Joel 2 - Mam Huehuetenango New Ortography

Tej kyul tzoqpaj qe ẍplon

1Kyq'ajtzan oke chun twi witz Sión; kyq'ajtzan oke te jun tqanil te xob'ajil twi' ju witz xjan te Qman. B'a'n tu'n kytzaj lu'lun kykyaqil aj Judá, porke ma tzul kanun ju q'ij te castiw tu'n Qman:

2Jun tq'ijlalil qlolj wen, jun tq'ijlalil te q'eq muj ex te xlekun. Ik kyten qe ẍplon ik tza'n txqan soldad nimxix kyipun ex nim kyajlal, ma b'aj noj kywi' qe witz kyu'n, mer ik tza'n tqan q'ij ok in jawil qoptz'aj. B'ajx tzaj jun maj ikju ex mlay tzaj juntl maj ik tza'n jlu.

3Ik kyten qe ẍplon ik tza'n q'aq' tkyaqil in b'aj naj tu'n; in b'aj tz'e'y tu'n na'nxtoq tpon kanun ex kukx tb'aj tz'e'y tu'n te tib'ajxi. Tej kypon kanun qe ẍplon, ik tten twitz tx'otx' ik tza'n tqan awal tb'anilxix tuj Edén, oktzun kypon kanun, ik nno'k kyu'n ik tza'n tzqij tx'otx' minti' awal tuj. Ex mi jun in kyaj klet kyu'n.

4Aju kyilb'ilal ẍplon mer ik tza'n kyilb'ilal chej ex in che ojqelan wen ik tza'n qe xjal kyjax kyib'aj chej.

5Aju tq'ajq'ajel ok kylipan kywi witz mer ik tza'n kyq'ajq'ajel qe carwaj ok kyb'et tuj q'oj, mer ik tza'n ok in spoqoqon t-xaq tze' ok ttz'e'y tu'n q'aq' ex mer ik tza'n txqan soldad at nim kyipun txolsa'n kyten tu'n kyq'ojin.

6B'i'x in che tzaj lu'lun qe xjal ok kyke'yinte, ex tkyaqil kywitz puro spelin nno'k.

7In che ojqelan ik tza'n qe xjal, kyuw kyk'u'j tuj q'oj ex in che jax kywi' qe muro tok ti'jele tnam ik tza'n qe soldad; teyle te junjun in xi ti'n tb'e, ex mi jun in xi ti'n juntl b'e.

8Mi jun in jaw tz'aq ti'j juntl tuk'il; teyle junjun q'i'nx tb'e; maske in q'ajt kykub' plech kyxol, minti' in che b'aj sputj.

9In che ok tzoqpaj ti'j tnam, in che okx ojqelan twi muro toksa'n ti'j tnam, in che jax tu'n kyokx kyuj kyja xjal, ex mer ik tza'n eleq' qe in che okx ttzi ventan.

10In tzaj lu'lun tx'otx' kywitz ex b'i'x in tzaj yukch kya'j, b'i'x nno'k yupj twitz q'ij tuk'ix twitz xjaw, ex minti'tl in che qoptz'aj che'w.

11A Qman nejenel kywitz t-soldad ex in b'injtz tq'ajq'ajel twi'. Mas kyajlal qe t-soldad ex nim kyipun qeju in japun ju tyol kyu'n. Ma'xix toklen ex xob'ajilxix aju tq'ijlalil tzul tu'n Qman. ¿Alkye jun jaku tzik'x tu'n?

Aju tq'aq'b'il tk'u'j Qman

12Atzun ja'lo, kyajtz meltz'aje wuk'ile tu'n tkyaqil kyanmiye; kyyo'n kub'e we'yaj, che oq'e ex che ayayane, chi Qman.

13Kyajtz meltz'aje tuk'il Qman aju Kydiose, tzajx ta'w tuj kyanmiye ex mya tu'n tb'aj kysb'it'un kyxb'alune. Porke ate Qman at xtalb'il tuk'il ex at nim tq'aq'b'il tk'u'j, nim tpasens ex nim tk'ujlalil ex jaku chewix tk'u'j tu'n mi'n tkub' kycastiwoye.

14Mya yajku kub' t-ximan tu'n mi'n tkub' tq'o'n kycastiwoye, ex tzul tq'o'n t-xtalb'il kyeye kyja': Tzul twitz awal ex ta'l twitz uva tu'ntzun t-xi kyq'o'ne jun oyaj te Qman aju Kydiose.

15Kyq'ajtzan oke chun twi witz Sión, kymanxe kye xjal tu'n tkub' kyb'uyin kyib' ex kymanxe kye tu'n tkub' kyyo'n we'yaj.

16Kychmon oke qe xjal etzan tu'n Dios, kychmon oke qe tij xjal ex qe k'wa'l, kyuk'ix qeju kukx kych'u'n, ex kyuk'ix qeju k'itzqe kyoklen moje', e kyetz tuj kyja.

17E kyjaw oq' qe pal aqeju in che ajb'en te Qman, e kyjaw oq' t-xol ttzi tja Dios tuk'ix altar, ex kymanx kyja': Najsama Qman aju kyil qe xjal etzan tu'na, mi'n taq'a amb'il tu'n kyxmayin xjal kyi'j qeju etzan tu'na; miwt kub' kyi'j kyu'n txqantl nasyon ex miwt kyma qe xjal mya okslal ti'ja: ¿Jatum ta' Kydios qe xjal lu?

18Tzajtzun tlo'ch tk'u'j Qman tu'n tlaj mya b'a'n kyb'incha xjal ti'j tx'otx' etzan tu'n, ex tzaj tz'e'y tk'u'j kyi'j qe xjal etzan tu'n

19ex tma kyja': Kxel nq'o'ne triw tuk'ix ta'l twitz uva ex tuk'ix kychi'ye aseyt tu'ntzun kynojxixe wen, ex mlay txi nq'o'ne juntl maj amb'il tu'n kyxmayinjtze kyu'n qe mya okslal.

20Che elel wi'ne qe ẍplon kyxole, aqeju ma che tzaj tuj tb'anq'ab' q'ij, ex che xel nlajo'ne tuj tzqij tx'otx'. Aqeju nejenel kywitz che xel nlajo'ne tuj mar tuj tjawitz q'ij, ex qeju lepchix kytzaj kyi'j che xel nlajo'ne tuj nintz mar tuj telex q'ij, aju kyximlal b'i'x kq'aytel ex ok che xewtel. Ok nb'incha'ye ju nb'inchb'ene ma' t-xilen.

21Aya tx'otx', tzalajxa nim ex mi'n xob'a ok che b'antel qe b'inchb'en ma' kyxilen tu'n Qman.

22Mi'n che xob'e aqeye txkup te tjaq' k'ul, aju kywab'le tuj k'ul tzul t-xul, qe tze' ktzajel kyq'o'n kywitz ex qe tqan higo tuk'ix tqan uva ktzajel kyq'o'n nim kywitz.

23Che tzalajxe aqeye xjal najl tuj tnam Sión, che tzalajxe ti'j Qman aju Kydiose, porke a Qman ma tzaj q'onte jb'al kyib'aje tujxix tq'ijlalil, aju jb'al in ku'tz nej ex aju in ku'tz te tib'ajxi, ik tza'nxix in ku'tz ojtxi.

24Kjawil kychmo'ne nim twitz triw, nim ta'l twitz uva kchmetel tuj tkub'il, ax ikx chib'j aseyt.

25Nim kxel nq'o'ne kyeye te t-xel ju twitz kyawale o naj kyu'n junjun ẍplon kyuj qe ab'q'i o che ex, ik kyten qe jlu ik tza'n txqan soldad nim kyajlal tej kytzaj nsama'ne kyi'je.

26Che wa'le okxi kynoje wen, ex chin jawil kynimsa'ne, aqine Kydiose, porke aqine in b'inchante qe b'inchb'en ma' kyxilen kyeye. Ex mlay kub' juntl maj kych'ixwi qe xjal etzan wu'ne.

27K'elel kynik'e wi'je, aqeye aj Israel, aqine atine kyuk'ile, aqine Dios aju Kymane ex minti' juntl. Mlay kub' juntl maj kych'ixwiye, aqeye etzan wu'ne.

Tzul tq'o'n Dios aju Xewb'aj Xjan

28Te tib'ajxi tkyaqil jlu ktzajel nq'o'ne Nxewe tuj kyanmi kykyaqil xjal: Qe kyky'ajale ex qe kyme'jele che okel te nsanjele tu'n t-xi kypakb'a'n nyole kye xjal, qe tij xjal kyxole k'elel kynik' ti'j tuj witzik' aju wajb'ile kye, ex qe ku'xun ate' kyxole at ktzajel yek'un kye mer ik tza'n tuj witzik'.

29Ax ikx ktzajel nq'o'ne Nxewe tuj kyanmi qe majen xinaq ex qe majen xu'j tuj tq'ijlalil tzul;

30Ktzajel nyek'une nb'inchb'ene ma' t-xilen twitz kya'j, ax ikx twitz tx'otx' ktzajel nyek'une chik' ex q'aq' tuk'ix sib' in b'uqin.

31Kmeltz'ajel q'ij tu'n tok te qlolj, ex aju xjaw k'okel ke'yin ik tza'n chik'; kb'antel jlu na'nxtoq tpon tq'ijlalil tu'n tul Qman, jun q'ij ma' toklen ex xob'ajilxix.

32Ex kykyaqil qeju in che kub'san twitz Qman che kletel, porke aju kolb'il atzun ta' twi witz Sión ex tuj tnam Jerusalén, ik tza'n o tzaj ttziyan Qman. Qe xjal sk'o'maj tu'n che anq'il.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help