Éxodo 14 - Mam Huehuetenango New Ortography

Tej kyik'x aj Israel tuj Mar Kyaq Ke'yin

1Tzaj tma'n Qman te Moisés kyja':

2—Q'manxa kye aj Israel tu'n kyq'on welt ex e kykub' ten twitz Pi-hahirot, t-xol tnam Migdol tuk'ix mar, tumlal Baal-zefón. Atzun che b'el ten twitz lugar lu ttzi mar,

3ex jaku kub' t-ximan Faraón kyja': Ma che el tzpet aj Israel tuj tzqij tx'otx' ma chixin ex minti' jatum b'a'n kyxi', chilo.

4Kb'el nkyuwsa'ne tanmi Faraón tu'n tok lpe' kyi'je, ex chin jawil nimsa'ne ok tkub' ti'j Faraón wu'ne, kyuk'ix kykyaqil qe t-soldad, ex k'elel kynik' aj Egipto wi'je, aqine Kymane, chi Dios.

O kyb'incha aj Israel ik tza'n otoq tzaj q'ma'n kye.

5Tej tpon tqanil tuk'il rey te Egipto qa otoq che ex oq aj Israel, b'aj tch'expu'n t-ximb'etz, ax ikx qeju attoq kyoklen ttxlaj, ex kyma kyja': ¿Tza'n tten ma txi qq'o'n amb'il kye aj Israel tu'n kyex, ex ya mi'ntl che ajb'en qe? Che chi.

6B'ant tten tcarwaj Faraón, ex e je'x ti'n qe t-soldad tuk'il.

7E je'tz t-sk'o'n qaq syent carwaj tb'anilxix, ax ikx e je'x ti'n kykyaqil qe carwaj tuj Egipto, ex e je'x junjun nejenel kyujile.

8Kub' tkyuwsa'n Qman tanmi Faraón aju rey te Egipto, ex ok lpe' kyi'j aj Israel, aqeju otoq che etz kyuw kyk'u'j wen.

9E je'tztzun qe aj Egipto kyuk'ix kykyaqil qe soldad, kyuk'ix qe carwaj ex qeju kyjaxtoq kyib'aj chej, e ok lpe' kyi'j aj Israel tu'n kytzyet, ex e pon knet aj Israel kyu'n, lu qe otoq che kub' ten ttzi mar, ttxlaj Pi-hahirot, tumlal Baal-zefón.

10Tejtzun kylonte aj Israel otoq tzul laq'e' Faraón kyuk'ix qe aj Egipto, tzaj nimxix kyxob'il ex jaw tq'ajq'ajel kywi' in che qanin onb'il te Qman,

11ex xi kyma'n te Moisés kyja':

—Baqa minti' lugar tu'n qku'x maqu'ne tuj Egipto, tu'nju ma qo etz ti'na tu'n qkyime tuj tzqij tx'otx'. ¿Tiqu'n ma tb'inchaya qi'je ikju? ¿Tiqu'n ma qo etz ti'na tuj Egipto?

12¿Myapetzun o txi qma'ne jlu teya tuj Egipto? Qo chiye kyja': Qo tq'onkja tuj txub'txaj. Qo ajb'ele kye aj Egipto, ex mas b'a'n te qeye tu'n qajb'ene kye twitzju tu'n qkyime tuj tzqij tx'otx', qo chiye, che chi.

13Xitzun tma'n Moisés kye:

—Mi'n che xob'e. Che we'kuye ex kyke'yinxe aju kolb'il ok tb'incha' Qman kyeye ja'lo. Qe aj Egipto in kyile ja'lo, te jumajx mlay kyiltle.

14Ate Qman kq'ojel te kyxele. Mi'n b'aj kyk'u'je, chi Moisés.

15Tzajtzun tma'n Qman te Moisés kyja':

—¿Tiqu'n in tzaj tqanina onb'il weye? Q'manxa kye aj Israel tu'n kyb'et-x.

16Q'in jaw tky'aqo'cha, nuqpinx tq'ab'a tib'aj mar, ex pa'n ela. E kyik'x aj Israel tuj tmij mar tuj tzqij.

17Kb'el nkyuwsa'ne kyanmi aj Egipto tu'n kyok lpe' kyi'je, ex chin jawil nimsa'ne ok tkub' ti'j Faraón wu'ne, kyuk'ix qe t-soldad, qe tcarwaj ex qeju kyjax kyib'aj chej.

18K'eleltzun kynik' aj Egipto wi'je qa aqine Kymane, ok tkub' ti'j Faraón wu'ne, kyuk'ix qe tcarwaj ex qe t-soldad kyjax kyib'aj chej, chi Qman.

19Aju t-anjel Dios nejnitoq kywitz aj Israel nej, aj ttzal kyi'j, ax ikx aju muj nejnitoq kywitz, kyaj ten kyi'jxi.

20Kyja'tzun tten, kub' ten muj kyxol aj Egipto kyuk'il aj Israel. Mujtoq ex qloljtoq kywitz aj Egipto; atzun kywitz aj Israel, spik'untoq qonik'an. Minti' e pon knet aj Israel kyu'n aj Egipto tuj enter qonik'an lu.

21Xi tnuqpi'n Moisés tq'ab' tib'aj mar. Tkyaqil qonik'an lu el tpa'n tib' mar tu'n Qman tu'n jun nintz kyq'iq' tzaj tuj tjawitz q'ij. Kyja'tzun tten kub' tpa'n tib' a', ex tzqij kyaj tmij mar.

22E ik'tztzun aj Israel tuj tmij mar jatum otoq kyaj tzqij; kyaj ten mar tuj kyb'anq'ab' mer ik tza'n muro, ax ikx tuj kynayaj.

23E ok lpe' aj Egipto kyi'j, kyuk'ix kykyaqil qe tchej Faraón, qe tcarwaj ex qe t-soldad kyjaxtoq kyib'aj chej, ex e jo'kul max tuj tmij mar.

24Tej ch'ixtoq qsqix, max tuj tqan q'aq' ex tuj muj e tzaj tke'yin Qman qe soldad aj Egipto, ex b'aj ttzpet-sa'n kynab'l.

25E b'aj ko'pj qe kyrwed carwaj, ex pen b'ant kyb'et. Kymatzun aj Egipto kyja': Qo el oq kywitz aj Israel, porke a Kyman in q'ojl qi'j te kyxel tu'n kyklet, che chi.

26Tzajtzun tma'n Qman te Moisés kyja':

—Nuqpinx tq'ab'a tib'aj mar, tu'ntzun toktl tmojb'an tib' a' kyib'aj aj Egipto, kyib'aj qe kycarwaj ex kyib'aj qe soldad kyjax kyib'aj chej, chi Qman.

27Xitzun tnuqpi'n Moisés tq'ab' tib'aj mar. Tej tkub' q'ij ajtz mulq'aj mar ex pon tuj tlugar ik tza'n tten nej. Tej kyel oq aj Egipto, ax e pon takl ti'j mar. Kyja'tzun tten e b'aj t-xitun Qman tuj mar.

28Ok tmojb'an tib' a' ik tza'n tten nej, ex b'i'x e kyaj mulq'aj qe carwaj tuj mar, kyuk'ix qe soldad kyjaxtoq kyib'aj chej ex kykyaqil qe t-soldad Faraón, aqeju otoq che ok lpe' kyi'j aj Israel. Mi jun soldad o kyaj anq'in.

29Atzun kye aj Israel e ik'tz tuj tmij mar tuj tzqij. Toktoq a' ik tza'n jun muro tuj kyb'anq'ab' ex tuj kynayaj.

30Kyja'tzun tten tuj q'ij lu e klet aj Israel tu'n Qman tuj kyq'ab' aj Egipto, ex o kyil aj Israel noq kyximlal aj Egipto palch ttzi'yile mar.

31O kyil aj Israel aju b'inchb'en ma'xix t-xilen lu otoq tb'incha Qman kyi'j aj Egipto, e xob' twitz, e niman te, ex qe' kyk'u'j ti'j ex ti'j Moisés aju tmajen.