Job 24 - Mam Huehuetenango New Ortography

1¿Tiqu'n minti' in tzaj tma'n Dios aju at tipumal tu'n tb'ant tkyaqil tu'n jtoj tu'n t-xi tb'incha'n kyi'j xjal, tu'ntzun tok kyke'yin qeju in che niman te?

2Qe xjal mya b'a'n in b'aj kych'expu'n kymojonil tx'otx', in xi kyelq'a'n kyẍne'l xjal tu'ntzun tchmet kyb'aj qe kyẍne'l;

3nne'l kyi'n kybur qe k'wa'l minti' kyman ex kytxu' ex nne'l kyi'n kywakẍ qe meb'a xu'j te prent.

4Nne'l kylajo'n qe meb'a xjal tuj b'e, ex tu'n jlu in xi kyewan kyib' qe meb'a xjal kywitz.

5Qe meb'a ik kyten ik tza'n qe bur te tjaq' k'ul ate' tuj tzqij tx'otx', nim in che aq'nan tu'n tknet kywa, ex atzun tuj tzqij tx'otx' in knet kywa kyk'wa'l.

6In che'x sukwil triw tuj kykojb'il xjal, ex sukwil twitz uva tuj kytx'otx' xjal mya b'a'n.

7Nne'x aq'b'il kyu'n minti' jun kyxb'alun tok te txayb'il kyi'j; kukx in kub' kyapa'n che'w.

8In che ak' tu'n jb'al in kub' twi witz, ex in che'x xmujil t-xe pik.

9Qe xjal mya b'a'n in xi kyi'n qe tal ne' kukx kych'u'n, kyal qe meb'a xu'j, ex nne'l kyi'n kyk'wa'l qe xjal meb'a tu'n tlaj minti' in chjet kyk'as.

10Qe xjal meb'a in che b'et minti' kyxb'alun tok. O'kx in che iqan kytriw xjal, atzun kye nim we'yaj nnik'x kyu'n.

11In che che'n ti'j twitz olivo tu'n tb'ant aseyt kyu'n; in che wab'an ti'j twitz uva tu'n tb'ant kyk'a xjal vin, ex atzun kye nim txqetle'n nnik'x kyu'n.

12Tuj tnam in che oq' ex in che ayin kyuwxix wen aqeju ch'ix kykyim, atzunte Dios minti' in tzaj tb'i'n kyna'j Dios.

13At junjun xjal nne'l kyik'un aju spik'un ex tuj tkyaqil kyb'e nne'l kypa'n kyib' ti'j.

14Atx qwitz in jaw we' aju b'yol xjal tu'n tkub' tb'yo'n ju meb'a, ex ok ttzaj qlolj nno'k ten elq'al.

15Aju xjal aj pajil noq yo'n tu'n ok tok qax ex oktzun nno'k tmaqsi'n twitz, tuj t-ximb'etz qa mi a'l jun jaku tz'el tnik' ti'j.

16Qe eleq' nno'kx kylaku'n t-xe kyja xjal qonik'an. Kykyaqil jlu kyewan kyib' q'ijl; kyk'i' tu'n kyten tuj spik'un.

17Aju t-spik'umal q'ij ik tten te kye ik tza'n qlolj nimxix; mas b'a'n tuj kywitz tu'n kyb'et qonik'an, porke minti' t-xob'il kyi'j.

18Aju xjal mya b'a'n in xi iqan tu'n a' in b'et kyuw wen. Aju ttx'otx' in tzaj qanin mya b'a'n tib'aj, ex mi a'l in aq'nan ti'j tqan t-uva.

19Ik tza'n in kub' ulj ttxa che'w tu'n ta'w kyaq; kyja'xtzun in kub' naj xjal aj il tuj muqb'il.

20K'ik'el tna'njtz tu'n ttxu'; ex kb'ajel wa'n kyu'n ẍuq', ex mi a'l jun ktzajel na'nte te. Aju xjal mya b'a'n knajel ik tza'n jun tze' ok nnik' tx'emin.

21O k'ixb'isan kyi'j qe xu'j mib'an che alin ex kyi'j qe meb'a xu'j; ex minti' onin kyi'j.

22Atzunte Dios, tu'n tipumal in che kub' t-xitun qe xjal at nimxix kyipun; ok tkawin Dios kyib'aj mi a'l jun xjal segur ta' tchwinqlal twitz.

23In xi tq'o'n Dios amb'il kye tu'n kyanq'in tuj txub'txaj, ex tok tkwent ti'j tza'n in che b'et twitz.

24Aju xjal in jaw tniman tib' noq ch'in tuj in ten, jurat in kub' naj. Ik tten ik tza'n k'ul in tzqij ok in jatz b'aqo'n, ex ik tza'n twi triw in kub' paqtz'u'n.

25Ex qatzun mya ik ttenju, ¿alkye jun jaku tma weye qa noq tten wu'ne, ex tu'n ttzaj tma'n qa ma chin tzpete ti'j?