Jeremías 3 - Mam Huehuetenango New Ortography

El kypa'n kyib' aj Israel ti'j Qman

1Chi Qman in tma'n: Qa at jun xinaq ma kub' tpa'n tib' tuk'il t-xu'jil ex qa ma moje' xu'j lu tuk'il juntl xinaq, ¿jakupe moje' juntl maj tnejel chmilb'aj tuk'il xu'j lu? ¿Myapetzun tu'n jlu jaku tz'ilix kytanmiye? Aqeye aj Israel, ma knet nim kyyaẍe, ex atzun ja'lo ¿maj kyaje tu'n kyajtze juntl maj wuk'ile? Chi Qman.

2Kyke'yinxe kywi' qe tal witz, ¿alkye jun lugar na'nx kyyaẍine tuj? Q'uql qeye ttxlaj b'e ik tza'n qe aj Árabe tuj tzqij tx'otx' in che ayon ti'j jun b'etin xjal tu'n tel kyelq'a'n aju at te, ikxtzun kyeye e kub' qe'ye tu'n kyayone kyi'j kyyaẍe. Ma b'aj kytz'ilsa'ne kytanmiye tu'nju yaẍb'il in b'ant kyu'ne ex tu'nju kyb'inchb'ene mya b'a'n.

3Kyja'tzun minti' ma tzaj jb'al tuj tq'ijlalil ttzi jb'alil. Ik kytene ik tza'n jun xu'j jawni twitz kyuk'il xinaq, ex minti' ma tzaj kych'ixwiye.

4Atzun ja'lo in kyma'ne weye: Aya Qman, aya at quk'ile atxix tuj qku'xumale.

5¿Kukxpe ktzajel tlo'ch tk'u'ja qi'je? ¿Te jumajxpe ktel tq'oja? Che chiye. Tej in kyma'ntoqe weye ikju, lu qeye kukx kyb'inchanteye tkyaqil mya b'a'n.

In tma'n Qman tu'n tajtz ti'j kyanmi aj Israel ex aj Judá

6Tuj tq'ijlalil tej tten rey Josías tzaj tma'n Qman weye: ¿Mape tila aju in kyb'incha'n aj Israel? Ma tz'el kypa'n kyib' wi'je. In che'x kywi' qe witz ma' kywa'l ex kyjaq' qe tze' nim kyxaq, ex atzun in che yaẍin.

7Tuj nximb'etze qape che ajetz meltz'aj wuk'ile tb'ajlenxi kyb'incha'n tkyaqil jlu, ex minti' e ajtz meltz'aj. Ex e ilwaj kyu'n qe kyerman aqeju aj Judá, aqeju otoq tz'el kypa'n kyib' wi'je.

8Ax ikx o kyil aj Judá qa otoq kub' npa'n wib'e kyuk'il aj Israel ex otoq che kyaj nkoline, noq tu'n tlaj el kypa'n kyib' wi'je ex tu'n tlaj otoq kyb'incha aj pajil. Ex qe aj Judá el kypa'n kyib' wi'je ik tza'n otoq kyb'incha aj Israel aqeju kyerman; minti' tzaj ch'in kyxob'il, ax ikx kye kyb'incha aj pajil.

9Tu'nju minti' ma tzaj kyxob'il ti'j il in kyb'incha'n, kyja'tzun ma tz'ilix kytanmi kyu'n; ma tz'el kypa'n kyib' wi'je ex ma che ok ten k'ulul kywitz qe tilb'ilal b'inchamaj kyi'j tze' ex ab'j.

10Maske ikju, qe aj Judá, aqeju otoq tz'el kypa'n kyib' wi'je, minti' ma che ajtz meltz'aj wuk'ile tu'n tkyaqil kyanmi; in kyma'n qa ma che ajtz meltz'aj wuk'ile, ex noq tten kyu'n. Aqine Dios in chin q'mante jlu.

11Tzaj tma'n Qman weye: Maske ma tz'el kypa'n kyib' aj Israel wi'je, ex mas ch'in kye il ma kyb'incha kywitz aj Judá.

12Chux txi'ya ex q'manxa tqanil lu tuj tx'otx' tuj tb'anq'ab' q'ij: Kyajtz meltz'aje wuk'ile aqeye aj Israel kypa'n kyib'e wi'je. Mlay tzaj mastl nq'oje kyi'je, ex mya kukx chin q'ojile kyi'je, tu'nju at tq'aq'b'il nk'u'je. Aqine Dios in chin q'mante jlu.

13Tz'elx kynik'e ti'j ju mya b'a'n ma kyb'inchaye. Ma che oke mib'an che nimane weye, aqine Kymane ex Kydiose, in che k'ulune kywitz qe dios kye txqantl nasyon kyjaq' kykyaqil qe tze' nim kyxaq, ex minti' ma txi kyb'i'ne nyole. Aqine Dios in chin q'mante jlu.

14Chi Qman in tma'n: Kyajtz meltz'aje wuk'ile aqeye nk'wa'l mib'an che nimane, aqine kyajwile. Ktzajel wi'ne jun kyeye tuj teyle junjun tnam, ex kab'ka te junjun k'loj kyiyjile aqeju at kyxilene kyuk'il, ex che ajel meltz'aj wu'ne tu'n kypon tuj tnam Sión.

15Che okel nq'o'ne qe kawil kyxole, aqeju in chin tzalaje kyi'j, ex atzun qe che kawil kyib'aje tuk'il nab'l ex tuk'il ojtzqib'l.

16Oktzun tchmet kyb'aje tuj kytanmiye ex ok tchmet kyb'aj kyk'wa'le, mi jun k-yolil juntl maj ti'j kax k'ub'l tley Dios, mi jun kximal ti'j, ex mi jun tzul na'nte te, ya minti'tl tajb'en te kye, ex mlay kub' kyb'incha'n juntl ak'aj. Aqine Dios in chin q'mante jlu.

17Ex aju tnam Jerusalén k'okel tb'i Tq'uqb'il Qman jatum in kawin, ex atzun k'okel kychmon kyib' kykyaqil nasyon tu'n tjaw kynimsa'n nb'iye, ex mlay che ok lpe' ti'j kyex kyximb'etz mya b'a'n.

18Oktzun tpon tq'ijlalil lu, k'okel kyjunin kyib' aj Judá kyuk'il aj Israel, ex junxtzun che ajetz meltz'aj tuj tx'otx' tuj tb'anq'ab' q'ij, tu'n kypon tuj tx'otx' xi nq'o'ne te kyetzb'il qtzan kyxe'chel.

E k'ulun aj Israel kywitz qe tilb'ilal

19Aqeye aj Israel, otoq kub' nximane tu'n kyk'mete wu'ne ik tza'n nk'wa'le ex tu'n t-xi nq'o'ne jun kytx'otx'e tb'anilxix; aju tx'otx' lu mas tb'anilxix twitz tkyaqil txqantl tx'otx'. Tuj nximb'etze qa tu'n wok kyq'o'ne te kymane ex qa minti' tu'n tel kypa'n kyib'e wi'je.

20Ex ik tza'n jun xu'j in kyaj tkolin tchmil ex in xi lpe' ti'j juntl, kyja'xtzun kyeye o chin kyaj kykoline. Aqine Dios in chin q'mante jlu.

21In b'injtz tq'ajq'ajel kywi xjal kywi' qe witz tz'la'j kyi'j; atzun qe aj Israel in che oq' ex in che kub'san nwitze tu'nju ma che el tzpet ti'j b'e jiqun ti'j ex ma tzik' nna'njtze kyu'n, aqine Kyman ex Kydios.

22Kyajtz meltz'aje wuk'ile aqeye nk'wa'l mib'an che nimane, jaku kub' nnajsa'ne kyile tu'ntzun kyoke b'a'n che nimane.

Tzaq'web'l kyu'n aj Israel te Qman

Che chi aj Israel kyma: Lu qo'ye lu, ma qo ule tuk'ila, porke aya Qmane aju Qdiose.

23Minti' ch'in tajb'en qe tu'n qxi' k'ulul kywitz qe tilb'ilal kywi' qe tal witz, ex tu'n qjaw sch'in kywi' qe nmaq witz; noq o'kx tuk'il Qman aju Qdios jaku knet kolb'il qe.

24Tej matoq k'wa'lx qo', o qil nimku at kyuk'il qtzan qman: attoq kyẍne'l, kywakẍ, kyky'ajal, kyme'jel, ex tkyaqil o b'aj naj tu'n kylaj qe tilb'ilal nno'k qdiosin.

25Qmansin kub' qib' ja'lo, ex e ttzaj qch'ixwi, ex tej k'wa'lxtoq qo', ikx ja'lo, in qo b'inchan il twitz Qman aju Qdios, ik tza'n o kyb'incha qtzan qxe'chel, ex minti' in xi qniman tyol.