Salmos 2 - Mam Huehuetenango New Ortography

Aya nky'ajal

1¿Tiqu'n in che jaw tilj qe xjal kyuj txqantl nasyon? ¿Tiqu'n in kub' kyximan qe xjal jun kyximb'etz noqx gan?

2Qe rey ex qe kawil twitz tx'otx' mi'n kyaj tu'n kyniman Dios, ex junx in che yolin tu'n kyq'ojin ti'j Qman ex ti'j ju rey sk'o'maj tu'n.

3In kyma'n kyja': Qko'pin el qib' tuj kycaden. Qko'pin el aju k'alb'il qe kyu'n, che chi.

4Ate Qman aju in kawin tuj kya'j in jaw tze'n kyi'j;

5in che ok t-xob'tza'n ok in tzaj tq'oj, ex in tma'n kye tuk'il ttx'u'jil:

6Atzunju rey lu sk'o'maj wu'ne. Ma tz'ok nq'o'ne toklen tuj Sión aju witz ma tz'el npa'ne tu'n tajb'en weye.

7Kxel nma'ne aju o tma Qman tu'n tb'ant. O tma weye: Aya nky'ajal, ma chin oke te tmana ja'lo.

8Qanintza qe nasyon weye tu'n kyok te tetzb'ila ex jaku txi nq'o'ne tkyaqil twitz tx'otx' teya.

9Kkawila kyib'aj qe nasyon tuk'il var k'uxb'il; che najel tu'na ik tza'n jun k'il in b'aj b'uchj.

10Ja'lo, aqeye rey ex aqeye in che kawin kyi'j xjal twitz tx'otx', tenx kynab'le ex tz'elx kynik'e ti'j xnaq'tzb'il lu.

11Che ajb'ene te Qman tuk'il tzalajb'il ex nimb'il,

12che mok'ekuye twitz tuk'il tchiylal, porke mya yajku tzaj tq'oj ex jaku che b'aj kyime tu'n ax tuj b'e, porke jurat naj in tzaj tq'oj.

At tzalajb'il kye qeju nno'k qe' kyk'u'j ti'j tu'n kyklet.