Jueces 11 - Mam Huehuetenango New Ortography

Jaw kysk'o'n aj Israel Jefté te nejenel kye

1Ate Jefté aju aj Galaad kyuwxix tk'u'j tuj q'oj, tal jun xu'j jawni twitz kyuk'il xinaq ex tky'ajal jun xinaq Galaad tb'i.

2Ex tu'nju e tzaj txqantl tky'ajal Galaad ti'j ju merxix t-xu'jil, kyja'tzun tej tch'iy q'a lu, ex lajo'n Jefté kyu'n, ex xi kyma'n te kyja': Teya minti' toklena ti'j ju etzb'il te qman tu'nju part teya ttxu'.

3Tu'ntzun jlu el oq Jefté kywitz qe terman ex xi' najal tuj tx'otx' Tob. Atzun b'aj tchmo'n jun k'loj xjal minti' kyaq'un ex e ok lpe' ti'j.

4Tb'ajlenxi nim q'ij, e pontzun aj Amón q'ojlel kyi'j aj Israel,

5ex atzun kye nejenel kye aj Galaad xi txokb'aj Jefté kyu'n tuj tx'otx' Tob,

6ex xi kyma'n te kyja':

—Tzaja quk'ile, qajb'ile tu'n toka te nejenel qeye tu'n qq'ojin kyi'j aj Amón.

7Atzunte Jefté xi ttzaq'we'n:

—¿Myapetzun o chin el kyik'une ex ok kyq'o'ne il wi'je tu'n wetze tuj tja nmane? ¿Tiqu'ntzun ma che tzaje jyolte weye tej ma tzaj yajb'il kyi'je? Chi Jefté.

8—Ax tok ma qo tzaje jyolte teya tu'nju ma tzaj yajb'il qi'je. Qajb'ile tu'n ttzaja quk'ile tu'n tok tena q'ojlel kyi'j aj Amón, ex tu'n toka te nejenel qxole qkyaqile aqo'ye najl tuj Galaad, che chi nejenel.

9—Qa kyajb'ile tu'n waj meltz'aje tu'n nq'ojine kyi'j aj Amón, ex qa ma che tzaj q'o'n tuj nq'ab'e tu'n Qman, ¿axpe tok chin okel kyq'o'ne te nejenel kyeye? Chi Jefté xi ttzaq'we'n.

10Atzun kye nejenel aj Galaad xi kytzaq'we'n:

—Ate Qman testiw qi'je, kb'antel qu'ne tkyaqilju ma tmaya.

11Xi'tzun Jefté kyuk'il, ex atzun kye tnam xjal ok kyq'o'n Jefté te nejenel kye ex te nejenel kye tuj q'oj. Tuj lugar Mizpa ax yol xi tma'n Jefté te Qman, aqeju yol otoq tma tnejel.

12Te tib'ajxi xi t-sama'n junjun sanjel tuk'il rey kye aj Amón tu'n t-xi kyma'n te kyja': ¿Ti ma nb'inchaye ti'ja tu'nju in tzaja q'ojlel tuj ntanmiye?

13Atzunte rey kye aj Amón tzaj ttzaq'we'n kye qe t-sanjel Jefté: Aqeye aj Israel, atxix tej kyetze tuj Egipto el kyi'ne qtx'otx'e, xi'ynix ttzi nima Arnón, ponin b'aj max ttzi nima Jaboc ex max ttzi nima Jordán. Ja'lotzun, kyq'o'n ajtze juntl maj tuj cheb'a.

14Atzunte Jefté xi t-sama'n txqantl t-sanjel tuk'il rey kye aj Amón,

15tu'n t-xi kyma'n tqanil lu te: Atzunju tzaq'web'l lu tu'n Jefté: Minti' o tz'el qi'ne kytx'otx' aj Moab ex mi kytx'otx' aj Amón, aqo'ye aj Israel.

16Tej qetze tuj Egipto, atzun o ik'e tuj tzqij tx'otx' tu'n qpone ttzi mar Kyaq Ke'yin ex o pone max tuj Cades.

17E tzajtzun qsama'ne junjun sanjel tuk'il rey kye aj Edom, qanilte te tu'n ttzaj tq'o'n amb'il qeye tu'n qexe tuj ttx'otx'; atzun te minti' tzaj tq'o'n amb'il qeye tu'n qexe tuj ttx'otx'. Ax ikx xi qqanine te rey kye aj Moab, ax ikx te minti' tzaj tq'o'n amb'il qeye tu'n qexe tuj ttx'otx'. Kyja'tzun ax o kyaj tene tuj Cades.

18Te tib'ajxi, o ik'tle tuj tzqij tx'otx' ex el qkumin qib'e ti'j kytx'otx' aj Edom ex aj Moab, tejxi qpone tuj tjawitz q'ij te tx'otx' Moab, ex atzun o kub' tene ma chixin taj jlajxi nima Arnón; minti' o ik'xe tuj, ex atzun xi'yni qe' kytx'otx' aj Moab.

19Xitzun qsama'ne junjun sanjel tuk'il Sehón aju rey kye aj Amorreo, aju najl tuj tnam Hesbón, xi qqanine tu'n ttzaj tq'o'n amb'il qeye tu'n qexe tuj ttx'otx' tu'ntzun qpone tuj qeye qtx'otx'.

20Atzunte Sehón minti' o qe' tk'u'j qi'je ex minti' tzaj tq'o'n amb'il qeye tu'n qexe tuj ttx'otx'; noq o'kx e b'aj tchmo'n kykyaqil qe t-soldad ex e ok tzoqpaj q'ojlel qi'je tuj tnam Jahaza.

21Ex ate Qman aju Qdiose tzaj q'onte kye tuj qq'ab'e, ex kub' ti'j Sehón qu'ne kyuk'ix kykyaqil qe t-soldad, ex o oke te tajwil tkyaqil kytx'otx' aj Amorreo tuj lugar lu.

22Tzyet tkyaqil kytx'otx' aj Amorreo qu'ne, tzajx qe' ttzi nima Arnón ex ponin b'aj max ttzi nima Jaboc; tzajni qe'tl tuj tzqij tx'otx' ex ponin b'aj max ttzi nima Jordán.

23Atzun ja'lo, ¿maj tajtzuna tu'n qex tlajo'na tuj tx'otx' o tz'el ti'n Qman kye aj Amorreo ex o tzaj tq'o'n qeye?

24Qa ma tzaj tq'o'n Quemós aju tdiosa ch'in tetzb'ila, k'okel jlu te teya, ¿jek ax? Ax ikxtzun qeye ma tz'ok qq'o'ne te qeye aju ma tzaj tq'o'n Qman te qetzb'ile.

25¿Maspetzun b'a'na tuj twitza twitz Balac aju tky'ajal Zipor ex rey kye aj Moab? Minti' tzaj te q'ojlel qi'je.

26Ma b'ant-xi ox syent ab'q'i qkub'len tene najal tuj tnam Hesbón, tuj tnam Aroer, kyuj aldey ate' kyi'jele ex kyuj kykyaqil tnam ate' ttzi'yile nima Arnón. ¿Tiqu'n minti' in che q'ajte kyi'j qe tx'otx' lu tuj tkyaqil tyemp ma jatz?

27B'ajx nb'incha'ye jun mya b'a'n ti'ja. Aya in tb'incha'na mya b'a'n tu'nju nno'k tzoqpaja qi'je. Ate Qman k'okel te jwes, ex ate kxel b'inchante kyi'j aj Israel ex kyi'j aj Amón, chi tqanil xi t-sama'n Jefté.

28Atzunte rey kye aj Amón minti' xi tq'o'n twi' ti'j tqanil pon t-sama'n Jefté.

Aju yol xi ttziyan Jefté

29Tzajtzun q'o'n tipumal Jefté tu'n T-xew Qman, ex b'aj tb'etin Jefté tuj tkyaqil tx'otx' Galaad, ex tuj tkyaqil kytx'otx' tiyjil Manasés, ex ik' aj tuj Mizpa te Galaad tu'ntzun tok tzoqpaj kyi'j aj Amón.

30Atzunte Jefté xi ttziyan jun yol te Qman kyja': Qa ma che tzaj tq'o'na aj Amón tuj nq'ab'e,

31kxel nq'o'ne teya te jun oyaj patun in kub' noq alkye jun ma tz'etz nej tuj njaye k'molte weye ok wul meltz'aje tuj q'oj, chi Jefté.

32Xi'tzun Jefté tuj kytx'otx' aj Amón ex ok tzoqpaj kyi'j ex e tzaj q'o'n tuj tq'ab' tu'n Qman.

33Nim aj q'oj e kub' tu'n Jefté ex e tzyet winqin tnam tu'n, kykub'sa'n kyxol tnam Aroer, Minit ex Abel-queramim. Kyja'tzun tten kub' kyi'j aj Amón kyu'n aj Israel.

34Tejtzun tul meltz'aj Jefté tuj tja tuj Mizpa, etz tme'jel k'molte te, in b'ixuntoq ex in q'ajtza'ntoq ti'j jun wiq tal chnab' panderetas tb'i, ex o'kxku junx tme'jel at, minti' jun tky'ajal at ex minti' juntl tme'jel,

35kyja'tzun, tej tke'yinte Jefté jlu, el t-sb'it'un t-xb'alun ti'j te jun techal ti'j tb'is, ex xi tma'n te txin:

—Ay nme'jel, ma'xix jun ta'w ma tzaj ti'na wi'je. Aya ma tzaj q'inte jun mya b'a'n wi'je, porke ma txi ntziyane jun yol te Qman ex il ti'j tu'n tjapun wu'ne.

36Atzunte txin xi ttzaq'we'n:

—Tat, b'inchama wi'je aju ma txi ttziyana te Qman, yake ma onin Qman tuk'ila tu'n tkub' kyi'j aj q'oj ti'ja, aqeju aj Amón.

37Ex xi tma'ntl te tman: Q'ontza kab'e xjaw amb'il weye tu'n nxi'ye b'etel kywi' qe witz kyuk'il qe txin wamiwoye, tu'n q-oq'e tu'nju chin kymele na'nxtoq nmoje'ye.

38Xitzun tq'o'n Jefté kab'e xjaw amb'il te, ex tuj kab'e xjaw lu o b'et txin kywi' qe witz kyuk'il qe tamiw, in che oq'toq tu'nju attoq tkyimel na'nxtoq tmoje'.

39Tb'ajlenxi kab'e xjaw, ajtz meltz'aj txin tu'n tul tuk'il tman, ex o japun tu'n Jefté aju yol otoq txi ttziyan te Qman. O kyim tme'jel Jefté na'nxtoq tlonte xinaq.

40Kyja'tzun kyaj ten jun costumr kyxol aj Israel: Kyaje q'ij in che'x qe txin oq'el ti'j tme'jel Jefté tkyaqil ab'q'i.