1Ja'lotzun erman, qo kub'sale kywitze ex kxel qq'o'ne kynab'le tu'nju qmojb'ab'l qib' tuk'il Qajaw Jesús: Ik tza'n ju xnaq'tzb'il xi qq'o'ne kyeye tza'n tten tu'n kyb'ete twitz Dios ex tu'n ttzalaj Dios kyi'je, ikxtzun kyb'inchame ex tu'n tjapunxix kyu'ne.
2Ex b'i'maj kyu'ne aju xnaq'tzb'il xi qq'o'ne kyeye, aju tzaj tma'n Qajaw Jesús.
3Porke aju tajb'il Dios tu'n t-xi kyq'on kyib'e o'kx te Dios, ex tu'n mi'n kyb'inchanteye aj pajil.
4Teyle junjun kyeye tu'n tten tex t-xu'jil, atwit toklen t-xu'jil tuj twitz ex mi'n pon tk'u'j ti'j juntl,
5ex mya tu'n t-xi kytzoqpin kyib'e teju kyajb'ile mya b'a'n ik tza'n in kyb'incha'n txqantl xjal minti' ojtzqi'n Dios kyu'n.
6Ex mi'n kyb'inchaye jun mya b'a'n te kyermaniye ex mi'n che kub' kysb'u'ne, porke ate Qajaw ktzajel q'onte castiw ti'j tkyaqil jlu, ik tza'n o txi qma'ne kyeye ex o txi qchik'b'a'ne.
7Porke minti' ma qo txkonjtz tu'n Dios tu'n qb'inchante aju ttz'ilil, noq o'kx tu'n t-xi qq'on qib' o'kx te.
8Kyja'tzun alkye jun xjal nne'l tik'un ju yol lu, mya jun xjal nne'l tik'un, ate Dios nne'l tik'un, aju ma tzaj q'onte Xewb'aj Xjan qe.
9Mya il ti'j tu'n t-xi ntz'ib'ane kyeye tza'n tten tu'n kyk'ujlanteye kykyaqil erman, porke ax Dios ma xnaq'tzan kyeye tu'n kyk'ujlante kyib'e kyxolxe.
10Ax ikxtzun in kyb'incha'ne, at kyk'ujlalile kyi'j kykyaqil erman ate' tuj tx'otx' Macedonia. Pero qo kub'sale kywitze, erman, kukx tu'n tch'iy kyk'ujlalile,
11ex tu'n tok tilil kyu'ne tu'n kyanq'ine tuj txub'txaj ex tu'n kyaq'nane ti'j kyaq'une, ex tu'n kyaq'nane tu'n kyq'ab'e, ik tza'nx xi qma'ne kyeye.
12Tu'ntzun kyxi nimane kyu'n xjal, ex tu'n kytene minti' atx taj kyeye.
Tza'n tten tzul juntl maj Qajaw13Ax ikx qajb'ile erman, tu'n tel kynik'e kyi'j qeju in che kyim, tu'n mi'n ttzaj kyb'ise ik tza'n qe txqantl xjal minti' jatum tu'n tok qe' kyk'u'j.
14Porke ma qoksla ju yol ti'j Jesús, ate Jesús o kyim ex jatz anq'in, ax ikxtzun qeju o che kyim okslal qe ti'j Jesús, che tzajel ti'n Dios junx tuk'il Jesús.
15Kyja'tzun kxel qma'ne jlu kyeye, aju tyol Qajaw: aqo' itz'x qo' ex ato'x ok tul Qajaw, mlay qo'x nej kywitz qeju otoq che kyim.
16Tu'nju axte Qajaw kb'eletz tuj kya'j, ktzajel tq'o'n orden, tuk'ix tnejel anjel ktzajel q'ajt, ex kq'ajtel ju chun te Dios. Ex qeju otoq che kyim okslal qe ti'j Crist ok che jawil anq'in nej.
17Lepchixtzun qo' aqo' itz'x qo' ato'x tzalu, qo jawil jub'cha'n junx kyuk'il tuj muj tu'n qk'lunte qib' tuk'il Qajaw tuj kyq'iq', kyja'tzun ax qo tel tuk'il Qajaw te jumajx.
18Kyja'tzun kyq'uqb'am kyk'u'je kyxolxe tu'nju yol lu.
Who We AreWhat We EelieveWhat We Do
2025 by iamachristian.org,Inc All rights reserved.
