1Nimanxwit te Qman.
Kynimsa'n jawe tb'i Qman; kynimsa'n jawe, aqeye tmajen,
2aqeye ate' tuj tja Qman ex ate'ye ttxa'n pe'n twitz tja Qman Dios.
3Kynimsa'n jawe Qman porke b'a'n te; kyb'itzanxe qe b'itz te nimb'il tb'i tu'nju at xtalb'il tuk'il.
4Porke tu'n e jaw t-sk'o'n qe tiyjil Jacob, aqeju aj Israel qe, tu'n kyok te tekuxix.
5B'a'n wu'ne ma'xix toklen Qman Dios kywitz kykyaqil qe tilb'ilal nno'k kydiosin xjal.
6In tb'incha'n Qman tkyaqil noq alkye tajb'il, tza'nx tuj kya'j ax ikx twitz tx'otx', tza'nx tuj mar ax ikx max t-xe'pun.
7In jaw jlet muj tu'n max ttxa'npun tx'otx', in tzaj tq'o'n xle'laj kya'j junx tuk'il jb'al, ex nne'tz ti'n kyq'iq' tuj tkub'il.
8Tu'n e kub' tb'yo'n kykyaqil qe nej kyk'wa'l aj Egipto ex qe nej kyal alumaj.
9Tuj tnam Egipto tb'incha qe techal ex qe b'inchb'en ma'xix kyipumal ti'j rey Faraón ex kyi'j qe xjal at kyoklen ttxlaj.
10E naj nimku nasyon tu'n, e kub' tb'yo'n qe rey nimxix kyipumal:
11O kub' Sehón aju rey kye aj Amorreo, tuk'ix Og aju rey tuj tx'otx' Basán, ex kyuk'ix kykyaqil qe rey tuj Canaán;
12ex xi tq'o'n kytx'otx' qe rey lu te kyetzb'il aj Israel, aqeju etzan tu'n.
13Nman, ktel tb'iya te jumajx; kukx ktzajel na'n tb'iya kyu'n kykyaqil k'loj xjal.
14In xi tb'incha'n Qman kyi'j qe xjal etzan tu'n; at tq'aq'b'il tk'u'j kyi'j qe tmajen.
15Qe tilb'ilal nno'k kydiosin xjal mya okslal ti'j Dios, q'an pwaq ex saq pwaq kytx'otx'il, aqe jlu tb'inchb'en kyq'ab' xjal qe.
16At kytzi', ex mib'an che yolin; at tb'aq' kywitz, ex mib'an che ke'yin;
17at kyẍkyin, ex mib'an che b'in; ex minti' kyxew in jatz.
18Aqeju b'inchal kye ikx kyten ik tza'n qe tilb'ilal lu, ax ikx qeju in qe' kyk'u'j kyi'j.
19Aqeye aj Israel, kynimsa'n jawe tb'i Qman, aqeye tiyjil Aarón, kynimsa'n jawe tb'i Qman,
20aqeye aj Leví, kynimsa'n jawe tb'i Qman; aqeye in che niman te Qman, kynimsa'n jawe tb'i.
21Nimanxwit tb'i Qman tuj tnam Sión, aju Qman najl tuj Jerusalén.
Nimanxwit te Qman.
Who We AreWhat We EelieveWhat We Do
2025 by iamachristian.org,Inc All rights reserved.
