Jeremías 9 - Mam Huehuetenango New Ortography

1Noqwit jaku tz'ok nwi'ye ex qe tb'aq' nwitze ik tza'n jun twi a', tu'ntzun njaw oq'e q'ijl ex qonik'an tu'n kylaj qe nxjalile ma che kyim.

2Noqwit jaku knet jun tal nposadiye tuj lugar minti' kynajb'il xjal tuj, tu'ntzun wel laq'e'ye najchaq kyi'j qe nxjalile, ex kykyaqil ma tz'el kypa'n kyib' ti'j Dios, kykyaqil jumajx mya b'a'n qe.

3In che xo'n nik'aj yol kyi'j kyuk'il ik tza'n in che'x xo't plech tu'n xob'l te. Tuj tnam lu o'kx in che yolin ti'j nik'aj yol, minti' in che yolin axix tok; mas il in kyb'incha'n junjun q'ij ex minti' nne'l kynik' wi'je. Aqine Dios in chin q'mante jlu.

4Mi'n tz'ok qe' kyk'u'je kyi'j kyamiwoye ex mi ti'j kyermaniye, porke aqeju kyerman kyib' in sb'un jun ti'j juntl ex aqeju xjal kyamiw kyib' in jaw kynik'an yol jun ti'j juntl.

5Teylex te junjun in sb'un ti'j juntl, minti' jun in yolin axix tok; ma naq'et kytzi' tu'n kynik'an yol ex jumajx mya b'a'n kyb'inchb'en.

6Chi Qman kyja': Puro nik'aj yol in kyma'n, kukx in che sb'un ex minti' kyajb'il tu'n tel kynik' wi'je.

7Kyja'tzun chi Qman aju Tajaw Tkyaqil, in tma'n kyja': ¿Ti juntl kb'antel wu'ne kyi'j qe xjal etzan wu'ne? Che okex nq'o'ne tuj q'aq' tu'ntzun tel b'aj ttz'ilil kyi'j.

8Aju kytzi' ik tten ik tza'n jun plech b'a'n b'iyun, noq nik'aj yol in kyma'n. In xi kyq'olb'e'n qe kyuk'il tu'n kyk'ujlalil, ex noq tten kyu'n, porke noq tku'x ti'j kyk'u'j tu'n kyb'inchante mya b'a'n kyi'j.

9¿Mi'npetzun tzaj kycastiw wu'ne tu'n tlaj kyb'inchb'en lu? ¿Mi'npetzun txi nq'o'ne t-xel kyb'inchb'en xjal mya b'a'n lu? Chi Qman.

10Chin oq'ele ex chin wuyile kyi'j qe witz ex kyi'j qe chq'ajlaj jatum in che wa'ntoq wakẍ, porke ya minti' alumaj kyuj ex minti' xjal in b'et kyuj; ya minti' in che b'injtz alumaj in che muyin; kyuk'ix qe chyu'j ex qe txkup ma che ex oq.

11Noq ttx'aqan tnam Jerusalén kyjel b'uye' wu'ne ex te kynajb'il wech k'okel; minti' jun ti'xti kyjel ten kyuj qe tnam ate' tuj tx'otx' Judá wu'ne, ex minti' xjal kyjel ten kyuj.

12¿Alkye jun at nimxix tnab'l tu'n tel tnik' ti'j jlu? ¿Al e ma txi tyek'un Qman jlu tu'n tb'ant tchik'b'ante kye txqantl? ¿Tiqu'n ma naj tx'otx' ex ma tz'ok ik tza'n jun tzqij tx'otx' jatum minti' jun in b'et tuj?

13Atzunte Qman tzaj ttzaq'we'n: Ma b'inchet tkyaqil jlu porke ma kyaj kykolin aj Israel nleye, aju xi nq'o'ne kye; minti' ma chinx kyniman ex minti' ma japun nleye kyu'n.

14Noq o'kx ma kyb'incha aju kyex kyajb'il ex ma che k'ulun kywitz qe tilb'ilal Baal, ik tza'n e tzaj xnaq'tza'n kyu'n kyman.

15Kyja'tzun, aqine Dios aju Tajaw Tkyaqil ex Kydios aj Israel in xi nma'ne jlu: Kxel nq'o'ne kywa puro k'a ex kxel nq'o'ne kyk'a' a' xi'yni venen tuj.

16Che b'ajel nsputune kyuj qe nasyon minti' ojtzqi'n kyu'n mi kyu'n qe kyman, ex che xel nsama'ne qe soldad q'ojlel kyi'j okxi kykub' b'aj kykyaqil.

In che oq' xjal tu'n ta'w kyb'is tuj Jerusalén

17Ate Qman aju Tajaw Tkyaqil in tma'n: Kyq'ontz kywi'ye ti'j jlu, kytxkontze qe xu'j o'kx kyaq'un tu'n kyok ten oq'el, tu'n kyul nej; kyi'ntze qeju mejor che oq'.

18Ax tok, e kytzaj naj tu'n kyok ten oq'el qi'j; e tel nim ta'l qwitz kyu'n ex e tb'aj noj ttxo'w qwitz tu'n ta'l qwitz.

19In b'injtz tq'ajq'ajel oq'el tuj tnam Sión: Ay, ma qo naj. Nim qch'ixwi ma tzaj. Il ti'j tu'n tkyaj qkolin qtanmi porke ma che b'aj naj qe qja, che chi xjal.

20Aqeye xu'j, kyb'intze aju tyol Qman, kyq'ontz kywi'ye ti'j ju in tma'n: Kyxnaq'tzanxe qe kyale xu'j tu'n tb'ant kyoq', atzun kye qe kyuk'ile xu'j tu'n kywuyin.

21Porke ma tz'okx kamik ttzi tventanil qja ex ma tz'okpun tuj qnajb'il, tu'n kyb'aj naj qe k'wa'l ate' kyuj cay ex qe ku'xun ate' kyuj plas.

22Aju kyximlal kyimni ma che kyaj pale' ik tza'n kytxa' alumaj tuj kojb'il, ex ik tza'n junjun che'l triw in kyaj tz'aq tu'nju chmolte, ex mi a'l jun in jaw sk'onte. A Qman in q'mante jlu.

23Chi Qman: Mi'n jaw tniman tib' ju xjal at nab'l, tu'nju at tnab'l, mi ju at nim tipun tu'nju at nim tipun, ex mi ju q'inun tu'nju at tq'inumab'l.

24Qa at jun taj tu'n tjaw tniman tib', e tjaw tniman tib' tu'nju ojtzqi'n qine tu'n ex ma tz'el tnik' wi'je, qa aqine Dios in nb'incha'ne tkyaqil tu'n nk'ujlalile, tuj tumelxix ex tz'aqlxix, ex atzun jlu in chin tzalaje ti'j. Aqine Dios in chin q'mante jlu.

25Aqine Dios in chin q'mante jlu: Tzul tq'ijlalil tu'n tkub' kycastiw wu'ne kykyaqil qeju sircunsidarimaj qe ex qeju mya sircunsidarimaj,

26ik tza'n qe aj Egipto, aj Judá, aj Edom, aj Amón, aj Moab, ex kykyaqil qeju najl tuj tzqij tx'otx' ex nne'l kymatzo'n ttzmal kywi' ttxlaj kyẍkyin, ex kykyaqil nasyon lu, mya sircunsidarimaj qe ax ikx kykyaqil aj Israel mer ik tza'n mya sircunsidarimaj qe, porke minti' ma japun kyu'n aju yol kyaj b'ant ti'j wu'ne kyuk'il.