1Nman Dios, aya Ndiose. Tu'n tkyaqil wanmiye in chin jyone ti'ja; nimxix tajb'il wanmiye ti'ja ex enter nximlale taj ti'ja, ik qine ik tza'n tzqij tx'otx' ma b'aj tipun ex minti' a' tuj.
2Wajb'ile tu'n tok nke'yine tuj tjaya ex tu'n tok nke'yine tipumala ex tajwalila.
3Aju tk'ujlalila te weye mas ma' t-xilen twitz ju anq'ib'l. Kxel nq'o'ne chjonte teya;
4tuj tkyaqil wanq'ib'le kxel nq'o'ne chjonte teya ex kjawil nyek'une nq'ab'e twitza tu'n nyoline tuk'ila.
5B'i'x kqeb'el nk'u'je ik tza'n jun xjal in noj tk'u'j tuj jun nintz wa'n tb'anilxix, ex kxel nq'o'ne chjonte teya tu'n tzalajb'il.
6Ok koẍl qine te qonik'an, nnu'la ti'j nk'u'je ex in chin ok tene ximal ti'ja,
7porke aya onil weye. In chin tzalaje tu'nju kwentin qine tu'na.
8Tokxix wanmiye ti'ja ex tzyu'nxix qine tu'n tb'anq'ab'a.
9Qeju kyaj chin kub' kyb'yo'n che b'elex max t-xe'pun tx'otx';
10che kymel tu'n spad, ex che b'ajel chyo'n kyu'n xo'j.
11Ex aqine rey ok chin tzalajele ti'j Dios; kykyaqil qeju in xi kyma'n jun yol axix tok twitz Dios che b'itzal, atzun qeju in che nik'an yol, klemetel kytzi'.
Who We AreWhat We EelieveWhat We Do
2025 by iamachristian.org,Inc All rights reserved.
