Éxodo 35 - Mam Huehuetenango New Ortography

Aju ley ti'j q'ij te ojlab'l Éxodo 31.12-17

1Oktzun tchmo'n Moisés kykyaqil aj Israel ex xi tma'n kye kyja': Atzun jlu ma tzaj tma'n Qman weye tu'n tb'ant kyu'ne:

2Qaq q'ij che aq'nale; atzunju twuqin q'ij k'okel te jun q'ij xjan te kyeye ex jun q'ij te ojlab'l ex te nimb'il te Qman. Alkye jun ma tz'aq'nan tuj q'ij lu, kymel.

3Mi'n kub' kyq'o'ne q'aq' tuj kyjaye tuj q'ij te ojlab'l, chi Moisés.

Oyaj ti'j tja Dios Éxodo 25.1-9

4O yolin Moisés kyuk'il kykyaqil aj Israel ex xi tma'n kye kyja': Atzun jlu ma tzaj tma'n Qman tu'n tb'ant:

5E kyjaw chmet qe oyaj te Qman kyxole. Kykyaqil qeju kyajb'il tu'n ttzaj kyq'o'n kyoyaj te Qman tu'n tkyaqil kyanmi, e ttzaj kyi'n q'an pwaq, saq pwaq, q'an k'uxb'il,

6xb'alun ẍq'ilun ke'yin, xb'alun ẍjulin ke'yin, xb'alun kyaq ke'yin, tb'anil xb'alun lino, ttzmal chip,

7ttz'umal ẍne'l tok tk'a' kyaq ke'yin, tz'u'm tb'anilxix, tze' ch'i'x acacia,

8aseyt tu'n tajb'en kyuj kandil, t-samel at tk'ok'jal tu'n tku'x q'ot tuj aseyt aju in ajb'en ok tok toklen jun xjal, ex tu'n tajb'en te tk'ok'jal storak,

9qe tal ab'j ónice ex txqantl tal ab'j tb'anil, tu'n tok q'ot ti'j kapiẍay nno'k tq'o'n tnejel pal, ex ti'j tal xb'alun nno'k ten ttzi t-xu'k.

Qe makb'il che ajb'el tuj tja Dios Éxodo 39.32-43

10Kykyaqil qeju at kynab'l ti'j aq'untl, che tzajel ex kb'antel kyu'n tkyaqilju o tzaj tma'n Qman:

11Aju ja xb'alun te tja Dios, aju xb'alun tu'n tjax twi' ex tu'n tok ti'jele, qe ganch, qe tz'lom, qe tze' te tq'e'lil, qe tqan ex qe kyq'uqb'il tqan;

12aju kax k'ub'l tley Dios kyuk'ix qe tze' te tanub'l te, aju tmaqsil kax ex aju xb'alun te maqb'il tetz twitz;

13aju mes kyuk'ix qe tze' te tanub'l te, kykyaqil qe makb'il che ajb'el ti'j, ex aju pan tu'n tkub' tq'o'n twitz Qman;

14aju kykub'il kandil, qe makb'il che ajb'el ti'j, qe kandil tu'n kyspik'b'ante tuj ja ex aju aseyt k'ajb'el kyuj;

15aju altar tu'n tkub' patit storak kyuk'ix qe tze' te tanub'l te, ex aju aseyt k'ajb'el ok tok toklen jun xjal, aju storak tb'anilxix tk'ok'jal, ex aju xb'alun te maqb'il kb'el ttzi ja;

16aju altar tu'n tkub' patit chojb'il, tuk'ix q'an k'uxb'il xawk'in toy' kyjel tjaq' chojb'il ok tkub' patit, qe tze' te tanub'l te ex kykyaqil qe makb'il che ajb'el ti'j, ex aju tkub'il a' tuk'ix tq'uqb'il;

17qe xb'alun te maqb'il ti'jele pe'n, qe tqan, qe kyq'uqb'il tqan, aju xb'alun te maqb'il kb'el ttzi pe'n;

18qe stak te tzinb'il xb'alun ti'j tja Dios, qe stak che b'elex ti'jele pe'n ex qe k'alb'il kye;

19qe xb'alun che okel kyq'o'n pal ok kyajb'en tuj tja Dios, qe xb'alun xjansamaj te Aarón aju pal, ex qe kyxb'alun tky'ajal ok kyajb'en tuj kyaq'un te pal.

Tzaj kyi'n xjal kyoyaj

20E ajtzun kykyaqil aj Israel kyja,

21ex kykyaqil qeju o tzaj kygan tu'n kyoyin tu'n tkyaqil kyanmi, e ul meltz'aj q'ol kyoyaj te Qman, tu'ntzun tb'ant aju ja xb'alun te mojb'ab'l tib'il, ex tkyaqilju attoq tajb'en ti'j ex kyi'j qe xb'alun xjansamaj.

22E ultzun qe xinaq ex qe xu'j aqeju tzaj kygan tu'n kyoyin tu'n tkyaqil kyanmi, ul kyi'n caden, tuj ẍkyinb'aj, xmulq'ab'aj, tqul q'ab'aj, ex tkyaqil wiq ti'xti q'an pwaq ttx'otx'il. Kykyaqil ul kyi'n kyoyaj q'an pwaq ttx'otx'il te Qman.

23Kykyaqil qeju attoq xb'alun ẍq'ilun ke'yin kyuk'il, ul kyi'n, tuk'ix xb'alun ẍjulin ke'yin, xb'alun kyaq ke'yin, tb'anil xb'alun lino, ttzmal chip, ttz'umal ẍne'l tok tk'a' kyaq ke'yin ex tz'u'm tb'anilxix.

24Kykyaqil qeju otoq tz'el kypa'n saq pwaq ex qa q'an k'uxb'il, ul kyi'n twitz Qman; ex kykyaqil qeju attoq tze' acacia kyuk'il, ul kyi'n tu'n tajb'en ti'j tja Dios.

25Ax ikx kykyaqil xu'j b'a'ntoq che chub'en, tzaj kyi'n aju noq' otoq b'aj kychub'en: Noq' ẍq'ilun ke'yin, noq' ẍjulin ke'yin, noq' kyaq ke'yin ex tb'anil noq' lino.

26Kykyaqil xu'j tzaj kygan tuj kyanmi ex b'a'n che chub'en ti'j ttzmal chip, e ok ten chub'el te.

27Qe nejenel tzaj kyi'n tal ab'j ónice ex qe tal ab'j tb'anil, tu'n kyok q'ot ti'j kapiẍay nno'k tq'o'n tnejel pal, ex ti'j tal xb'alun nno'k ten ttzi t-xu'k,

28kyuk'ix qe tk'ok'jal ex aju aseyt tu'n tajb'en kyuj kandil, tuk'ix aseyt tu'n tajb'en ok tok toklen jun xjal, ex qe tk'ok'jal tu'n kyajb'en tuj storak.

29Kykyaqil aj Israel, tza'nx qe xinaq ax ikx qe xu'j, aqeju o tzaj kygan tu'n t-xi kyq'o'n kyoyaj tu'n tb'ant tkyaqilju otoq tzaj tma'n Qman te Moisés, tzaj kyi'n kyoyaj twitz Qman tu'n tkyaqil kyanmi.

Qe xjal at kynab'l tu'n tb'ant tja Dios Éxodo 31.1-11

30Xitzun tma'n Moisés kye aj Israel kyja': Kyb'intze. Kyxol tiyjil Judá o jaw sk'o'n Bezaleel tu'n Qman tu'n tok te nejenel ti'j aq'untl lu; ate Bezaleel tky'ajal Uri ex tal tchman Hur.

31O noj tuj tanmi tu'n T-xew Dios, ex o tzaj tq'o'n tojtzqib'l ti'j tkyaqil aq'untl, ex tu'n tel tnik' ti'j tkyaqil txkaj aq'untl,

32ex at tnab'l ti'j alkyechaq tumlal aq'untl tu'n tb'ant, ex at tnab'l tu'n taq'nan ti'j q'an pwaq, ti'j saq pwaq ex ti'j q'an k'uxb'il,

33tu'n kyb'aj tb'incha'n qe tal ab'j tb'anilxix ex tu'n kykub' tq'o'n tuj kyq'uqb'il, tu'n kyb'aj tjaso'n kyi'j tze', ex tu'n taq'nan ti'j tkyaqil wiq aq'untl tb'anilxix,

34ex o tzaj q'o'n tnab'l tu'n t-xi tq'o'n xnaq'tzb'il kye txqantl; ex mya o'kx te, ax ikx te Aholiab aju tky'ajal Ahisamac ex tiyjil Dan.

35O tzaj q'o'n nimxix kynab'l kab'e xjal lu, tu'n tb'ant kyximan ti'j tkyaqil wiq aq'untl ex tu'n kyb'inchante tkyaqil wiq aq'untl tb'anilxix, tu'n kyxi chmet qe tilb'ilal kywitz xb'alun ẍq'ilun ke'yin, xb'alun ẍjulin ke'yin, xb'alun kyaq ke'yin ex tb'anil xb'alun lino, ex tu'n kyku'tz chmet qe xb'alun tb'anilxix b'inchb'en kye.