Job 30 - Mam Huehuetenango New Ortography

1Atzun ja'lo in che tze'n wi'je qe ku'xun mas k'wa'lxix qe nwitze ex minti'wt e k'met qe kyman wu'ne tu'n kyten kyuk'il qe tx'yan in che kwentintoq qe nẍne'le.

2¿Ti tajb'en weye aju kyaq'unb'en xjal lu? Ex minti'tl kyipun

3tu'nju we'yaj nim ex tu'nju minti' at kye. Te qonik'an el kytx'a'n tlok' tze' tzqij tuj tzqij tx'otx' minti' kynajb'il xjal tuj,

4in jatz kyb'aqo'n qe itzaj puro k'a kyxol qe txqantl k'ul, ex tuk'ix tlok' tal tze' retama tb'i in xi kywa'n.

5Ik'un kywitz kyu'n qe xjal ex in che sch'in qe xjal ok in che ok lpe' kyi'j, mer ik tza'n eleq' qe;

6in che najan kyuj qe tqan xaq ex kyuj qe toy' pik ex kyuj jul.

7In che tzanun tjaq' k'ul ik tza'n qe txkup ok tok kychmon kyib' tjaq' k'ul.

8Qe xjal lu minti'x kyajb'en, mya kyajlal qe tuj tnam, o che etz lajo'n kyu'n xjal.

9Atzun ja'lo in che xmayin wi'je ex in chin ok kyq'o'n te kytzeb'l.

10Ma chin el ik'une kyu'n ex in che el laq'e' wi'je ex nno'k kytzub'an tuj nwitze.

11Ja'lo, tu'nju ma tz'el ti'n Dios wipune ex ma chin b'aj tk'ixb'isa'n, kyja'tzun minti' in che xob' nwitze.

12Nnu'l kychmon kyib' ntxlaje ex in chin kub' tz'aqe kyu'n, in che ok tzoqpaj wi'je ex nno'k tilil kyu'n tu'n nkub' kyb'yo'n.

13In kub' kymaqo'n tuj nb'eye tu'ntzun nkub' kyb'yo'n ex mi a'l jun nno'k mayonte kye ti'j.

14Mer ik tza'n ok in che okx tzoqpaj xjal tuj jun toy' muro katl, kyja'xtzun in che tzaj tzoqpaj wi'je tuk'il nim kyipun.

15Ma tzaj nimxix t-xob'il wi'je, ma tz'el woklene ik tza'n kyq'iq' in b'et; tkyaqilju at weye ma kub' naj ik tza'n muj.

16Mi'n wajtle tu'n wanq'ine; ma chin tzyete tu'n k'ixb'isab'l.

17Ma pon ta'w max kyi'j qe nb'aqile; minti' jun aq'b'il miwt in chin k'ixb'isanjtze.

18Ti'j nqule ma chin tzaj tzyu'ne tu'n Dios ex tu'n tipun ma b'aj tchito'n nxb'alune.

19Ma chinx t-xo'n tuj xoq'l, mer ik qine ik tza'n quq ex ik tza'n tza'j.

20In chin qanine onb'il teya Dios, ex minti' in chin tzaj ttzaq'we'na, in chin kub'sane twitza ex minti' in chin tzaj tb'i'na.

21Kyuwxix ma chin b'aj tk'ixb'isa'na ex ma tz'ok tzoqpaja wi'je tuk'il nim tipumala.

22In tq'o'na amb'il tu'n nxi iqane tu'n kyq'iq', ex tu'n nb'aj chito'ne tu'n kyq'iq' jb'al.

23B'a'n wu'ne taja tu'n nkyime, tu'n npone tuj lugar b'animaj kye kykyaqil xjal.

24¿Baqa minti' o chin onine kyi'j qe meb'a ex o che klet wu'ne tuj kymeb'ayil?

25¿Baqa minti' o chin oq'e ti'j xjal nnik'x k'ixk'oj tu'n, ex baqa minti' o tzaj q'aq'an nk'u'je ti'j xjal minti' at te?

26In chin ayontoqe tu'n ntene tuj tzalajb'il, ex te t-xel jlu, tzaj ju mya b'a'n wi'je; in chin ayontoqe ti'j spik'un, ex te t-xel jlu ul ju qlolj.

27Aju wanmiye in putin ex minti' ojlab'l te, o'kx b'is in ayon wi'je.

28B'isb'ajil atine tuj nchwinqlale, minti' in chin exe ti'j tqan q'ij; in chin qanine onb'il kywitz kykyaqil xjal.

29Ma chin oke mer ik tza'n kyerman qe xo'j ex ik tza'n kyamiw qe chyu'j avestrúz kyb'i.

30Aju ttz'umal nximlale ma tz'ok q'eq ke'yin ex nim in julin wi'je tu'n ta'w kyaq.

31Aju kyq'ajq'ajel qe chnab' arpa ex xux ma tz'ok te weye te k'ixk'oj ex oq'el.