Zacarías 11 - Mam Huehuetenango New Ortography

1Aya tx'otx' Líbano, jaqom qe tlamela ex e kykub' b'aj tz'e'y tu'n q'aq' qe tqan wi'ten ate' ti'ja.

2Kyjaw oq'e aqeye tze' tzaj, tu'nju ma che ik' tz'aq qe wi'ten ex ma che kub' b'aj tilj qe tze' tb'anilxix che ke'yin. Che wuyine aqeye tze' k'ol tuj tx'otx' Basán, tu'nju ma b'aj naj aju chk'ul pim.

3Nim in che oq' qe pastor porke ma b'aj naj kywab'l qe alumaj aju tb'anilxix. In b'injtz tq'ajq'ajel kywi' qe b'alun in che tzanun tu'nju ma b'aj naj tpimil chk'ul at ttzi nima Jordán.

Qe kab'e pastor

4Atzun jlu tzaj tma'n Qman Dios weye: Che tkwentin oka qe ẍne'l b'animaj kyi'j tu'n kykub' b'yo'n.

5In che kub' b'yo'n kyu'n qe laq'ol kye ex minti' nnu'l ti'j kyk'u'j qa at kyil ti'j, ex qe k'ayil kye in kyma'n kyja': Chjonte Qman, ma qo oke q'inun. Qe pastoril kye misikyer in tz'e'y kyk'u'j kyi'j.

6Tu'ntzun jlu mlay tzaj q'aq'an nk'u'je kyi'j qe xjal najlqe tuj tx'otx' lu, noq o'kx kxel nq'o'ne teyle junjun tuj tq'ab' tuk'il ex tuj tq'ab' t-rey. Atzun qe jlu che b'ajel xitunte kytx'otx' ex mi jun kkletel wu'ne tuj kyq'ab'. Aqine Dios in chin q'mante jlu.

7In oktzun tene kwentil kye qe ẍne'l b'animaj kyi'j tu'n kykub' b'yo'n, aqeju tuj b'is ate'. Tzaj njyo'ne kab'e ky'aqo'ch; jun ok nq'o'ne tb'i Xtalb'il ex atzun juntl ok nq'o'ne tb'i Mojb'ab'l Tib'il.

8Ex tuj junx xjaw el wi'ne kyaq'un ox pastor otoq b'aj npasense kyu'n ex in che ik'untoq wi'je.

9Xi nma'ne kye qe ẍne'l kyja': Mlay chin oktle te pastor kyi'je. Qa at jun ma kyim, e tkyim. Qa at jun ma kub' naj, e tkub' naj. Atzun qeju che kyjel ten, e tb'aj kychyo'n kyib'.

10Tzajtzun wi'ne aju nky'aqo'che toktoq tb'i Xtalb'il ex kub' ntoqine te jun techal qa otoq kub' tq'uchin Dios tyol aju otoq kyaj b'ant ti'j tu'n kyuk'il kykyaqil nasyon.

11Tuj q'ij lu kub' q'uchj aju yol otoq kyaj b'ant ti'j ex qe laq'ol ẍne'l, aqeju in che ke'yintoq wi'je, el kynik' ti'j qa a Qman q'mante aju in b'anttoq wu'ne.

12Xitzun nma'ne kye kyja': Qa b'a'n tuj kywitze, kychjontze twi nk'u'je, ex qa mi'n, kukxju. Ex tzaj kyq'o'n 30 saq pwaq twi nk'u'je.

13Tzaj tma'n Qman weye kyja': Q'inxa pwaq lu ex q'o'n ku'xa tuj tkub'il q'inumab'l tuj njaye. Xitzun wi'ne qeju 30 saq pwaq ex ku'x nq'o'ne tuj tkub'il q'inumab'l tuj tja Qman, o'kxtzun ch'in twi nk'u'je tzaj kyq'o'n.

14Te tib'ajxi kub' ntoqine aju tkab'in ky'aqo'ch, aju toktoq tb'i Mojb'ab'l Tib'il, te jun techal qa otoq kub' xitj aju kymojb'ab'l kyib' aj Judá kyuk'il aj Israel.

15Tzaj tma'n Qman weye kyja': Atzun ja'lo, q'o'nk tib'a ik tza'n jun pastor minti' tnab'l.

16Porke k'okel nq'o'ne jun pastor tuj tnam lu, aju pastor lu minti' taj kyi'j ẍne'l tzpetni qe, ex mi'n jyon kyi'j qeju o che'x naj ex mi'n che ok tq'anan qeju o che k'ixb'i ex mi'n txi tq'o'n kywa qeju okni kyi'j, noq o'kx kxel tchyo'n kychib'jal qeju mas ulni kynab'l ex k'elel tkowpi'n tpas kyqan.

17Ay b'ek'b'il twitz ju pastor minti' tnab'l, in che kyaj tkolin qe ẍne'l. Kuchiwt k'ixb'i tq'ab' ex tb'aq' twitz tuj tb'anq'ab' tu'n spad. Kuchiwt tz'ok tzqij tq'ab' ex b'i'xwit kyaj moẍix tb'aq' twitz te jumajx.