1Otoq japun Ezequías twi' 25 ab'q'i tej ttzyet tkawin ex o kawin 29 ab'q'i tuj Jerusalén. Aju ttxu', Abías tb'i aju tme'jel Zacarías.
2Qe tb'inchb'en Ezequías b'a'n e ela tuj twitz Qman, ik tza'nx otoq tb'incha David aju qtzan t-xe'chel.
3Tuj tnejel xjaw te tnejel ab'q'i ttzyetlen tkawin Ezequías o jaqet tja Dios tu'n ex e b'aj t-saqsa'n qe tlamel.
4E tzaj ttxko'n qe pal kyuk'ix qe aj Leví, ex atzun e ok tchmo'n tuj ttxa'n pe'n twitz tja Dios tuj tjawitz q'ij,
5ex xi tma'n kye: Aqeye aj Leví chin kyb'intze: Kyxjansan b'aj kyib'e ja'lo, ax ikx kyxjansame tja Qman aju Kydios qxe'chel. Kyi'n etze tkyaqilju mya b'a'n at tuj tja Qman.
6Porke o che b'inchan qtzan qxe'chel il; aju kyb'inchb'en mya b'a'n e ela tuj twitz Qman, o kyaj kykolin aju Qdios, ya minti'tl kyaj ti'j tja Qman ex o tz'el kypa'n kyib' ti'j Dios.
7Kyaj kylamo'n qe tlamel tja Dios, ku'x kyyupun qe kandil, xi kykolin tu'n tkub' kypatun storak ex tu'n t-xi kyq'o'n qe chojb'il patun in che kub' twitz tja Dios aju Kydios aj Israel.
8Kyja'tzun tzaj tq'oj Qman kyi'j aj Judá ex kyi'j aj Jerusalén, ex tu'n Qman in che lab'in xjal kyi'j, in che xmayin kyi'j ex ma che jaw sek'paj kyi'j, ik tza'nx ma kyile tu'n kywitze.
9Kyja'tzun ma che kyim qe qtzan qman tuj q'oj, atzun qe qky'ajal ex qe qme'jel kyuk'ix qe qxu'jil ma che'x q'i'n pres.
10Kyja'tzun ma kub' nximane tu'n tb'ant ti'j jun yol wu'ne tuk'il Qman aju Kydios aj Israel, tu'ntzun mi'n kukx tq'ojintl Qman qi'j.
11Atzun ja'lo aqeye nk'wa'l, japunx kyu'ne, porke ma che jaw sk'o'ne tu'n Qman tu'n kytene twitz, tu'n kyajb'ene te, ex tu'n tkub' kypatune storak twitz, chi Ezequías.
12Qe aj Leví, aqeju b'i'x tzyet kyaq'nan, atzun qe jlu: Kyxol tiyjil Coat, atzun Mahat aju tky'ajal Amasai tuk'ix Joel aju tky'ajal Azarías; kyxol tiyjil Merari, atzun Cis aju tky'ajal Abdi tuk'ix Azarías aju tky'ajal Jehalelel; kyxol tiyjil Gersón, atzun Joa aju tky'ajal Zima ex tuk'ix Edén aju tky'ajal Joa;
13kyxol tiyjil Elizafán, atzun Simri tuk'ix Jeiel; kyxol tiyjil Asaf, atzun Zacarías tuk'ix Matanías;
14kyxol tiyjil Hemán, atzun Jehiel tuk'ix Simei, ex kyxol tiyjil Jedutún, atzun Semaías tuk'ix Uziel.
15Aqe jlu nej e ok kychmo'n qe kyerman ex b'aj kyxjansan kyib' kykyaqil; ex e okxtzun tuj tja Dios tu'n tb'aj kysaqsa'n, ik tza'nx ju orden otoq txi tq'o'n rey ex ik tza'nx otoq tma Qman.
16Te tib'ajxi e okx qe pal tuj tja Dios tu'n tb'aj kysaqsa'n. Etz kyi'n tkyaqil ttz'ilil tokx tuj, ex kub' kyq'o'n ttxa'n pe'n, ex atzun kye aj Leví xi kyi'n tu'n tpon tuj tq'ab' xaq Cedrón.
17Tzyet kysaqsante ttxa'n tpe'n tja Dios tuj tnejel q'ij te tnejel xjaw, ex tuj twajxaqin q'ij e pon kanun ttzi tja Dios. Tuj wajxaq q'ijtl b'aj kysaqsa'n tuj tja Dios ex tuj tqaqlajin q'ij b'aj b'ant tkyaqil kyu'n.
18Te tib'ajxi jlu e je'x q'malte te rey Ezequías kyja': Ma b'aj qsaqsa'ne tkyaqil tja Dios tuk'ix altar te patb'il chojb'il, kyuk'ix kykyaqil qe makb'il in che ajb'en ti'j, tuk'ix ju mes jatum in che kub' txolb'et qe pan ky'iwla'maj tib'aj ex kyuk'ix kykyaqil qe makb'il in che ajb'en ti'j.
19Ax ikx ma b'aj qb'incha'ne kyten ex ma che b'aj qsaqsa'ne kykyaqil qe makb'il otoq che ex ti'n rey Acaz tej tel tpa'n tib' ti'j Qman. Lu ma che kub' ten juntl maj junx tuk'il altar te Qman, che chi pal.
20Primxix jaw we' rey Ezequías, e ok tchmo'n qe aj sanjelal te tnam ex xi' tuj tja Qman.
21Xi kyi'n wuq tor, wuq tman ẍne'l, wuq tal tman ẍne'l ex wuq tman chip te jun chojb'il tu'n tnajset til rey kyuk'ix qeju ate' tuj tja, ex kyil aj Judá, ex tu'n t-xjanset tja Dios. Xi tma'n rey kye qe pal aqeju tiyjil Aarón tu'n t-xi kyq'o'n jlu te chojb'il tib'aj altar te Qman.
22Kub'tzun kyb'yo'n pal qe tor, tzaj kyi'n kychk'el ex xi kytx'itpu'n tib'aj altar. Ax ikx kyb'incha kyi'j qe tman ẍne'l ex kyi'j qe tal tman ẍne'l.
23Te tib'ajxi e pon q'i'n qe tman chip twitz rey ex kywitz kykyaqil tnam xjal te jun chojb'il tu'n tnajset kyil, ex atzun kye kub' kyq'o'n kyq'ab' kyib'aj.
24Kub'tzun kyb'yo'n pal qe tman chip ex kub' kyqo'n kychk'el tib'aj altar tu'n tnajset kyil aj Israel, ex xi tma'n rey tu'n t-xi q'ot chojb'il patun in kub' tu'n tnajset kyil kykyaqil aj Israel.
25Ax ikx e kub' tq'o'n Ezequías qe aj Leví tuj tja Qman, q'i'n qe laq k'uxb'il kyu'n, kyuk'ix qe chnab' arpa ex kitar. O b'ant jlu ik tza'n otoq kyaj kyma'n David tuk'ix Gad aju b'a'n nab'in tu'n Dios, aju ajb'en ttxlaj David, ex tuk'ix Natán aju t-sanjel Dios, porke aju orden lu tu'n Qman otoq tzaj tma'n kye qe t-sanjel.
26Wa'ltoq qe aj Leví, q'i'ntoq qe chnab' kyu'n, aqeju otoq che kyaj tq'o'n David, ex atzun kye pal q'i'ntoq qe chun kyu'n.
27Xitzun tma'n Ezequías tu'n t-xi q'ot aju oyaj patun in kub' tib'aj altar. Ex tejtzun t-xi q'ot oyaj, ax ikx tzyet kyb'itzan te nimb'il te Qman, kyuk'ix qe chun e ok q'ajtza'n, junx kyuk'il qe chnab' otoq che kyaj tq'o'n David.
28Atzun qe tnam xjal e kub' mok'e' te jun nimb'il te Qman tej in che b'itzantoq qe b'itzal, ex atzun qe pal in che q'ajtza'ntoq chun. Tkyaqil jlu kukx o ten tejxi tkub' b'aj tz'e'y oyaj patun in kub'.
29Tejtzun tb'aj jlu, ate rey kyuk'ix kykyaqil qeju ate'toq tuk'il e kub' ẍmeje' ex e k'ulun te Qman.
30Te tib'ajxi, ate rey Ezequías kyuk'ix qe xjal at kyoklen ttxlaj, xi kyma'n kye aj Leví tu'n tjaw kynimsa'n tb'i Qman kyu'n qe salmo e kyaj ttz'ib'an David, ex qeju e kyaj ttz'ib'an Asaf aju b'a'n nab'in tu'n Dios. E oktzun ten b'itzal tuk'il nim tzalajb'il, ax ikx e kub' ẍmeje' ex e k'ulun te Qman.
31Xitzun tma'n Ezequías kye xjal: Tu'nju ma b'aj kyxjansan kyib'e ja'lo twitz Qman, che laq'etztzune ex kyi'ntze qe chojb'il ex qe oyaj te aq'b'il chjonte tuj tja Qman. Xitzun kyi'n tnam xjal qe chojb'il ex qe oyaj te aq'b'il chjonte, ex aqeju o kyajb'e tu'n t-xi kyq'o'n qe oyaj patun in che kub', xi kyq'o'n tu'n kyex kygan.
32Qe alumaj pon kyi'n tnam xjal te chojb'il patun in kub', 70 tor, jun syent tman ẍne'l ex kab' syent tal tman ẍne'l. Tkyaqil jlu ajb'en tu'n t-xi q'ot te jun chojb'il patun in kub' twitz Qman.
33Ex aju kyajlal alumaj xi kyq'o'n te oyaj, japun qaq syent wakẍ ex ox mil ẍne'l.
34Ex tu'nju mya nim pal ate', minti' e kanun tu'n tel kyi'n kytz'umal kykyaqil alumaj te chojb'il, kyja'tzun e onin qe aj Leví kyi'j, aqeju at kyxilen kyuk'il, tu'n tb'aj b'ant naj aq'untl, akux in b'aj kyxjansan kyib' txqantl pal, porke qe aj Leví masxix kygan tu'n tb'aj kyxjansan naj kyib' kywitz qe pal.
35Xitzun kyq'o'n nim chojb'il patun in kub', tuk'ix kysebyil qe chojb'il te mojb'ab'l tib'il ex ju oyaj ta'l twitz uva te kymoj oyaj patun in che kub'.
Iktzun tenb'a tej tkub' xe't juntl maj k'ulb'il tuj tja Dios.
36Tza'nx te Ezequías, ax ikx kykyaqil tnam xjal, e jaw tzalaj ti'j ju otoq tb'incha Dios kyi'j, ex tkyaqil otoq b'ant te jurat naj.
Who We AreWhat We EelieveWhat We Do
2025 by iamachristian.org,Inc All rights reserved.
