeye tu'n kyb'inchanteye ikju.

14Ex aju mas il ti'j twitz tkyaqil jlu, tu'n tten kyk'ujlalile, porke tu'ntzun jlu qtzuylaj qib' qkyaqil.

15Awt Dios kawin tuj kyanmiye tu'n tten kymojb'ab'l kyib'e, porke o che txkonjtze tu'n tten jun mojb'ab'l tib' kyxolxe; ex kyq'onxe chjonte te Dios.

16Nojxwit kyanmiye tu'n tyol Crist. Kyxnaq'tzam kyib'e ex kyq'onxe kynab'le kyxolxe, tenxix kynab'le ti'j jlu. Kyb'itzanxe b'itz, tuk'ix salmo, tuk'ix b'itz te Dios, ex kyq'onxe chjonte te Dios tuj kyanmiye.

17Ex tkyaqilju in kyb'incha'ne ex in kyma'ne, kyb'inchame tkyaqil ik tza'n tajb'il Qajaw Jesús, ex kyq'onxe chjonte te Qman Dios noq tu'n Jesús.

Tza'n tten tu'n qanq'in kyxol quk'il

18Aqeye xu'j, kynimanxe kychmile, atzun jlu il ti'j porke okslal qeye ti'j Qajaw.

19Aqeye chmilb'aj, kyk'ujlam kyxu'jile ex mi'n che yoline kyuw kye.

20Aqeye k'wa'lb'aj, kynimanx kymane tuj tkyaqil, porke in tzalaj Qajaw ti'j jlu.

21Aqeye mamb'aj, mi'n tz'ok kyik'le'ne kyk'wa'le, tu'ntzun mi'n tb'aj kyk'u'j.

22Aqeye majen, kukx tu'n t-xi kynimane kypatrone ate' twitz tx'otx', mi'n che ajb'ene noq tu'nju at jun to'yil kyeye ik tza'n qeju in che ximan ti'j o'kx tu'n kytzalaj xjal kyi'j; noq o'kx che ajb'ene tu'n tkyaqil kyk'u'je, tu'nju in che xob'e twitz Dios.

23Ex tkyaqilju in kyb'incha'ne, kyb'inchame tu'n tkyaqil kyanmiye, ik tza'n te Qajaw in che ajb'ene ex mya kye xjal.

24Porke b'a'n kyu'ne, ktzajel tq'o'n Qajaw jun etzb'il kyeye te t-xel kyajb'eb'le, porke te Crist in che ajb'ene, atzun mer Qajaw.

25Aju in b'inchan mya b'a'n ti'j juntl, axju mya b'a'n ok tk'ma' te t-xel ju tb'inchb'en, porke minti' in tke'yin Dios ti t-xilen xjal.