Romanos 16 - Mam Huehuetenango New Ortography

In che'x tq'olb'e'n Pablo teyle junjun okslal

1B'ix kyile ch'in erman Febe, aju diaconisa kyxol okslal tuj tnam Cencrea.

2Kyk'mome tuj tb'i Qajaw, ik tza'nx in b'ant kyxol okslal, ex che onine tuk'il ti'j ju at tajb'en te; porke ate o tz'onin kye nimku, ax ikx o tz'onin weye.

3Kyq'onxe nq'olb'eb'le te Priscila ex te Aquila, aqeju wuk'ile tuj taq'un Jesucrist,

4ch'ixmi ẍe kub' b'yo'n tu'n nklete kyu'n; tu'ntzunju in xi nq'o'ne chjonte kye, mya o'kx qine, ax ikx kykyaqil okslal ate' tuj junjun tnam kyxol xjal mya judiy qe.

5Ax ikx kyq'onxe nq'olb'eb'le kye okslal nno'k kychmon kyib' tuj tja Priscila ex Aquila. Ex kyq'onxe nq'olb'eb'le te Epeneto, aju at nk'u'je ti'j, tnejel okslal ti'j Crist tuj lugar Acaya.

6Kyq'onxe nq'olb'eb'le te Mariy, aju o tz'aq'nan nim kyxole.

7Kyq'onxe nq'olb'eb'le te Andrónico ex te Junias, nxjalile qe jlu, ex junx e ten wuk'ile tuj pres, at kyoklen kyxol apostol, ex nej e okslan qe ti'j Crist nwitze.

8Kyq'onxe nq'olb'eb'le te Amplias aju at nk'u'je ti'j porke okslal ti'j Qajaw.

9Kyq'onxe nq'olb'eb'le te Urbano, aju quk'il tuj taq'un Jesucrist, ax ikx kyq'onxe nq'olb'eb'le te Estaquis, aju at nk'u'je ti'j.

10Kyq'onxe nq'olb'eb'le te Apeles, atzun jun okslal ti'j Crist wa'lxix. Kyq'onxe nq'olb'eb'le kye qeju ate' tuj tja Aristóbulo.

11Kyq'onxe nq'olb'eb'le te nxjalile Herodión. Kyq'onxe nq'olb'eb'le kye qeju ate' tuj tja Narciso, okslal qe ti'j Qajaw.

12Kyq'onxe nq'olb'eb'le kye erman xu'j Trifena ex Trifosa, aqeju in che aq'nan tuj taq'un Qajaw. Kyq'onxe nq'olb'eb'le te erman xu'j Pérsida, aju at nk'u'je ti'j, aju nim o tz'aq'nan tuj taq'un Qajaw.

13Kyq'onxe nq'olb'eb'le te Rufo, kyxol kykyaqil atzun jun mejor okslal ti'j Qajaw, ex kyq'onxe nq'olb'eb'le te ttxu', ik tza'n ax ntxu'ye.

14Kyq'onxe nq'olb'eb'le te Asíncrito, te Flegonte, te Hermas, te Patrobas, te Hermes ex kye qe erman ate' kyuk'il.

15Ex kyq'onxe nq'olb'eb'le te Filólogo, te Julia, te Nereo ex te tanb', te Olimpas ex kye kykyaqil okslal ate' kyuk'il.

16Kyq'olb'em kyib'e kyxolxe ex kytz'ub'an el kywitze tuk'il tkyaqil kyk'ujlalile. In che'x q'olb'e'ne kyu'n kykyaqil okslal tuj junjun tnam etzan qe tu'n Crist.

17In chin kub'sane kywitze erman, tz'elx kynik'e kyi'j qeju in che el pa'nte kye okslal ex in kub' kyq'o'n jun tolsab'l tu'n kyjaw tolje ti'j; aju in kyb'incha'n mya ik tten ik tza'n ju xnaq'tzb'il ma kyk'ame; kypa'mil kyib'e kyi'j qe jlu.

18Porke qe xjal lu minti' in che ajb'en te Qajaw Jesucrist, noq o'kx in kyb'incha'n aju in pon kyk'u'j ti'j, in kub' kysb'u'n qeju noq ch'in kynab'l, tu'nju kye che xmoxin ex mejor tb'inx kyyol.

19Atzun kyeye, kykyaqil xjal ma kyb'i kyi'je ma txi kynimane tyol Dios; kyja'tzun in chin tzalaje kyi'je; ex wajb'ile tu'n kyoke aj nab'l tu'n kyb'inchanteye aju b'a'n, ex mya tu'n kyb'inchanteye aju mya b'a'n.

20Ex aju Dios q'olte qmojb'ab'l qib', jurat naj kb'el pach'u'n Satanás tjaq' kyqane tu'n. Aju t-xtalb'il Qajaw Jesucrist tenwt kyuk'ile.

21In che'x q'olb'e'ne tu'n Timoteo aju wuk'ile tuj aq'untl, ex tu'n Lucio, ex tu'n Jasón, ex tu'n Sosípater; nxjalile qe jlu.

22Aqine Tercio tz'ib'alte ju u'j lu, in che'x nq'olb'e'ne tuj tb'i Qajaw.

23In che'x q'olb'e'ne tu'n Gayo, aju q'ol nposadiye ex q'olte ja jatum nno'k k'ulb'il kyu'n okslal. In che'x q'olb'e'ne tu'n Erasto, aju k'u'l pwaq te tnam, ex tu'n qerman Cuarto.

24[Aju t-xtalb'il Qajaw Jesucrist tenwt kyuk'ile kykyaqile. Ikxwitju.]

In jaw tnimsa'n Pablo tb'i Dios

25Chjonte te Dios at tipumal tu'n kywe'xixe tu'n, ik tza'nx aju tqanil kolb'il in xi npakb'a'ne, aju in pakb'anjtz ti'j Jesucrist. Atzunju yol lu ma tzaj tyek'un Dios, aju k'u'ntoq tu'n tuj ewaj atxix tej na'nxtoq tb'ant twitz tx'otx',

26atzun ja'lo ma tzaj tyek'un aju yol lu, aju kyaj kytz'ib'an qe t-sanjel Dios, ma tzaj yek'un ju yol lu ja'lo kye kykyaqil xjal, tu'n t-xi kyniman ex tu'n t-xi kyoksla'n, ik tza'nx ju mandamyent o tma Dios, ate Dios at te jumajx.

27O'kx te Dios at tnab'l. Nimanxwit ju tb'i te jumajx noq tu'n Jesucrist. Ikxwitju.