Gálatas 5 - Mam Huehuetenango New Ortography

Che we'xixe porke ma che tzoqpete

1Ma qo tzoqpet tu'n Crist tu'n qten tzoqpi'n qo'. Kyja'tzun che we'xixe tu'n mi'n kyyukche, ex mi'n txi kyq'on kyib'e juntl maj tjaq' yuw tu'n kyoke te majen.

2Aqine Pablo, lu kxel nma'ne kyeye, qa ma che sircunsidarinjtze, minti'xlo tajb'en Crist kyeye.

3Kxel nkyuwsa'ne juntl maj kyeye, qa at jun xjal ma sircunsidarinjtz, iltzun ti'j tu'n tjapun tu'n tkyaqilju in tma'n tley Moisés.

4Jumajx ma tz'el kypa'n kyib'e ti'j Crist, aqeye kyajb'ile tu'n kyoke te tz'aqlxix twitz Dios noq tu'nju in kyb'incha'ne aju in tma'n ley; ma tz'el kypa'n kyib'e ti'j t-xtalb'il Dios.

5Porke aqo' noq tu'nju Xewb'aj Xjan q'uql qk'u'j ti'j tu'n qok q'o'n te tz'aqlxix tu'n Dios noq tu'n qokslab'l.

6Porke tu'nju ma qo ok mojb'a'n tuk'il Jesucrist, junx ta' qa sircunsidarimaj qo' ex qa mya sircunsidarimaj qo', minti' toklen jlu. Aju mas ilxix ti'j, tu'n tten qokslab'l in tyek'un tib' tu'n qk'ujlalil.

7Nej in che b'ete b'a'n. ¿Alkyetzun ma maqonte kyeye tu'n mi'n t-xi kynimane aju yol axix tok?

8Ma kub' ti'j kynab'le pero kyu'n xjal, mya tu'n Dios aju txkonte kyeye.

9Che ximane ti'j jlu: Aju tq'otjil pan in jaw mal tk'u'j tkyaqil noq tu'n ch'in t-samel.

10Tu'nju okslal qo' ti'j Crist, ma qe' nk'u'je kyi'je, ktel kyximb'etze ik tza'n weye; atzun teju xjal in xitunte kynab'le, tzul tcastiw tu'n Dios, noq alxkye.

11Atzun weye erman, noqwit kukx t-xi nma'ne tu'n tb'ant sircunsisyón, myawtlo kukx nyajlanjtze kyu'n xjal judiy. Noqwit kukx t-xi nma'ne tu'n tb'ant sircunsisyón, minti'wtlo in tzaj kyq'oj xjal ti'j ju yol in xi nma'ne ti'j tcrus Crist.

12Pero aqeju in che xitunte kynab'le qa il ti'j sircunsisyón, b'a'nwt tel kycaparin kyib'.

13Aqeye erman, o che txkonjtze tu'n kytene tzoqpi'n qeye; ex mya tu'nju tzoqpi'n qeye tu'n kyb'inchanteye tajb'il kychib'jale, noq o'kx tu'n kyajb'ene kyxolxe ex tu'n kyk'ujlante kyib'e.

14Porke tkyaqilju in tma'n tuj ley in japun tu'n junx yol lu: Kyk'ujlame qe kyuk'ile ik tza'nx kyeye in kyk'ujlan kyib'e, chi tuj ley.

15Qatzun ma tz'ok kytx'an kyib'e kyxolxe, ex qa ma b'aj kychyo'n kyib'e ik tza'n qe jil, kyq'onke kwent kyi'je, mya yajku jaku che naje kykyaqile kyu'nx kyib'e.

Aju tajb'il qchib'jal ex aju qchwinqlal tu'n Xewb'aj Xjan

16Kyja'tzun in xi nma'ne: Che b'ete ik tza'n tajb'il Xewb'aj Xjan tu'ntzun mi'n t-xi kynimane aju tajb'il kychib'jale.

17Porke aju tajb'il qchib'jal minti' in kub' tuj twitz aju in tma'n Xewb'aj Xjan, ax ikx te Xewb'aj Xjan minti' in kub' tuj twitz aju tajb'il qchib'jal, ex aqeju kab'e lu kyajq'oj kyib'. Kyja'tzun minti' tumel tu'n kyb'inchanteye b'a'n aju kyajb'ile tu'n tb'ant.

18Pero qa ẍaqlu'n qeye tu'n Xewb'aj Xjan, myatzun ate'ye tjaq' ley.

19Q'ancha'lxix aju in kyb'incha'n xjal in xi kyniman tajb'il kychib'jal. Atzun jlu in kyb'incha'n: In kyb'incha'n aj pajil, in che yaẍin, in kyb'incha'n aju ttz'ilil, in che achin,

20in che k'ulun kywitz qe tilb'ilal, aj ky'a' qe, kyajq'oj kyib', in che q'ojin, nno'k tx'a'l ti'j kyk'u'j ti'j juntl, in che jaw kyaqpaj, in b'aj kyik'len kyib', in kub' ten pab'l tib' kyxol, ex in che ok lpe' ti'j jun xnaq'tzb'il mya b'a'n.

21In tzaj tlo'ch kyk'u'j, b'yol xjal qe, k'al q'e'n qe, in che achin tuj ninq'ij, ex at mastl in kyb'incha'n ik tza'n jlu. B'a'n tu'n kyb'inteye jlu: Aqeju kukx kyb'inchante tkyaqil jlu, mlay che okx tuj tkawb'il Dios, ik tza'n o txi nma'ne kyeye.

22Atzunju in tq'o'n Xewb'aj Xjan atzun jlu: Tu'n tten qk'ujlalil, tu'n qtzalaj, tu'n tten qmojb'ab'l qib', tu'n tten qpasens, tu'n qb'inchante xtalb'il te juntl, tu'n tten qb'anil, tu'n qwe'xix tuj qokslab'l,

23tu'n qok mans, ex tu'n qjak'unte qib'. Minti' jun ley mayolte qe ti'j jlu.

24Ex aqeju okslal qe ti'j Crist, o jaw kyq'o'n twitz crus aju tajb'il kychib'jal tuk'ix ju kyachb'il, tuk'ix ju in pon kyk'u'j ti'j.

25Qa at qchwinqlal tu'n Xewb'aj Xjan, ax ikx qo b'et ik tza'nx in tma'n Xewb'aj Xjan.

26Mi'n jaw qniman qib'. Mi'n tz'ok qik'len qib' qxolx. Mi'n tzaj tlo'ch qk'u'j ti'j juntl.