1Tej tb'aj tma'n Jesús tkyaqilju yol lu, xi tma'n kye t-xnaq'tzb'en:
2—B'i'n kyu'ne ka'j kub' ik'set Xjan Q'ij, ex aqine sk'o'maj qine tu'n Dios tu'n ntene kyuk'il xjal chin xel q'o'ne tuj kyq'ab' xjal tu'n njaw q'o'ne twitz crus, chi Jesús kye.
3B'ajtzun kychmon kyib' qe nejenel kye pal, kyuk'ix qe xnaq'tzal ti'j ley, kyuk'ix qe kytijil xjal judiy, b'aj kychmon kyib' twitz tja nejenel kye pal, Caifás tb'i.
4B'anttzun ti'j kyu'n noq minab'en tu'n ttzyet Jesús kyu'n tuj ewaj ex tu'n tkub' kyb'yo'n.
5Ex kyma kyxolx:
—Mya tuj ninq'ij tu'n ttzyet qu'n, tu'ntzun mi'n kyjaw tilj xjal.
Jax qo'n perjum tib'aj twi Jesús tu'n jun xu'j Marcos 14.3-9; Juan 12.1-86Tej tten Jesús tuj Betania tuj tja Simón aju at tx'a'k ti'j nej, aju tx'a'k minti' q'anb'il ti'j,
7pon jun xu'j tuk'il Jesús, q'i'n jun tal botey perjum tu'n, puro wi'yilxix; jax tqo'n xu'j perjum tib'aj twi Jesús tej q'uqltoq Jesús ti'j mes.
8Tej kylonte qe t-xnaq'tzb'en jlu, tzaj kyq'oj:
—¿Tiqu'n noqx gan ma naj perjum lu?
9Ex mawtlo txi k'ayit jlu tu'n tkyaj nim pwaq twi' ex tu'n t-xi q'ot kye meb'a, che chi.
10Tejtzun tel tnik' Jesús ti'j, xi tma'n kye:
—¿Tiqu'n ma tzaj kyq'oje ti'j xu'j lu? Porke ate xu'j lu ma tb'incha jun b'a'n wi'je.
11Porke qe meb'a kukx che tel kyuk'ile, atzun weye mya kukx chin tele kyuk'ile.
12Ex tej xjax tqo'n xu'j perjum wib'aje, ma tb'incha jlu tu'n tb'ant ntene tu'n nku'x maqu'ne.
13Ax tok kxel nma'ne kyeye, tuj tkyaqil twitz tx'otx', noq ja'x tumel kpakb'etel tqanil kolb'il lu, ax ikx kxel tx'olb'a'n aju ma tb'incha xu'j lu te nab'l te.
Xi k'ayin Jesús tu'n Judas Marcos 14.10-11; Lucas 22.3-614At jun kyxol qeju kab'laj t-xnaq'tzb'en Jesús, Judas Iscariote tb'i, xi' kyuk'il nejenel kye pal
15ex xi tma'n kye:
—¿Alkye ktzajel kyq'o'ne weye qa ma txi nq'o'ne Jesús tuj kyq'ab'e?
Tzajtzun q'o'n 30 saq pwaq te.
16B'i'xtzun ok ten Judas jyol tumel tza'n tten tu'n t-xi q'o'n Jesús tuj kyq'ab'.
Wa'n Jesús kyuk'il t-xnaq'tzb'en tuj Xjan Q'ij Marcos 14.12-25; Lucas 22.7-23; Juan 13.21-30; 1 Corinto 11.23-2617Tujtzun tnejel q'ij te ninq'ij tu'n kywa'n xjal pan minti' t-samel tu'n tjaw mal tk'u'j, e pon laq'e' t-xnaq'tzb'en Jesús ttxlaj ex xi kyma'n te:
—¿Jatum taja tu'n tb'aj qb'incha'ne wab'j tu'n twa'na tuj Xjan Q'ij?
18Xitzun tma'n Jesús kye:
—Kyxi'ye tuk'il jun xjal tuj tnam ex kymanxe te: Chi xnaq'tzal kyja': Ch'ix tpon or weye; tuj tjaya kb'el wik'sa'ne Xjan Q'ij kyuk'il nxnaq'tzb'ene, che chikuye te.
19Kyb'incha xnaq'tzb'en ik tza'n o tma Jesús kye, b'aj kyb'incha'n wab'j tu'n tik'set Xjan Q'ij.
20Tejtzun qok yupj, kub' qe' Jesús ti'j mes kyuk'ix kab'laj t-xnaq'tzb'en.
21Matoq in che wa'n, tma Jesús:
—Ax tok kxel nma'ne kyeye, ax jun kyeye kxel q'onte weye tuj kyq'ab' xjal.
22Tzajtzun nimxix kyb'is qe t-xnaq'tzb'en, ex teyle junjun ok ten qanil te Jesús kyja':
—¿Qape a qine Tat? Che chi.
23Xi ttzaq'we'n Jesús:
—Aju kb'elex tmu'n twa junx wuk'ile tuj laq, atzunju kxel q'onte weye tuj kyq'ab' xjal.
24Ax tok chin xel q'o'ne tuj kyq'ab' xjal ik tza'nx in tma'n tuj Tu'jil wi'je, aqine sk'o'maj qine tu'n Dios tu'n ntene kyuk'il xjal; ex b'ek'b'il twitz ju xjal aju kxel q'onte weye tuj kyq'ab' xjal. Mas b'a'n miwt o itz'j ju xjal lu, chi Jesús.
25Xitzun ttzaq'we'n Judas, aju attoq t-xi'yil q'onte Jesús tuj kyq'ab' xjal:
—¿Qape aqine Xnaq'tzal?
Xi tma'n Jesús te:
—Atzuna.
26Matoq in che wa'n, tzaj ttzyu'n Jesús pan, xi tq'o'n chjonte te Dios ex kub' tpiẍk'u'n, xi tq'o'n kye t-xnaq'tzb'en, ex xi tma'n:
—Kytzyunxe ex kywa'nxe; atzun nximlale jlu.
27Ex tzaj ttzyu'n ju vas, xi tq'o'n chjonte te Dios, xi tq'o'n kye, ex xi tma'n:
—Kyk'anxe jlu kykyaqile,
28ex atzun nchk'ele jlu te kyuwsab'l te ak'aj yol, aju ma kyaj b'ant ti'j tu'n Dios kyuk'ile; atzun nchk'ele k'elel chitj tu'n kylaj nimku xjal, tu'n tnajset kyil.
29Kxel nma'ne kyeye, texju ja'lo mlay txi nk'a'ntle ta'l twitz uva, maxitzun kxel nk'a'ne juntl maj junx kyuk'ile tuj tq'ijlalil ok tul tkawb'il Nmane, chi Jesús kye.
Chin b'el tewana ox maj chi Jesús te Pedro Marcos 14.26-31; Lucas 22.31-34; Juan 13.36-3830Tb'ajlenxitzun kyb'itzan jun b'itz, e je'x twi witz Olivos tb'i.
31Xitzun tma'n Jesús kye:
—Kykyaqile k'elel kypa'n kyib'e wi'je te qonik'an ja'lo, porke in tma'n tuj Tu'jil: Kb'el nb'yo'ne pastor, ex che elel sputj qe t-ẍne'l.
32Oktzun njatz anq'ine, nej chin xe'le kywitze tuj Galilea, chi Jesús kye.
33Xi ttzaq'we'n Pedro:
—Maske kykyaqil k'elel kypa'n kyib' ti'ja, pero weye mlayx tz'el npa'n wib'e ti'ja, chi Pedro.
34Xi tma'n Jesús te:
—Ax tok kxel nma'ne teya, te qonik'an ja'lo na'nxtoq ttzaj oq' tzek', ox maj kb'el tewana kywitz xjal qa minti' ojtzqi'n qine tu'na, chi Jesús te.
35Xi tma'n Pedro:
—Ma b'ant-x qa ma chin kyime tuk'ila, ex mlay kub' wewane.
Ax ikx kyma kykyaqil xnaq'tzb'en.
In na'n Jesús Dios tuj Getsemaní Marcos 14.32-42; Lucas 22.39-4636Pontzun Jesús kyuk'ix qe t-xnaq'tzb'en tuj jun lugar Getsemaní tb'i ex xi tma'n kye t-xnaq'tzb'en:
—Che qekuye tzalu, atzun weye ma chinxe na'l Dios ma chixin.
37Xi tuk'in Jesús Pedro tuk'il, kyuk'ix qeju kab'e tky'ajal Zebedeo. Tzajtzun nim tb'is ex tzaj ta'w tuj tanmi.
38Xitzun tma'n Jesús kye:
—Nimxix in b'isun wanmiye, ch'ix nkyime tu'n b'is. Che tenkje tzalu ex che xq'uqine wuk'ile.
39Ex xi laq'e' ch'intl, kub' mutze', ok ten na'l Dios ex tma:
—Nman, qa at tumel, kuchiwt tu'n mi'n tik'x jlu wu'ne; ex mya tu'n tb'ant aju weye wajb'il, noq o'kx tu'n tb'ant aju teya tajb'il, chi Jesús.
40Ultzun kyuk'il t-xnaq'tzb'en, e knet tu'n in che tan; xitzun tma'n te Pedro:
—¿Maj minti' ma kyipaye tu'n kyxq'uqine jun or wuk'ile?
41Che xq'uqine ex che na'ne Dios tu'n mi'n kyoke tuj joyb'il kyi'je; ax tok taj kyanmiye tu'n kyxq'uqine, atzun kyximlale minti' tipun.
42Xi laq'e' juntl maj Jesús, ok ten na'l Dios tkab'maji'n ex tma:
—Nman, qa minti' tumel tu'n mi'n tik'x jlu wu'ne, b'ant-xwit aju tajb'ila, chi Jesús.
43Ul juntl maj kyuk'il t-xnaq'tzb'en, ex e knet tu'n in che tan, porke attoq nim watl tuj kywitz.
44E kyajtzun tq'o'n, xi laq'e' juntl maj, ok ten na'l Dios toxmaji'n, ex ax yol xi tma'n.
45Ultzun kyuk'il t-xnaq'tzb'en ex xi tma'n kye:
—Che tanxtzune ja'lo ex che ojlane. Lu ma pon or tu'n nxi q'o'ne tuj kyq'ab' xjal aj il, aqine sk'o'maj qine tu'n Dios tu'n ntene kyuk'il xjal.
46Che we'ktze, qo'qe; kyke'yinxe, ma tzul laq'e' aju kxel q'onte weye tuj kyq'ab' xjal, chi Jesús kye.
Tej t-xi q'i'n Jesús pres Marcos 14.43-50; Lucas 22.47-53; Juan 18.2-1147Matoq in yolin Jesús, pon Judas, jun kyxol qeju kab'laj xnaq'tzb'en, ex tuk'ix nim xjal tuk'il q'i'n spad kyu'n tuk'ix tze', e tzaj sama'n kyu'n nejenel kye pal ex kyu'n kytijil xjal judiy.
48Otoq txi tma'n Judas kye tza'n tten tu'n t-xi tq'o'n tuj kyq'ab'.
—Aju k'elel ntz'ub'ane twitz, atzunju, kytzyuntztzune, chi Judas xi tma'n kye.
49Pon laq'e' naj Judas ttxlaj Jesús ex tma:
—Je'k, Xnaq'tzal.
Ex el ttz'ub'an twitz.
50Xitzun tma'n Jesús te:
—Aya wuk'il, ¿alkye t-sanjelala? E pontzun laq'e' qe xjal, tzyettzun Jesús kyu'n ex xi kyi'n pres.
51Ex at jun kye qeju ate'toq tuk'il Jesús jatz ti'n t-spad, ok ttx'emin jun tmajen nejenel kye pal ex b'i'x el t-ẍkyin tu'n.
52Xitzun tma'n Jesús te:
—Q'o'n ku'xa t-spadiya tuj tjayil. Ex kykyaqil qeju q'i'n spad kyu'n, ax tu'n spad che najel.
53¿Minti'pe b'i'n tu'na qa jaku txi nqanine te Nmane tu'n ttzaj t-sama'n naj mas te kab'laj k'loj anjel?
54Ex noqwit ma txi nqanine, ¿tza'ntzun tten tu'n tjapun aju yol tz'ib'an tuj Tu'jil in tma'n qa il ti'j tu'n ttzaj tkyaqil jlu wi'je?
55Ex xi tma'n Jesús kye xjal:
—¿Maj ma che tzaje wi'je ik tza'n ti'j jun eleq', q'i'n spad kyu'ne tuk'ix tze' tu'n ntzyete kyu'ne? Tkyaqil q'ij in kub' qe'ye kyuk'ile tuj tja Dios, xi nq'o'ne xnaq'tzb'il, ex minti' in tzaj kytzyu'ne.
56Ex tkyaqil jlu ma b'ant tu'ntzun tjapun aju tz'ib'an tuj kyu'jil t-sanjel Dios, chi Jesús kye.
Kyajtzun q'o'n Jesús kyu'n kykyaqil xnaq'tzb'en, ex e je'l oq.
Pon q'i'n Jesús kywitz Aj Sanjelal Marcos 14.53-65; Lucas 22.54-55,63-71; Juan 18.12-14,19-2457Aqeju e tzaj tzyunte Jesús, xi q'i'n Jesús kyu'n twitz ju nejenel kye pal, Caifás tb'i, atzun kychmon kyib' qe xnaq'tzal ti'j ley kyuk'ix qe kytijil xjal.
58Atzunte Pedro lepchix t-xi' najchaq, pon ttxa'n tpe'n nejenel kye pal; okxtzun Pedro ex kub' qe' kyuk'il qe polisiy, tu'n tke'yinte ti kb'ajel.
59Atzun kye nejenel kye pal kyuk'ix qe kytijil xjal kyuk'ix kykyaqil Aj Sanjelal kye xjal Judiy in che jyon ti'j testiw tu'n kynik'an yol ti'j Jesús, tu'ntzun tkub' t-sentens Jesús tu'n tkyim.
60Ex minti' knet jun til kyu'n, maske nimku testiw e pon nik'al yol ti'j. Ex te mankb'ilxi pon kab'e testiw nik'al yol
61ex kyma:
—O tma xjal lu: Jaku b'ant tu'n tkub' xitj tja Dios wu'ne, ex tu'n tjaw nb'incha'ne juntl maj tuj ox q'ij, chi ju xjal lu, che chi.
62Jawtzun we' aju nejenel kye pal ex xi tma'n te Jesús:
—¿Maj minti' jun yol in tzaj ttzaq'we'na? ¿Chi tok tu'na ti'j ju in kyma'n xjal lu ti'ja?
63Atzunte Jesús minti' o q'ajt. Xitzun tma'n nejenel kye pal te:
—Kxel nkyuwsa'ne teya twitz Dios itz', q'mantza qeye qa aya ju Crist Tk'wa'l Dios, aju at toklen tu'n Dios.
64Xi tma'n Jesús te:
—Aqine ik tza'n ma tmaya; ax ikx kxel nma'ne kyeye, tzul q'ij ok kyila'ye q'uql qine tuj b'anq'ab'aj ttxlaj Dios nim tipumal, ex ok kyila'ye ok ntzaje tuj muj twitz kya'j, aqine sk'o'maj qine tu'n Dios tu'n ntene kyuk'il xjal.
65Atzunte nejenel kye pal el t-sb'it'un t-xb'alun ti'j ex tma:
—Ma yolin te jlu mya b'a'n ti'j Dios. ¿Ti til txqantl testiw qe? Lu ma kyb'iye ja'lo ma xmayin ti'j Dios.
66¿Chi tok kyu'ne?
Atzun kye xi kytzaq'we'n:
—At til, b'a'n tu'n tkyim.
67Oktzun kytzub'an tuj twitz Jesús, ok kyb'aju'n tu'n kyq'ab', ex junjuntl e ok ten tz'ajal twitz,
68in kyma'n:
—Aya Crist at toklena tu'n Dios, q'mantza qeye alkye ma tz'ok b'ajun teya, che chi.
Kub' tewan Pedro qa minti' ojtzqi'ntoq Jesús tu'n Marcos 14.66-72; Lucas 22.56-62; Juan 18.15-18,25-2769Atzunte Pedro q'uqltoq ttxa'n pe'n; ex pon laq'e' jun criad ttxlaj ex xi tma'n te:
—Ax ikx teya o tena tuk'il Jesús aju aj Galilea.
70Atzunte Pedro kub' tewan kywitz kykyaqil ex tma:
—Minti' b'i'n wu'ne aju in tma'na.
71Etztzun Pedro ttzi ja, o ilwaj tu'n juntl criad ex xi tma'n criad kye xjal axtoq ate':
—Ax ikx te jlu o ten tuk'il Jesús aj Nazaret, chi criad.
72Ex kub' tewan Pedro juntl maj, xi tma'n tzqan Dios.
—Minti' ntzqi'ne twitz xjal lu, chi Pedro.
73Te matoqx e pon laq'e' qe xjal axtoq ate' ex xi kyma'n te Pedro:
—Ax tok ikx teya ajuna kyuk'il, porke ti'j tyola junxitl tb'inx nne'l qnik'e ti'ja.
74Xitzun tma'n Pedro:
—Tzqan Dios ax tok nyole, b'a'n tu'n ttzaj jun ncastiwoye tu'n Dios qa mya ax tok nyole. Minti' ntzqi'ne xjal lu, chi Pedro.
Ex jurat naj tzaj oq' tzek'.
75Ultzun ti'j tk'u'j Pedro aju yol otoq tma Jesús te: Na'nxtoq ttzaj oq' tzek' kb'el tewana ox maj kywitz xjal qa minti' ojtzqi'n qine tu'na, chi Jesús. Etztzun Pedro ti'jtzi, ex jaw oq'xix wen tu'n tb'is.
Who We AreWhat We EelieveWhat We Do
2025 by iamachristian.org,Inc All rights reserved.
