Jueces 6 - Mam Huehuetenango New Ortography

Txkonjtz Gedeón tu'n Dios

1E ok ten aj Israel juntl maj b'inchal mya b'a'n twitz Qman, ex tuj wuq ab'q'i e je'x q'o'n tu'n Qman tuj kyq'ab' aj Madián tu'n kykawin kyib'aj.

2Tu'nju kyuw in che yajlantoq aj Madián kyi'j aj Israel, kyja'tzun tzaj kyxob'il aj Israel kywitz aj Madián, ex e jax ewal kyib' tuj kypaxil witz ex kyuj toy' pik ex kyuj qe lugar mas kyuw tu'n kyknet.

3Tkyaqil maj ok tku'x kyawa'n aj Israel kyawal, in che ul aj qe aj Madián, qe aj Amalec ex qe xjal najlqe tuj tjawitz q'ij elq'alte twitz kyawal.

4Ok in che pon qe xjal lu tuj kytx'otx' aj Israel, in b'aj naj twitz kyawal aj Israel kyu'n, ex max in che pon ẍtik'al tuj lugar Gaza. Misikyer kywa aj Israel in kyaj kyklo'n, ex mi jun kyẍne'l, mi jun kywakẍ ex mi jun kychej bur in kyaj kyq'o'n.

5Ok in che pon kyuk'ix qe kyalun in kub' kyq'o'n kyja xb'alun, ex tkyaqil in b'aj naj kyu'n tuj tkyaqil kytx'otx' aj Israel. Nim kyb'aj ok kypon kyuk'ix qe kychej camey, mer ik tza'n txqan ẍplon.

6Tu'n kylaj qe aj Madián, e ok qe aj Israel puro tal yaj; kyja'tzun e ok ten kub'sal twitz Qman tu'n kytzaj onin tu'n.

7Tej kyok ten aj Israel qanil onb'il te Qman tu'n kyklet tuj kyq'ab' aj Madián,

8tzajtzun t-sama'n Qman jun t-sanjel ex tma kye kyja': Chi Qman Dios kyja': Aqine etz q'inte kyeye tuj Egipto jatum ate'toqe te majen;

9mya noq o'kx e klete wu'ne tjaq' kykawb'il aj Egipto, ax ikx e klete wu'ne tjaq' kykawb'il kykyaqil qeju e yajlante kyeye. Kywitzxe e b'je'x nlajo'ne qe xjal tuj tx'otx' lu ex xitzun nq'o'ne kytx'otx' te kyeye.

10Ex xi nma'ne kyeye kyja': Aqine Kymane Dios: Mi'n che k'ulune kywitz kydios aj Amorreo jatum najlqeye ja'lo, ex atzun kyeye minti' ma txi kynimane nyole, chi Dios, chi t-sanjel.

11Ultzun t-anjel Qman ex kub' qe' tjaq' tze' k'ol tuj tnam Ofra. Aju tze' lu te Joás aju tiyjil Abiezer. Ex lu te Gedeón aju tky'ajal Joás in xupintoq tuj triw tuj ewaj tuj lugar jatum nne'l yatz'o'n ta'l twitz uva, tu'ntzun mi'n tilwaj kyu'n aj Madián.

12Kub'tzun tyek'un tib' t-anjel Qman twitz Gedeón ex xi tma'n te kyja':

—A Qman at tuk'ila, aya xinaq at nim tipuna ex kyuw tk'u'ja tuj q'oj.

13Atzunte Gedeón xi ttzaq'we'n:

—Tat, qa a Qman at quk'ile, ¿tiqu'ntzun ma tzaj tkyaqil mya b'a'n lu qi'je? ¿Jattzun qe b'inchb'en ma' kyxilen, aqeju in che yolin qe qmane ti'j, ok in kyma'n qa a Qman etz q'inte qeye tuj Egipto? Ma qo kyaj koline tu'n Qman, ex ma qo'x q'o'ne tuj kyq'ab' aj Madián tu'n kykawin qib'aje.

14Tzajtzun tke'yin Qman ti'j Gedeón ex tma:

—Tu'nju tipuna at, txi'ya kolpil kye aj Israel tjaq' kykawb'il aj Madián. Aqine in chinx samante teya.

15Atzunte Gedeón xi ttzaq'we'ntl:

—Tat, ex ¿tza'n tten tu'n kyklet aj Israel wu'ne? Qe xjal at nxilene kyuk'il atzun qe mas tal yaj qe kyxol tiyjil Manasés, ex aqine mas ch'in woklene kywitz qe txqantl wermaniye.

16Atzunte Qman tzaj ttzaq'we'n:

—Kb'antel tu'na porke aqine chin tele tuk'ila. Kb'el kyi'j aj Madián tu'na mer ik tza'n ok in kub' ti'j junx xjal.

17Xitzun tma'n Gedeón te:

—Qa ma nkamb'aye xtalb'il teya, yek'untza jun techal weye, tu'ntzun tel nnik'e ti'j qa axix tok aya in yolin wuk'ile.

18B'inchama xtalb'il, mi'n tzik' naja tzalu, chin tayoma okxi wule tuk'il jun oyaj waje txi nq'o'ne teya.

Atzunte Qman tzaj ttzaq'we'n:

—Chin ayole ti'ja tzalu okxi tul meltz'aja.

19Xi'tzun Gedeón, kub' tb'yo'n jun tal chip ex b'aj ttzq'ajsa'n; ax ikx b'aj tb'incha'n qe pan minti' t-samel tuj tu'n tjaw mal tk'u'j tu'n jun arrob arin, ku'xtzun tq'o'n chib'j tuj jun chi'l, atzun ta'l chib'j ku'x tq'o'n tuj jun k'il, ex xitzun ti'n tkyaqil max jatum ta' tze' k'ol.

20Atzunte t-anjel Dios xi tma'n te Gedeón: Q'onkuya chib'j tib'aj pik lu, tuk'ix pan minti' t-samel tuj, ex qonxa ta'l chib'j tib'aj. Tb'inchatzun Gedeón ikju.

21Atzunte anjel ok tq'o'n twi tky'aqo'ch ti'j chib'j ex ti'j pan, ex tujtzun pik etz qoptz'aj q'aq'; b'i'x b'aj tz'e'y chib'j ex pan tu'n, ex kub'tzun naj ju t-anjel Qman twitz Gedeón.

22Tejtzun tel tnik' Gedeón ti'j qa t-anjel Qman jlu, o xob' wen ex tma:

—Aya Nman Dios, aku t-anjela ma wile.

23Atzunte Qman tzaj ttzaq'we'n:

—Mi'n xob'a ex mlay kyima. Qe' tk'u'ja.

24Jawtzun tb'incha'n Gedeón jun altar te Qman ex ok tq'o'n tb'i altar kyja': “Ate Qman q'uqb'alte qk'u'j.” Aju altar jaw tb'incha'n Gedeón ax ta' ja'lo tuj tnam Ofra, aju kytanmi tiyjil Abiezer.

25Ax qonik'an jlu tzaj tma'n Qman te Gedeón:

—Q'intza jun tor kyxol qe twakẍ tmana, aju tkab'in tor te wuq ab'q'i, ex q'uchin kub'a t-altar Baal aju te tmana, ex tx'emin jawa tze' aju tilb'ilal xu'j dios Asera aju tkub' junx tuk'il altar te Baal.

26B'inchan jawa jun altar te weye aju Tdiosa max twi pik matij twa'l. Q'inxa ju tor, aju tkab'in, ex patun kub'a te jun chojb'il, ex ax ju tze' aju tilb'ilal xu'j dios Asera aju otoq jaw ttx'emina, k'ajb'el tu'na te si' tu'n tkub' patit chojb'il.

27E tzajtzun ti'n Gedeón laj tmajen ex tb'incha ik tza'nx otoq tma Qman te; noq o'kx minti' tb'incha q'ijl sino qonik'an, tu'nju in xob' kywitz qe terman tman ex kywitz txqantl xinaq aj tnam.

28Te prim tuj juntl q'ij tej kyjaw we' xjal aj tnam, lu t-altar Baal otoq kub' xitj, ax ikx otoq jaw tx'emin aju tze' tilb'ilal xu'j dios Asera aju junx tkub' ttxlaj altar, ex otoq kub' patun jun tor te chojb'il tib'aj ak'aj altar.

29In che xjelintoq xjal kyxolx ex in kyma'n: ¿Alkye ma b'inchante jlu?

Tb'ajlenxi kyxjelin nim, o kyb'i qa tu'n Gedeón aju tky'ajal Joás otoq b'ant jlu, ex xitzun kyma'n te Joás:

30—Q'i'metza tky'ajala ex il ti'j tu'n tkub' qb'yo'ne, tu'nju ma kub' t-xitun aju altar te Baal ex ma jaw ttx'emin ju tze' tilb'ilal xu'j dios Asera aju junx tkub' ttxlaj altar, che chi xjal te Joás.

31Atzunte Joás xi ttzaq'we'n kye xjal kyja':

—¿Maj che onile ti'j Baal? ¿Maj che kolile ti'j? Noq alkye jun taj kolin ti'j Baal, b'a'n tu'n tkyim na'nxtoq qsqix. Qa dios te Baal, kyq'onkje tu'n tklonte tib' tjunalx te, ex tetzun Baal aju altar ma kub' xitun.

32Atxixtzun tuj q'ij lu ok q'o'n tb'i Gedeón Jerobaal, ex in kyma'ntoq xjal kyja': B'a'n tu'n tklonte tib' Baal te Gedeón. Kyma jlu tu'nju kub' t-xitun Gedeón t-altar Baal.

33B'ajtzun kychmon kyib' kykyaqil aj Madián ex aj Amalec, kyuk'ix qe xjal najl tuj tjawitz q'ij, e ik'tz tuj nima Jordán ex atzun e kub' ten tuj chq'ajlaj Jezreel.

34Ex ul T-xew Qman tuk'il Gedeón, ex ok tq'ajtza'n Gedeón jun tkach ẍne'l tu'n tok kychmon kyib' qe tiyjil Abiezer tuk'il;

35ax ikx xi t-sama'n Gedeón qe sanjel txkol kye qe tiyjil Manasés, qe tiyjil Aser, qe tiyjil Zabulón ex qe tiyjil Neftalí, tu'n kytzaj ex tu'n tok kychmon kyib' tuk'il.

36Xitzun tma'n Gedeón te Dios: Qa axix tok chin ajb'ele tu'na tu'n kyklet aj Israel ik tza'nx ma tmaya,

37kb'el nq'o'ne jun ttz'umal ẍne'l tuj lugar jatum nne'l b'ujet triw. Qatzun ak'naj tz'u'm tu'n tq'ab' che'w ok tjawil q'ij, ex atzunte tx'otx' puro tzqij, atzun k'elel nnik'e ti'j qa chin ajb'ele tu'na tu'n kyklet aj Israel ik tza'nx ma tmaya.

38Tb'inchatzun Qman aju o tqani Gedeón. Tej tjaw we' Gedeón te prim, el tyatz'o'n a' ti'j tz'u'm, ex jun laq b'ant tq'ab' che'w tej tel yatz'o'n ti'j tz'u'm.

39Ex xi tma'n Gedeón juntl maj te Dios: Mi'n tzaj tq'oja wi'je tu'nju kukx in chin wuline ti'ja; noq juntl techal waje tu'n tb'ant. Atzun ja'lo b'inchama tu'n mi'n tak' tz'u'm, ex atzunte tx'otx' e tt'aqe' tu'n tq'ab' che'w, chi Gedeón.

40Tuj qonik'an lu b'ant tu'n Dios ikju. Tujtzun juntl q'ij te prim, aju tz'u'm puro tzqij ta', ex atzunte tx'otx' puro nojni tib'aj tu'n tq'ab' che'w.