Ezequiel 5 - Mam Huehuetenango New Ortography

El tmatzo'n Ezequiel ttzmal twi'

1Ex tzaj tma'n Qman weye kyja': Atzun ja'lo aya xjal, q'intza jun kchil b'anin ttzi' ik tza'n jun navaj in ajb'en te q'ib'l xmatzb'aj, q'i'mela ttzmal twi'ya tuk'ix t-xmatza tu'n kchil lu. Ex jurat q'intza jun balans, ex aju ttzmal twi'ya ox pa'n tz'e'la tu'na.

2Oktzun tb'aj q'oj ti'j tnam, patun kub'a tuj tnam jun pa'n kyxol qe ox pa'n ttzmal twi'ya; te tib'ajxi q'intza jun kchil ex qesin kub'a juntl pa'n ttzmal twi'ya ti'jele tnam, ex aju toxin pa'n ttzmal twi'ya chitunxa tuj kyq'iq'. Aqine chin xele q'ojlel kyi'j xjal ate' tuj tnam tuk'il jun spad tokxsa'n tuj nq'ab'e.

3Q'in jawa junjun ttzmal twi'ya ex k'alo'nka ttxa'n t-xb'aluna.

4Ex ax kyi'j jlu q'i'n ela junjuntl ex q'o'nkxa tuj q'aq' tu'n ttz'e'y; kyi'jtzun jlu k'elel q'aq' tu'n kynaj kykyaqil xjal aj Israel.

5Aqine Dios in chin q'mante jlu: Atzun tnam Jerusalén lu, aqine in kub' q'onte te kymijil qe tnam ex kyxol txqantl nasyon ate' ti'jele.

6Ex qe xjal lu ma tz'el kypa'n kyib' kyi'j qe nleye ex kyi'j qe nmandamyente, ex mas pyor ma che ok kywitz qe tnam ex qe nasyon ate' kyi'jele, ma tz'el kyik'un qe nleye ex minti' ma che japun qe nmandamyente kyu'n.

7Kyja'tzun, aqine Dios in chin q'mante jlu: Aqeye nimxix ma jaw kyi'n kyib'e kywitz qe nasyon ate' kyi'jeleye, ex minti' ma txi kynimane qe nmandamyente ex nleye, ex minti'lpe ma japun kyu'ne kyley qe tnam ate' kyi'jeleye.

8Kyja'tzun aqine Dios in chin q'mante jlu: Ax ikx weye chin okele aj q'oj kyi'je, aqeye aj Jerusalén; kb'el kysentense wu'ne kywitzx qe txqantl nasyon;

9kb'el jun kycastiwoye wu'ne tu'n tlaj tkyaqil kyb'inchb'ene ik'b'ilxix; na'nx nb'inchanteye jun maj ikju. Ex mlay nb'inchaye juntl maj.

10Kyxolxe at junjun mamb'aj kxel kychyo'n kyk'wa'l, ex at junjun k'wa'l kxel kychyo'n kyman. Kb'el kysentense wu'ne, ex qe xjal che kyjel anq'in che xel nsputune tuj tkyajil pak' twitz tx'otx'.

11Aqine Dios kxel nma'ne jun yol axix tok wu'nx wib'e, ma b'aj kytz'ilsa'ne njaye xjan tu'nju okx kyi'ne qe tilb'ilal ik'b'ilxix tuj ex tu'n tkyaqil kyb'inchb'ene mya b'a'n, tu'ntzun jlu ax ikx weye che b'ajel naj wu'ne, mi'n tzaj q'aq'an nk'u'je kyi'je ex mlay tzik'x ti'j tu'n mi'n tkub' kycastiwoye.

12Aju toxin k'loj xjal najlqe tuj tnam Jerusalén che kymel tu'n tx'u'j yab'il ex tu'n we'yaj tujx tnam, ex atzun juntl toxin k'loj b'yo'n che b'el ti'jele tnam kyu'n aj q'oj, ex atzun juntl toxin k'loj che xel nsputune tuj tkyajil pak' twitz tx'otx'. Ax qine chin xe'le q'ojlel kyi'j, tuk'il jun spad tokxsa'n tuj nq'ab'e.

13Kjawitz b'aj nq'oje; kb'ajel ntx'u'jile at kyi'j ex b'i'x kchewixtel nk'u'je. Oktzun tjatz b'aj nq'oje kyi'j, kykyaqil aj Israel k'elel kynik' ti'j qa otoq chin yoline ikju tu'nju tzaj nq'oje kyi'j.

14Aya tnam Jerusalén kb'el nxitune; ex qe xjal ate' tuja ktzajel kych'ixwi kyxol txqantl nasyon ate' ti'jeleya, tu'ntzun tok kyke'yin kykyaqil qeju che ik'el b'et ttxlaja.

15Oktzun tkub' kysentense wu'ne tuk'il ntx'u'jile ex nq'oje, ex ok tkub' kycastiwoye wu'ne kyuwxix wen, kykyaqil xjal che okel ten xmayil kyi'je ex che elel ik'une kyu'n, ex qe nasyon ate' kyi'jele che jawil sek'paj tu'n kyxob'il ok kylonte aju castiw ma'xix otoq tzaj kyib'aje. Aqine Dios ma chin q'mante jlu.

16Tzul we'yaj kyi'je wu'ne, mer ik tza'n in che tzaj xo'n qe plech xob'ajilxix tu'n kynaje kyu'n. Ax tok che najele tu'n we'yaj, ex mlay tzaj knet kywaye.

17Ax tok tzul we'yaj kyi'je wu'ne, tzul yab'il ex tzul kamik kyxole, ex mi jun kyk'wa'le kyjel ten kyu'n qe txkup te tjaq' k'ul, ex nimku kyeye che kymel tuj q'oj. Aqine Dios ma chin q'mante jlu.