1 Samuel 1 - Mam Huehuetenango New Ortography

Tzaj tq'o'n Dios jun tal Ana

1Tuj tiwitz tx'otx' kye tiyjil Efraín attoq jun lugar Ramá tb'i, atzun najltoq jun xinaq tiyjil Zuf, Elcana tb'i. Jeroham tb'i tman, ex Eliú tb'i tchman, atzun ttxk'a tchman Tohu tb'i, aju tky'ajal Zuf, atzun tzajni jlet ti'j tiyjil Efraín.

2Ate Elcana attoq kab'e t-xu'jil; Ana tb'i jun, atzun juntl Penina tb'i. Ate Penina attoq tal otoq che tzaj, atzunte Ana minti'toq tal otoq tzaj.

3Tkyaqil ab'q'itoq nne'tz Elcana tuj ttanmi tu'n tpon tuj Silo tu'n tk'ulun, ex tu'n t-xi tq'o'n chojb'il te Qman Dios aju Tajaw Tkyaqil. Ex atzun ate'toq kab'e tky'ajal Elí aju pal, jun Ofni tb'i, atzun juntl Finees tb'i, ex ax pal qe jlu te Qman.

4Ok t-xi tq'o'n Elcana jun alumaj te chojb'il te Dios, in xi tq'o'n ch'in tchi' Penina tuk'ix kye qe tal,

5atzunte Ana mas tb'anil ch'intl tchi' in xi tq'o'n Elcana aju tchmil, tu'nju k'ujla'nxix nim tu'n maske mib'antoq alin tu'n Qman.

6Tu'ntzun jlu ik'un Ana tu'n Penina, nno'k tik'le'n tu'n tjaw q'ojl, in xmayin ti'j, ex kok'x nno'k tma'n ta'w tyol te tu'nju minti' in tzaj tal, porke ikx ttzajlen tq'o'n Qman, mib'an alin.

7Iklex in b'ant tu'n Penina tuj junjun ab'q'i ok kyxi' k'ulul tuj tja Dios; nno'k tik'le'n tu'n tjaw q'ojl, ex tu'ntzun jlu nno'k ten Ana oq'el ex minti' in wa'n.

8Atzunte Elcana aju tchmil in xi tma'n te: Ana, ¿tiqu'n in oq'a? ¿Tiqu'n in b'isuna ex minti' in wa'na? ¿Myapelo mas b'a'n qine te teya twitzju tu'n tten laj tala?

9At jun maj tej ate'toq tuj Silo jaw we' Ana tb'ajlenxi wa'n. Atzunte pal Elí q'uqltoq twi' jun siy, niqayin ttzi tja Dios jatum in che okx qe xjal.

10Atzunte Ana in oq'toq tu'nju at nim ta'w tuj tanmi, ok ten na'l Dios,

11ex xi ttziyan jun tyol te Dios ex tma: Nman aya Tajaw Tkyaqil: Qa ma tzaj tke'yina aju yajb'il weye, aqine tmajena, ex qa ma chin pone ti'j tk'u'ja, ex qa ma tzaj tq'o'na jun wale xinaq, jaku txi nq'o'ne tu'n tajb'en teya tuj tkyaqil tanq'ib'l, ex mi'n tz'el ttxa'n twi' te jun yek'b'il qa otoq txi nq'o'ne teya, chi Ana.

12Tu'nju nim tuj o na'n Ana Dios, ok tq'o'n Elí tkwent ti'j ttzi';

13atzunte Ana in na'n Dios tuj tanmi ex minti' q'ajq'aj twi', noq o'kx ttzi' in yukch. Tuj twitz Elí qa k'al q'e'n te Ana,

14ex xi tma'n te:

—Kolinxa tu'n tk'ana q'e'n. Q'i'mel q'e'n tuj twi'ya.

15Atzunte Ana xi tma'n:

—Mi'n tat, minti' we ma txi nk'an vin ex qa juntl wiq q'e'n, noq o'kx atine tuj b'is, ex jnik'ju at tuj wanmiye in xi nq'o'ne tuj tkwent Qman.

16Mi'n ximana ti'j qa aqine jun xu'j mya b'a'n, noq o'kx in chin na'ne Dios tu'n tlaj nb'ise ex yajb'il weye; tu'ntzun jlu nim tuj ma chin kub' tene na'l Dios, chi Ana.

17—B'a'n tu'n taj meltz'aja tuk'il tzalajb'il, ex awt ju Qdios aj Israel qo' tzaj q'onte teya aju ma txi tqanina te, chi Elí.

18—Chjontexix teya, chi Ana xi ttzaq'we'n.

Ajtzun meltz'aj Ana jatum otoq tzaj nej, ex ok ten wa'l ex minti'tl o b'isun.

19Tuj juntl q'ij e jaw we' primxix wen, ex kyb'ajlenxi k'ulun twitz Qman, e aj meltz'aj max kyja tuj Ramá. Kub'tzun tmojb'an tib' Elcana tuk'il Ana aju t-xu'jil, ex tzaj tq'o'n Qman aju otoq txi tqanin Ana te.

20Kyja'tzun b'i'x ok ten tal Ana, ex tej tpon tq'ijlalil ul itz'j jun tal xinaq, Samuel tb'i ok tq'o'n ex tma: Tu'nju o txi nqanine te Qman, chi Ana.

21Xi'tzun Elcana kyuk'ix kykyaqil qeju ate' tuj tja tu'n tpon tuj Silo, tu'ntzun tjapun tu'n aju otoq txi ttziyan, ex tu'n t-xi tq'o'n ju chojb'il ik tza'nx in b'ant tu'n tuj junjun ab'q'i,

22atzunte Ana minti' xi', noq o'kx xi tma'n te tchmil:

—Mlay chinxe, maxi chin xe'le okxi tel tal ne' ti'j tch'u'. Ex b'i'xtzun kxel nq'o'ne te Qman tu'n tkyaj ten te jumajx ma chixin.

23Xi ttzaq'we'n Elcana aju tchmil:

—B'inchama alkye b'a'n tuj twitza. Ax tenkja max ok tel tal ne' ti'j tch'u'. Ex e tjapun tu'n Qman aju o tzaj ttziyan.

Kyja'tzun ax kyaj ten Ana ex o tch'isa tal tejxi tel ti'j tch'u'.

24Tejtzun tel ti'j tch'u', xi ti'n ju tal q'a tuj tja Dios tuj Silo, matoq ne'x ta'. Ax ikx xi ti'n jun tal tor te ox ab'q'i, ex kab' arrob arin, ex jun tal ẍoq' tku'x ta'l twitz uva tuj.

25Kub'tzun kyb'yo'n tal tor te chojb'il, ex xitzun kyi'n ju tal q'a twitz Elí.

26Xitzun tma'n Ana te Elí:

—Najsama tat, ax tok aqine ju xu'j aju kub' ten na'l Dios niqayin ttxlaja tzalu.

27O txi nqanine te Qman tu'n ttzaj tq'o'n jun wale, ex ma tzaj tq'o'n aju xi nqanine te.

28Ja'lo kxel nq'o'ne te Qman tu'n tajb'en te tuj tkyaqil tanq'ib'l, chi Ana.

Atzunte Elí kub' mok'e' twitz Qman tejxi tpon takl tib'aj twitz max twitz tx'otx'.