Deuteronomio 24 - Mam Huehuetenango New Ortography

Aju ley te pab'l mejeb'le'n

1Ok tmoje' jun xinaq tuk'il jun xu'j, qa te tib'ajxi mya b'a'n ma tz'ela tuj twitz tu'n tlaj jun tpaltil, b'a'n tu'n tkub' ttz'ib'an jun u'j tu'n tkub' pa't mejeb'le'n; kxel tq'o'n te xu'j ex k'elex tlajo'n tuj tja.

2Texlenxi xu'j tja tchmilb'en, jaku moje' tuk'il juntl xinaq.

3Qatzun ma tz'el ik'un xu'j tu'n tkab'in xinaq ex qa ma kub' ttz'ib'an jun u'j tu'n tkub' pa't mejeb'le'n, qa ma txi tq'o'n tuj tq'ab' xu'j ex ma tz'ex tlajo'n tuj tja; ex qa ma kyim tkab'in tchmil,

4mlay b'ant tu'n tmoje' juntl maj tuk'il nej tchmil, tu'n tlaj otoq txi aj tja juntl tchmil, ex tu'nju otoq tz'ilix, porke mya b'a'n jlu tuj twitz Qman. Mi'n b'aj kytz'ilsa'ne kytanmiye aju ktzajel tq'o'n Qman Dios te kyetzb'ile.

Txqantl ley

5Qa at jun xinaq k'itzqetoq toklen moje', mi'n tz'ex tuj q'oj ex mi'n kyaj ten te sanjelal tuj enter jun ab'q'i; tu'ntzun tten tuj tja tuj enter ab'q'i, ex tu'n ttzalaj t-xu'jil.

6Mi'n txi kyqanine tkya' xjal te prent ex mi tal tkya', porke a jlu mer ik tza'n aku tchwinqlal xjal nne'l kyi'ne te prent.

7Qa at jun aj Israel ma knet kyu'ne in xi telq'a'n jun t-xjalil tu'n tok te tmajen ex qa tu'n t-xi tk'ayin, aju xjal lu il ti'j tu'n tkub' b'yet, tu'ntzun tkub' naj mya b'a'n kyxole.

8Atzun ti'j tx'a'k minti' q'anb'il te, ten kykwente ti'j tu'n tjapun tkyaqilju ktzajel q'ma'n kyeye kyu'n qe pal aj Leví. Il ti'j tu'n tjapun kyu'ne ik tza'n o txi nma'ne kye.

9Kyna'ntze aju tb'incha Qman Dios ti'j Mariy tuj b'e, tej otoq che etze tuj Egipto.

10Qa ma txi kyq'o'ne tch'ex jun kyuk'ile, mi'n che okxe tuj tja tu'n tetz kyi'ne jun ti'xti te prent;

11ax che ayone ttxa'n pe'n, ex ax te xjal k'eletz q'o'nte jun prent kyeye.

12Qatzun meb'a xjal, mi'n kyaj kytzyu'ne prent ok tok qonik'an;

13k'ajel kyq'o'ne ok tex q'ij, tu'ntzun t-xi tb'oq'in tib' xjal tuj t-xb'alun ok t-xi' tal. Tu'ntzun jlu ktzajel tqanin xjal tky'iwb'il Dios kyib'aje, ex b'a'n k'elel jlu tuj twitz Qman Dios.

14Mi'n kub' kyyajla'ne jun majen meb'a ex minti' at te, qa ax kyxjalile ex qa jun stranjer xjal ax najl kyxole.

15B'i'x kychjonxe twi tk'u'j ok tex q'ij, porke meb'a xjal lu, ex in ajb'en twi tk'u'j tu'n tanq'in. Qa minti' ma txi kyq'o'ne twi tk'u'j, kxel tma'n jlu te Dios, ex attzun kyile twitz Dios ti'j jlu.

16Mi'n che kub' b'yet qe mamb'aj tu'n tlaj kyil kyk'wa'l, ax ikx qe k'wa'lb'aj, mi'n che kub' b'yet tu'n tlaj kyil kyman; teylex te junjun kymel tu'n tlaj tex til.

17Mi'n kyb'inchaye jun ti'xti mya tuj tumel kyi'j qe stranjer xjal, mi kyi'j qe k'wa'l minti' kyman ex kytxu', ex mi'n tzaj kyi'ne te prent t-xb'alun jun meb'a xu'j.

18Mi'n tzik' tna'l kyu'ne, ax ikx kyeye o che tene te majen tuj Egipto, ex tu'n Qman Dios e etz tzoqpi'ne. Tu'ntzun jlu in xi nma'ne kyeye tu'n tjapun tkyaqil jlu kyu'ne.

19Ok tjaw kychmo'ne twitz kyawale, qa ma tzik' tna'njtz tu'n ttzaj kyi'ne jun che'l triw, mi'n che aje q'il te; ax e tkyaj ten tu'n tajb'en kye stranjer xjal ax najl kyxole, kye k'wa'l minti' kyman ex kytxu' ex kye meb'a xu'j, tu'ntzun kykub' ky'iwla'ne tu'n Qman Dios ti'j tkyaqilju kb'antel kyu'ne.

20Ok t-xi kyyukune tqan olivo tu'n tkub' twitz, qa ma kyaj junjuntl twitz twi tqan, mi'n kub' kyi'ntle; ax e tkyaj ten tu'ntzun tajb'en kye stranjer xjal ax najl kyxole, kye k'wa'l minti' kyman ex kytxu' ex kye meb'a xu'j.

21Ok tkub' twitz ky-uvaye, mi'n che aje q'ilte aju otoq kyaj ten twi tqan; ax e tkyaj ten, tu'ntzun tajb'en kye stranjer xjal ax najl kyxole, kye k'wa'l minti' kyman ex kytxu' ex kye meb'a xu'j.

22Kyna'ntze, ax ikx kyeye o che tene te majen tuj Egipto. Tu'ntzun jlu in xi nma'ne kyeye tu'n tjapun tkyaqil jlu kyu'ne.