1Qman Dios, b'a'n tu'n tjaw nimset tb'iya ex mya aju qeye qb'i tu'n tjaw nimset. B'a'n tu'n tjaw nimset tb'iya tu'nju at tk'ujlalila ex tu'nju axix tok tyola.
2¿Tiqu'n in kyma'n xjal kyuj txqantl nasyon: Jatum ta' Kydios qe jlu? Che chi.
3Aju Qdios atzun ta' tuj kya'j ex in tb'incha'n tkyaqil alkye taj tu'n tb'ant tu'n.
4Qe tilb'ilal in che b'ant kyu'n xjal kyuj txqantl nasyon, saq pwaq ex q'an pwaq kytx'otx'il, ex kyu'nx qe xjal in kub' kyb'incha'n.
5At kytzi' ex mib'an che yolin; at tb'aq' kywitz ex mib'an che ke'yin;
6at kyẍkyin ex mib'an che b'in; at kytxa'n ex mib'an che sqon;
7at kyq'ab' ex mlay tzyet jun ti'xti kyu'n; at kyqan ex mib'an che b'et; mi jun tq'ajq'ajel in jatz tuj kyqul.
8Qe xjal in che b'inchan kye qe tilb'ilal lu ex nno'k qe' kyk'u'j kyi'j, ikx kyten ik tza'n kye.
9Aqeye aj Israel, qe'k kyk'u'je ti'j Qman. A onil qe ex in kolin qi'j.
10Aqeye pal, qe'k kyk'u'je ti'j Qman. A onil qe ex in kolin qi'j.
11Aqeye in che niman te Qman, qe'k kyk'u'je ti'j. A onil qe ex in kolin qi'j.
12Minti' nnik' qna'l tu'n Qman ex qo b'el ky'iwla'n tu'n. Che b'el ky'iwla'n aj Israel tu'n. Che b'el ky'iwla'n qe pal tu'n.
13Che b'el tky'iwla'n qeju in che niman te, tza'nx qeju ma' kyoklen ikx qeju ch'in kyoklen.
14Kuchiwt chmet kyb'aj qe kyiyjile tu'n Qman, ax ikx qe kyiyjil qe kyk'wa'le.
15Awt Qman ky'iwlan kyeye, aju b'inchante kya'j ex tx'otx'.
16Te te Qman aju kya'j, atzunju tx'otx' xi q'o'n kye xjal tu'n Qman.
17Qeju o che kyim ex o che ku'pun tuj kynajb'il kyimni, mlay b'ant tu'n t-xi kyq'o'n chjonte te Qman;
18atzun qe kxel qq'o'n chjonte te Qman ja'lo ex te jumajx.
Nimanxwit tb'i Qman.
Who We AreWhat We EelieveWhat We Do
2025 by iamachristian.org,Inc All rights reserved.
