2 Samuel 12 - Mam Huehuetenango New Ortography

Ok ilin David tu'n Natán

1Xitzun t-sama'n Qman ju t-sanjel Natán tb'i tuk'il David. Tejtzun tpon Natán twitz David xi tma'n te:

—Tuj jun tnam attoq kab'e xinaq, jun q'inuntoq, atzun juntl meb'a.

2Aju q'inun, nim qe t-ẍne'l ate' ex nim twakẍ,

3atzunte meb'a, noq junx tal t-ẍne'l at, aju otoq tz'el tlaq'o'n. Tu'nx o ch'iy, ex aju tal ẍne'l ax o ch'iy tja ex kyxol qe tk'wa'l, ax in wa'n ti'j twa tajwil, ex ax in k'an tujx tk'ab'l ex in kub' tan ttzi t-xu'k. Ate xjal lu at-xix tgan ti'j, mer ik tza'n jun tme'jel.

4At jun q'ij pon jun b'etin xjal visitaril te q'inun; ex ate q'inun minti' tajb'e tu'n tkub' tb'yo'n jun tal t-ẍne'l ex qa twakẍ tu'n t-xi tq'o'n te tchi' ju xjal otoq pon visitaril te, noq o'kx el ti'n tal t-ẍne'l ju xjal meb'a, ex b'aj tb'incha'n te tchi' ju xjal otoq pon visitaril te, chi Natán te David.

5Atzunte David tzaj nimxix tq'oj ti'j ju q'inun lu, ex xi tma'n te Natán:

—Kxel nma'ne teya jun nyole axix tok twitz Qman; aju xjal ma b'ant tu'n ikju, b'a'n tu'n tkyim,

6ex il ti'j tu'n t-xi tchjo'n kyaje maj tal ẍne'l te tajwil, tu'nju ma tb'incha ikju ex minti' ma tzaj q'aq'an tk'u'j ti'j tal meb'a xjal.

7Atzunte Natán xi ttzaq'we'n:

—Aya aju xjal lu. Ex atzun jlu ma tzaj tma'n Qman teya, aju Qdios aj Israel qo': Aqine in jaw sk'onte teya tu'n toka te rey kye aj Israel, ex ma kleta wu'ne tuj tq'ab' Saúl;

8ma txi nq'o'ne tja tpatrona teya kyuk'ix qe t-xu'jil, ax ikx ma che kyaj aj Israel ex aj Judá tjaq' tkawb'ila. Noqwit nik'xi jlu, mawtlo txi ntz'aqsa'ne mastl teya.

9¿Tiqu'n ma tz'el tik'una nyole ex ma b'ant tu'na aju mya b'a'n nne'la tuj nwitze? Ma kub' tb'yo'na Urías aju aj Heteo, ex ma che ajb'en aj Amón tu'na tu'n tkub' b'yo'n, ex ma jaw ti'na t-xu'jil.

10Kyja'tzun tu'n spad che b'el b'yo'n junjun tky'ajala, tu'nju ma chin el tik'una, ex tu'nju ma jaw ti'na t-xu'jil Urías aju aj Heteo tu'n tok te t-xu'jila.

11Aqine Dios clarxix in xi nma'ne jlu: Aju mya b'a'n tzul wi'ne ti'ja, ax kyu'n qe tk'wa'la kb'antel; twitzxa che elel wi'ne qe t-xu'jila ex che xel nq'o'ne te juntl, ex mya tuj ewaj kb'el tan kyuk'il; noq o'kx q'ijtl ex tuj q'ancha'l.

12Tuj ewaj ma b'ant jlu tu'na, atzun weye kywitz kykyaqil aj Israel kb'antel wu'ne, q'ijtl ex tuj q'ancha'l.

13Xitzun tma'n David te Natán:

—Ma chin b'inchane il twitz Qman.

Atzunte Natán xi ttzaq'we'n:

—Ma najset tila tu'n Qman; mlay kyima.

14Ex tu'nju ma tb'inchaya jlu, qe aj q'oj ti'j Qman ma che ok ten yolil mya b'a'n ti'j, kyja'tzun kymel aju tk'wa'la ky'itzqe tzul itz'j.

15Tejtzun taj Natán tja, o tb'incha Qman tu'n tyab't tal ne' kyuwxix wen, aju tky'ajal David otoq tzul itz'j ti'j t-xu'jilb'en qtzan Urías.

16Atzunte David ok ten na'l Dios ti'j tal ne', ex minti' o wa'n, ex junjun aq'b'il tu'n in tan twitz tx'otx' tuj tja.

17Qe kytijil xjal ate' tuj tja rey kukx in che pon q'malte tu'n tjaw we' twitz tx'otx', ex minti' o tajb'e, ikx minti' o wa'n kyuk'il.

18Tb'ajlenxitzun wuq q'ij kyim tal ne', atzun qe aj sanjelal te David nim e xob' tu'n t-xi kyma'n te, porke in che ximantoq ti'j kyja': Tej itz'xtoq tal ne', ok in qo'x yolin te David minti' in qo tzaj tb'i'n; ¿tza'ntzun tten tu'n t-xi qma'n ja'lo qa ma kyim tal ne'? Jakulo tk'ixb'isa tib' tu'n tb'is, che chi.

19Pero tej tlonte David in che yolintoq aj sanjelal kyxolx, el tnik' ti'j qa otoq kyim tal ne'; kyja'tzun xi tqanin kye:

—¿Maj ma kyim tal ne'?

—Ma kyim, che chi xi kytzaq'we'n.

20Jawtzun we' David twitz tx'otx', ok ten chil ex ok tq'o'n perjum ti'j, b'aj tch'expu'n t-xb'alun ex okxtzun tuj tja Dios tu'n tk'ulun te Qman. Te tib'ajxi xi' tja ex xi tqanin twa ex ok ten wa'l.

21Ex qe xjal at kyoklen ttxlaj xi kyqanin te:

—¿Ti in b'aj teya Tat Rey? Tej itz'xtoq tal ne', o kub' tyo'na we'yaj ex o tz'oq'a ti'j; atzun ja'lo tej ma kyim, ma jaw we'ya ex ma tz'ok tena wa'l.

22Atzunte David xi ttzaq'we'n:

—Tej itz'xtoq tal ne', ma kub' nyo'ne we'yaj ex ma chin oq'e ti'j, ximan wu'ne qa tu'n jlu jaku tzaj q'aq'an tk'u'j Qman wi'je ex tu'n tanq'in tal ne'.

23Atzun ja'lo ma kyim, ¿tiqu'ntzun kb'el nyo'ne we'yaj? ¿Jakupetzun tzul tnab'l juntl maj wu'ne? Aqine chin pol tuk'il, atzun te mlay tzul meltz'aj tu'n tten wuk'ile, chi David.

Tej titz'j Salomón

24Te tib'ajxi jlu ok ten David q'uqb'alte tk'u'j Betsabé aju t-xu'jil. Pon tuk'il ex kub' tan tuk'il. Ultzun itz'j jun tal t-xu'jil, ex Salomón tb'i ok tq'o'n David. O tk'ujla Qman aju k'wa'l lu,

25ex pon tqanil te David tu'n Natán aju t-sanjel Dios qa k'ujla'n ju k'wa'l lu tu'n Qman, kyja'tzun ok tq'o'n juntl tb'i tal k'wa'l Jededías, ik tza'nx otoq tma Qman.

Tzyet tnam Rabá tu'n David 1 Crónicas 20.1-3

26Ok tzoqpaj Joab ti'j tnam Rabá aju tnam ma'xix toklen kye aj Amón, ex tej ch'ixtoq ttzyet tu'n,

27xi t-sama'n tqanil lu tuk'il David ex chi kyja': Ma chin ok tzoqpaje ti'j tnam Rabá ex ma che tzyet qe kywi a' wu'ne.

28Kyja'tzun, chmon b'aja txqantl soldad ja'lo, ex tok tzoqpaja ti'j tnam ex tzyuma, tu'ntzun mya aqine chin tzyulte te ex tu'n mi'n tok nb'iye ti'j.

29Oktzun tchmon David kykyaqil t-soldad, ex xi'tzun tu'n tq'ojin ti'j tnam Rabá, ok tzoqpaj ti'j ex o tzyet tu'n.

30Te tib'ajxi el ti'n David tcoron ju rey tjax tuj twi', aju q'an pwaq ttx'otx'il, kyoksa'n qe tal ab'j tb'anilxix ti'j, 72 libr talil, ex jax kyq'o'n tuj twi' David. Ax ikx etz ti'n David nimku ti'xti wi'yilxix tuj tnam.

31Ex e etz ti'n qe xjal ate' tuj tnam ex e ok tq'o'n te aq'nal ti'j sier, ti'j pyoch ex ti'j siwb'il k'uxb'il, ex e ok tq'o'n te aq'nal ti'j jorni te lagriy. Iklex o tb'incha kyuj kykyaqil tnam kye aj Amón, ex te tib'ajxi ajtz meltz'aj kyuk'ix kykyaqil t-soldad tu'n kyul tuj Jerusalén.