2 Corinto 1 - Mam Huehuetenango New Ortography

Xi ttz'ib'an apostol Pablo jun u'j kye okslal tuj Corinto

1Aqine Pablo, apostol qine te Jesucrist noq tu'n tajb'il Dios, ex tuk'ix erman Timoteo at wuk'ile. In xi qtz'ib'ane kyeye aqeye okslal ate'ye tuj tnam Corinto, etzan qeye tu'n Dios, kyuk'ix kykyaqil okslal ate' tuj tkyaqil tx'otx' Acaya.

2Awt Qman Dios tuk'ix Qajaw Jesucrist che q'onte xtalb'il kyeye ex tu'n tqe'xix kyk'u'je.

Aju yajb'il te Pablo

3Qnimsa'nktz tb'i Dios aju Tman Qajaw Jesucrist, atzunte Mamb'ajju kukx in q'aq'an tk'u'j qi'j, ex atzunte Diosju kukx in tq'uqb'a'n qk'u'j.

4In tq'uqb'a'n Dios qk'u'j tuj tkyaqil yajb'il qe, tu'ntzun tb'ant qq'uqb'ante kyk'u'j qeju in che yajlanjtz, ik tza'n qe ma q'uqb'anjtz qk'u'j tu'n Dios.

5Porke ik tza'n nim in qo yajlanjtz tu'n tlaj okslal qo' ti'j Crist, ax ikxtzun nim in q'uqb'anjtz qk'u'j tu'nx Crist.

6Kyja'tzun, qa ma qo yajlanjtze, at tajb'en jlu tu'n tq'uqb'anjtz kyk'u'je ex tu'n kyklete; ex qa ma q'uqb'anjtz qk'u'je tu'n Dios, ax ikx at tajb'en jlu tu'n tq'uqb'anjtz kyk'u'je; kyja'tzun in q'uqb'anjtzxix kyk'u'je tu'n tik'x kyu'ne ik tza'nx qeye nnik'x qu'ne.

7Ma qe'xix qk'u'je kyi'je; porke b'i'n qu'ne, ik tza'n in che yajlanjtze junx quk'ile, ax ikxtzun kq'uqb'anjtzel kyk'u'je tu'n Dios junx quk'ile.

8Erman, qajb'ile tu'n kyb'inteye ti'j ju yajb'il qeye tzaj tuj Asia. Mer ik tza'n tjaq' jun iqtz o kub' b'etz'ane, minti' qipaye ex o qmaye qa tu'n qnaje.

9Ex o qna'ye mer ik tza'n otoq kub' qsentense tu'n qkyime. Ex tzaj ju yajb'il lu qi'je tu'n mi'n tok qe' qk'u'je qi'jxe, noq o'kx tu'n tok qe' qk'u'je ti'j Dios aju in che jaw anq'in kyimni tu'n.

10O klettzune tu'n Dios tuj jun kamik xob'ajilxix, ax ikx ja'lo in qo klete tu'n, ex q'uql qk'u'je ti'j Dios kukx qo kletele tu'n.

11Ax ikx kyeye che onine qi'je tuj na'j Dios; ex qa at nimku erman in che na'n Dios qi'je, ax ikx nimku erman kxel kyq'o'n chjonte te Dios tu'nju t-xtalb'il Dios in tzaj tq'o'n qeye, tu'nju kukx in che na'ne Dios qi'je.

Tiqu'n yaj xi' Pablo tuj Corinto

12Atzun jlu in qo tzalaje ti'j: Ax qanmiye in q'mante tza'n qtene, ma qo tene kyxol xjal ax ikx kyxole yalnix ti'j qnab'le ex junx qyole, tu'n Dios in tzaj tq'o'n jlu, ma qo tene kyxole minti' xqo ok lpe'ye ti'j kynab'l xjal, noq o'kx qe' qk'u'je ti'j t-xtalb'il Dios.

13Porke minti' in xi ntz'ib'ane juntl yol kyeye, noq o'kx in xi ntz'ib'ane aju in jaw kysch'i'ne ex nne'l kynik'e ti'j; ex q'uql nk'u'je ti'j, k'elel b'aj kynik'e ti'j tkyaqil.

14Ik tza'n ma tz'el ch'in kynik'e ti'j tu'n kytzalaje qi'je, ax ikx qeye tu'n qtzalaje kyi'je tuj tq'ijlalil ok tul Qajaw Jesús.

15Atzun jlu q'uql nk'u'je ti'j; kyja'tzun kub' nximane nej tu'n nxi'ye kyuk'ile tu'ntzun kytzalaje ok ntene kab' maj kyuk'ile.

16Kub' nximane tu'n wik'e kyuk'ile ok nxi'ye tuj Macedonia, oktzun wajtze tuj Macedonia tu'n wul meltz'aje juntl maj kyuk'ile, ex tu'n ttzaj kyq'o'ne ch'in onb'il weye tu'n tajb'en tuj nb'eye ok nxi'ye tuj tx'otx' Judea.

17Aju nximb'etze lu, ¿noqpelo elakyim kub' nximane? ¿Apetzun kub' nximane tu'n t-xi nma'ne tu'n nxi'ye, ex ya mi'n chinxtle, ik tza'n in kyb'incha'n xjal?

18Ex ate Dios ax tok testiw wi'je, aju qyole in xi qma'ne kyeye minti' in meltz'aje'.

19Porke aqine tuk'ix Sílvano ex Timoteo xi qpakb'a'ne tqanil ti'j Jesucrist kyxole, aju Tk'wa'l Dios; ate Jesucrist minti' meltz'aje' tyol; junx tyol ex axix tok.

20Ex tkyaqilju tzaj ttziyan Dios ax tok ex in japun noq tu'n Crist; kyja'tzun noq tu'n Jesucrist in xi qq'o'ne chjonte te Dios ex in qma'ne: Ikxwitju.

21Axte Dios in kyuwsante qe tu'nju okslal qo' ti'j Crist, ex ax ma tzaj q'onte qoklen.

22Ex ax Dios ma tz'ok q'onte sey qi'j, ex ma tzaj tq'o'n ju Xewb'aj Xjan tuj qanmi, atzun jun señ jlu tu'n ttzaj tq'o'n txqantl qe.

23Ax Dios ma tz'ok nq'o'ne te testiw wi'je, na'nx nxi'ye juntl maj tuj Corinto tu'n mi'n ttzaj kyb'ise wu'ne. Lu Dios in ke'yin qa mya ax tok nyole.

24Myatzun qajb'ile tu'n qok tene kawil kyeye ti'j kyokslab'le, porke wa'l qeye tuj kyokslab'le; noq o'kx qajb'ile tu'n qonine kyuk'ile tu'n tten kytzalajb'ile.