Filipenses 2 - Mam Huehuetenango New Ortography

Kub' tmansin tib' Crist, kyja'tzun ma jaw nimsa'n

1Kyja'tzun, qa ma tzaj q'o'n kynab'le tu'n Crist, ex qa ma q'uqb'anjtz kyk'u'je tu'n tk'ujlalil, ex qa at kymojb'ab'l kyib'e tuk'il Xewb'aj Xjan, ex qa at kyk'u'je ti'j juntl ex qa in q'aq'an kyk'u'je ti'j juntl,

2kytzalajsame nk'u'je, junxwit kynab'le, junxwit kyk'ujlalile kyxolxe, junxwit kyximb'etze, mojl taq'pon kyu'ne kykyaqile.

3Mi'n kyb'inchaye jun ti'xti tuk'il q'oj, ex mi'n jaw kyniman kyib'e, noq o'kx tu'n tkub' kymansin kyib'e, teyle junjun b'a'n tu'n t-ximan kyi'j txqantl okslal qa at mas kyoklen twitz.

4Teyle junjun mya noq o'kx tu'n tok tq'o'n tkwent ti'j aju at tajb'en te, ax ikx tu'n tok tq'o'n tkwent ti'j aju at tajb'en kye txqantl.

5Junxwit kyximb'etze ik tza'n t-ximb'etz Jesucrist.

6Ate Crist junx ta' ik tza'n Dios, ex minti' kub' t-ximan tu'n mi'n tkyaj ttzoqpi'n toklen ik tza'n Dios,

7noq o'kx kyaj ttzoqpi'n toklen, ok tq'on tib' te majen, ex ok ik tza'n qe xjal.

8Tejtzun tok ik tza'n xjal, mas kub' tmansin tib', xi tniman tajb'il Dios, ex xi tq'on tib' tu'n tkyim, maske atzun tu'n tkyim twitz crus.

9Kyja'tzun, mas jaw nimsa'n tu'n Dios tib'aj tkyaqil, ex ok tq'o'n Dios jun tb'i mas ma' t-xilen twitz kyb'i kykyaqil,

10tu'ntzun kykub' ẍmeje' kykyaqil k'ulul twitz Jesús ok kyb'inte aju tb'i, tza'nx qeju ate' tuj kya'j, ikx qeju ate' twitz tx'otx', ex qeju ate' tjaq'xi tx'otx';

11ex tu'n kymante kykyaqil: Ax tok ate Jesucrist Qajaw, tu'ntzun tjaw nimsa'n tb'i Qman Dios.

Qe okslal ik kyten ik tza'n jun spik'un kyxol xjal

12Kyja'tzun erman, aqeye at nk'u'je kyi'je, kukx in xi kynimane nyole; ik tza'n xi kynimane tej ntene kyuk'ile, ax ikx ja'lo kukx t-xi kynimane mi a'l qine kyuk'ile. Japunx kyu'ne aju in tma'n kolb'il kyeye, atwit tchi Dios tuj kywitze tu'n kyxob'e twitz.

13Porke ate Dios in aq'nan tuj kyanmiye tu'n tten kyganiye ti'j ju tajb'il ax ikx tu'n kyb'inchanteye.

14Ok tb'ant noq alkyexku kyu'ne, mi'n txi' jun kyyole ti'j juntl ex mi'n tzaj jun yol kyxole,

15tu'n kytene minti' kypaltile ex tu'n kytene minti' jun mya b'a'n tuj kyximb'etze, noq o'kx tu'n kyoke te tk'wa'l Dios minti' ch'in tz'il kyi'je kyxol qe xjal mya b'a'n qe ex mib'an che b'in. Ik kytene ik tza'n qe che'w in che qoptz'aje kyxol xjal ate' tuj qlolj.

16Kymanxe ju yol te chwinqlal kye, tu'ntzun ntzalaje tuj tq'ijlalil ok tul Crist, qa mya noqx gan otoq tz'ok tilil wu'ne ex mya noqx gan otoq chin aq'nane.

17Maske chin kyime tu'n tlaj taq'un Crist, pero in chin tzalaje ti'j, porke jun oyaj jlu in xi nq'o'ne te Dios junx tuk'il ju kyoyaje. Aju kyoyaje in xi kyq'o'ne atzunju, kyajb'eb'le te Dios noq tu'n kyokslab'le. Kyja'tzun junx in chin tzalaje kyuk'ile kykyaqile.

18Ax ikxtzun kyeye che tzalajxe ex che tenxe alegr junx wuk'ile.

Timoteo ex Epafrodito

19Qa ik tajb'il Qajaw Jesús, ximan wu'ne tu'n t-xi nsama'n naje Timoteo kyuk'ile, tu'ntzun tqe' nk'u'je ok nb'inteye tqanil kyi'je.

20Porke minti' juntl at wuk'ile ik tza'n te Timoteo, at tk'u'j kyi'je tu'n tonin kyuk'ile.

21Porke kykyaqil o'kx nno'k tilil kyu'n ti'j ju at tajb'en kye, ex mya ti'j ju tajb'il Jesucrist.

22Porke ojtzqi'n kyu'ne tza'n tten tz'aq'nan Timoteo, ik tza'n jun k'wa'lb'aj in ajb'en te tman, ikxtzun ma tz'ajb'en Timoteo wuk'ile tu'n tpakb'anjtz tqanil kolb'il.

23Kyja'tzun ximan wu'ne tu'n t-xi nsama'ne Timoteo kyuk'ile, ex nej tu'n nb'inteye tza'n ta' nkawse.

24Ex q'uql nk'u'je ti'j Qajaw, ax ikx weye chin pol naje kyuk'ile.

25Pero ma kub' nximane qa il ti'j tu'n t-xi nsama'ne Epafrodito kyuk'ile aju wermaniye ex in onin wuk'ile tuj aq'untl, ex soldad junx wuk'ile; atzun kysanjele ex ajb'el weye ti'j ju at tajb'en weye.

26Ex nimxix o tajb'e tu'n t-xi' ke'yil kyeye kykyaqile, ex nimxix tzaj tb'is tu'nju otoq kyb'iye qa otoq yab't.

27Ax tok o yab't, ch'ixmi o kyim; pero tzaj q'aq'an tk'u'j Dios ti'j, mya o'kx ti'j tzaj q'aq'an tk'u'j Dios, ikx wi'je, tu'ntzun mi'n ttzaj mastl nb'ise.

28Kyja'tzun kxel nsama'n naje, tu'ntzun kytzalaje ok kylonteye juntl maj twitz ex tu'n tel ch'in nb'ise.

29Kyk'momtzune tu'n tkyaqil tzalajb'il tu'nju okslal ti'j Qajaw, ex kyk'ujlame qeju ik kyten ik tza'n te;

30ex ch'ixmi xkyim tu'nju in ajb'en tuj taq'un Crist, xi toyin tib' tu'n tkyim tu'n tul ti'n ju onb'il weye, aju minti' tumel tu'n kyule q'ol te.