1Mya il ti'j tu'n t-xi ntz'ib'ane jun u'j kyeye ti'j ju onb'il tu'n t-xi q'ot kye okslal.
2Porke ojtzqi'n wu'ne at kyganiye tu'n kyq'onteye, ex o chin tzalaje kyi'je kyxol qeju ate' tuj tx'otx' Macedonia, xi nma'ne kye qa ma b'ant-xi jun ab'q'i b'anin kytene tu'n kyq'onteye oyaj, aqeye ate'ye tuj tx'otx' Acaya; ex tu'nju at-xix kyganiye ti'j jlu, ma tz'el kykano'n mas nim okslal kyxol qeju ate' tuj tx'otx' Macedonia.
3Ex ma che'x nsama'ne qe erman lu tu'ntzun mi'n tel qyole noqx gan, aju xi qma'ne kyi'je. Wajb'ile tu'n tb'ant naj kytene tu'n ttzaj kyq'o'ne kyoyaje ik tza'n ma txi nma'ne kye,
4mya yajku che'x wuk'ine junjun aj Macedonia, ex mya b'anin kytene ok qpone. Tu'n jlu ktzajel qch'ixwiye tu'nju otoq qe' qk'u'je kyi'je, ikx kyeye mas jaku tzaj kych'ixwiye.
5Kyja'tzun kub' nximane qa il ti'j tu'n t-xi nma'ne kye erman tu'n kyxi' nej nwitze tu'n kypon kyuk'ile, ex tu'n tb'aj chmet naj kyoyaje tzaj kytziyane ojtxi, tu'ntzun ttzaj kyq'o'ne ik tza'n jun oyaj, mya tu'n tel qxk'ayine kyi'je.
6Lu jun tumel kxel nma'ne kyeye: Aju xjal noq ch'in in ku'x tawa'n, ax noq ch'in kjawil tchmo'n; atzunju xjal nim in ku'x tawa'n, ax nim kjawil tchmo'n.
7Teyle junjun q'onx jun oyaj ik tza'n ma kub' t-ximan tuj tanmi; mya tuk'il b'is tu'n t-xi tq'o'n ex mya lajwers, porke aju xjal in xi tq'o'n oyaj tuk'il tzalajb'il, in tzalaj Dios ti'j.
8Ate Dios at tipumal tu'n tq'onte nimku t-xtalb'il kyeye, tu'ntzun kukx tu'n tkanun kyeye tuj tkyaqil ex tu'n tkyaj ten ch'intl kyeye, tu'ntzun kyonine ti'j tkyaqil aq'untl b'a'n.
9Ik tza'n in tma'n tuj Tu'jil:
Xi t-sipan kykotz qe meb'a. Aju tten tz'aqlxix, kukx ktel te jumajx, chi tuj Tu'jil.
10Ate Dios in tzaj q'onte iyaj teju xjal in awan ex in tzaj tq'o'n wab'j te twa, ktzajel tq'o'n aju in ajb'en kyeye, tu'n tchmet twitz kyawale tu'n, ex ktzajel tq'o'n mas kyipumale tu'n kyb'inchanteye xtalb'il kye nimku xjal.
11Kyja'tzun tzul tq'o'n Dios nimku kyeye, tu'ntzun tb'ant kyq'onteye oyaj. Ex aju oyaj kjawil qchmone kyxole, kxel kyq'o'n erman chjonte te Dios ti'j.
12Porke tu'nju in xi kyq'o'ne ju oyaj lu kye erman, mya noq o'kx in che onine ti'j ju atx taj kye, ax ikx nimku erman in xi kyq'o'n chjonte te Dios ti'j jlu.
13Ex tu'nju kyajb'eb'le lu k'elel kynik' okslal kyi'je, ex kxel kyq'o'n chjonte te Dios tu'nju ma txi kynimane tqanil b'a'n in yolin ti'j Crist. Ex kxel kyq'o'n chjonte te Dios kyi'je tu'nju oyaj kxel kyq'o'ne kye ex kye kykyaqil.
14Ax ikx che na'l Dios kyi'je, tu'nju at kyk'ujlalil kyi'je, tu'nju nimxix t-xtalb'il Dios ma tzaj tq'o'n kyib'aje.
15Chjonte Dios tu'nju toyaj ma'xix ma tzaj tq'o'n qe, minti' in knet yol qu'n tu'n t-xi qchik'b'a'n, tu'nju tb'anilxix.
Who We AreWhat We EelieveWhat We Do
2025 by iamachristian.org,Inc All rights reserved.
