1 Reyes 4 - Mam Huehuetenango New Ortography

Aju tkawb'il Salomón

1Ok Salomón te rey kye kykyaqil aj Israel.

2Ex qe xjal ma' kyoklen e ok ttxlaj, atzun qe jlu: Azarías aju pal, tky'ajal Sadoc;

3Elihoref ex Ahías, tky'ajal Sisa qe jlu ex aj tz'ib'al qe; atzunte Josafat aju tky'ajal Ahilud, aj tz'ib'al te rey;

4atzunte Benaía aju tky'ajal Joiada, nejenel kye soldad; atzunte Sadoc tuk'ix Abiatar, pal qe;

5atzunte Azarías aju tky'ajal Natán, nejenel kye qe gobernador; atzunte Zabud aju tky'ajal pal Natán, q'ol tconsej rey ti'j tnab'l;

6Atzunte Ahisar, mayordom tuj tja rey, ex atzunte Adoniram aju tky'ajal Abda, nejenel ti'j aq'untl in b'ant kyu'n xjal lajwers.

7Ok tq'o'n Salomón kab'laj gobernador kyxol kykyaqil aj Israel, ex aju kyaq'un atzun, tu'n ttzaj kyi'n tkyaqilju at tajb'en te rey ex kye qeju ate' tuj tja. Teyle junjun kye il ti'j tu'n ttzaj ti'n tkyaqil aju at tajb'en te rey jun xjaw tuj ab'q'i.

8Ex atzun qe kab'laj gobernador jlu:

Ate Ben-hur, tuj tkwent ta' tiwitz tx'otx' kye aj Efraín;

9Atzunte Ben-decar, tuj tkwent ate' qe tnam lu: Macaz, Saalbim, Bet-semes, Elón ex Bet-hanán;

10atzunte Ben-hesed, tuj tkwent ta' tnam Arubot, ax ikx tnam Soco ex tkyaqil tx'otx' Hefer;

11atzunte Ben-abinadab, tuj tkwent ta' tkyaqil tx'otx' te tnam Dor, ex aju t-xu'jil Ben-abinadab, Tafat tb'i, aju tme'jel Salomón;

12atzunte Baana aju tky'ajal Ahilud, tuj tkwent ate' qe tnam Taanac, Meguido ex tkyaqil Bet-seán aju tkub' junx tuk'il Saretán, max tjaq'xi Jezreel, tzajnix tuj Bet-seán, ponin b'aj max tuj Abel-mehola max ti'jxi Jocmeam;

13atzunte Ben-geber, tuj tkwent ta' tnam Ramot aju at tuj Galaad, kyuk'ix qe aldey te Galaad, aqeju ate'toq tuj tkwent Jair aju tky'ajal Manasés, ax ikx ju tx'otx' Argob aju attoq tuj Basán, jatum ate'toq 60 nmaq tnam tok muro kyi'j, ex qe pasador kyi'j kylamel puro q'an k'uxb'il qe;

14atzunte Ahinadab aju tky'ajal Ido, tuj tkwent ta' tnam Mahanaim;

15atzunte Ahimaas, aju jaw moje' tuk'il Basemat aju tme'jel Salomón, tuj tkwent ta' kytx'otx' tiyjil Neftalí;

16atzunte Baana aju tky'ajal Husai, tuj tkwent ta' kytx'otx' tiyjil Aser ex ju tnam Alot;

17atzunte Josafat aju tky'ajal Parúa, tuj tkwent ta' kytx'otx' tiyjil Isacar;

18atzunte Simei aju tky'ajal Ela, tuj tkwent ta' kytx'otx' tiyjil Benjamín;

19atzunte Geber aju tky'ajal Uri, tuj tkwent ta' tx'otx' Galaad aju tetoq Sehón ttx'otx', aju rey kye aj Amorreo, ex te Og aju rey te Basán. Tuj tkwent junx gobernador ta' tkyaqil tx'otx' lu.

Aju tnab'l Salomón ex ju tq'inumab'l

20Qe aj Judá ex qe aj Israel nimku kyb'aj o ten, mer ik tza'n ttxa tz'a'n ttzi mar. Attoq nim kywa ex kyk'a', ex in che tzalajtoq.

21O kawin Salomón kyib'aj kykyaqil kawb'il tzajx qe' ttzi nima Éufrates, ex pon b'aj max tuj tx'otx' kye aj Filisteo ex max tuj tmojonil Egipto. Chjet chojenj kyu'n qe jlu, ex e kyaj ten tjaq' tkawb'il Salomón tuj tkyaqil tanq'ib'l.

22Tkyaqilju in b'aj tuj tja Salomón teyle junjun q'ij atzun jlu: 60 quintal arin tb'anilxix ex jun syent tuk' winqin quintal arin myaxix tb'anil,

23laj wakẍ ulni kynab'l, winqin wakẍ k'ul kywa, ex jun syent ẍne'l, ex minti' e ok te tajlal tkyaqil txkaj masat ex qe ek',

24porke in kawintoq Salomón kyib'aj qe rey tuj tkyaqil tx'otx' tuj tumlal telex q'ij te nima Éufrates, tzajx qe' tuj lugar Tifsa ex pon b'aj max tuj Gaza. O ten tzalajb'il kyxol kyuk'il qe nasyon ate' ti'jele.

25Akux itz'xtoq Salomón, qe xjal najlqe tuj Judá ex qe aj Israel, tzajx qe' tuj Dan ex pon b'aj max tuj Beerseba, e anq'in tuj txub'txaj, ex teyle junjun ja xjal at tqan uva ex tqan higo tuk'il.

26Ate Salomón attoq 40 mil tchej cabay, teyle junjun tokxsa'n tuj tex tja, aqeju in che ajb'en jawolte carwaj, ex kab'laj mil chej iqal kye soldad.

27Teyle junjun gobernador in tzaj ti'n aju attoq tajb'en te rey Salomón ex te kye qeju in che wa'n tuk'il; in tzaj kyi'n tuj ju xjaw b'animaj ti'j. Tok tilil kyu'n wen tu'n tul kyi'n tkyaqilju at tajb'en.

28Ax ikx in xi kyi'ntoq sebad tuk'ix ttxa triw te kywa chej cabay ex te kywa qe chej iqal iqtz, in xi kyi'ntoq jatum ok txi q'ma'n kye, teyle junjun in xi ti'n ok tpon tq'ijlalil b'animaj ti'j.

29Tzaj tq'o'n Dios nimxix tnab'l Salomón tuk'ix tojtzqib'l, ex aju tnab'l o ten nimxix, mer ik tza'n ttxa tz'a'n at ttzi mar.

30Aju tnab'l Salomón ik' mastl ik tza'n kye aj Egipto ex ik tza'n kye xjal najlqe tuj tumlal tjawitz q'ij.

31Minti' juntl xinaq o ten nim tnab'l ik tza'n te: ten mas nim tnab'l ik tza'n te Etán, aju tiyjil Ezra, ex ik tza'n te Hemán, Calcol ex Darda, aqeju tky'ajal Mahor, ex aju tqanil ti'j pon b'aj kyuj kykyaqil nasyon ate' ti'jele.

32Kub' ttz'ib'an Salomón ox mil tal tqik' yol at tnab'l, ex jun mil tuk' jwe' b'itz.

33Ax ikx o tz'el tnik' kyi'j qe tze' ex kyi'j qe awal, ex xi ttxolb'a'n jlu kye xjal, tzajx qe' kyi'j qe tze' wi'ten ate' twi witz Líbano, ax ikxpe kyi'j qe k'ul in che tzaj ch'iy kyi'j tkajonil ja. Ax ikx o tz'el tnik' kyi'j qe jil, qe jil in che lipan twitz kya'j, qe jil in xi kyjaqu'n kyk'u'j twitz tx'otx' ex qe kyiẍ.

34Kyuj kykyaqil nasyon e tzaj xjal tu'n kyb'inte tnab'l Salomón, aqe jlu sama'n e tzaj kyu'n kykyaqil rey ate' tuj tkyaqil twitz tx'otx', aqeju e b'inte tqanil ti'j tnab'l.