Salmos 37 - Mam Huehuetenango New Ortography

Qe'k tk'u'ja ti'j Qman DiosB'itz tu'n David

1Mi'n jaw kyaqpaja tu'n kylaj qe xjal mya b'a'n, mi'n tzaj tx'a'l tk'u'ja kyi'j qe b'inchal mya b'a'n,

2porke jurat naj che najel ik tza'n ch'im in tzqij, ex che b'el motx'j ik tza'n k'ul.

3Qe'k tk'u'ja ti'j Qman ex b'inchama ju b'a'n, tz'anq'ina twitz tx'otx' ex kukx nimanxa tyol.

4Tzalajxa ti'j Qman, ex tzul tq'o'n teya aju in pon tk'u'ja ti'j.

5Oqxenanx tib'a tuj tq'ab' Qman, qe'k tk'u'ja ti'j ex tzul onil teya.

6Kb'el tyek'un Dios kywitz xjal aju tb'inchb'ena b'a'n ex ju ttena tz'aqlxix, ik tza'n tqan q'ij ok nno'k chilkuq'ij.

7Txulekuya twitz Qman ex noq ayona ti'j ok tul onil teya. Mi'n tzaj tx'a'l tk'u'ja ti'j ju xjal jurat in jaw ti'n naj tipun, ex mi ti'j ju xjal in kub' t-ximan tu'n tb'inchante mya b'a'n.

8Kolinxa q'oj ex kolinxa tu'n ttzaj tlo'ch tk'u'ja; mi'n jaw q'ojla, porke tu'ntzun jlu in xi' jun yol tuj tilil.

9Ax tok che elex lajo'n qe xjal mya b'a'n, atzun qeju q'uql kyk'u'j ti'j Qman che okel etzal teju tx'otx'.

10Noq ch'intl taj tu'n kykub' naj qeju mya b'a'n, maske ma tz'ok tena jyolte kye pero mlay che knet tu'na.

11Atzun qe xjal mans che okel etzal teju tx'otx', ex puro tuj txub'txaj che tel.

12Aju xjal mya b'a'n in kub' ten ximal ti'j tza'n tten tu'n tnaj ju xjal b'a'n, ex in xi tke'yin ti'j in q'ojl wen.

13Atzunte Qman noq in jaw tze'n ti'j ju xjal mya b'a'n, porke b'a'n tu'n qa ch'ix tpon or tu'n tnaj.

14Qe b'inchal mya b'a'n in jatz kyi'n kyspad tuj tjayil, ex nne'l kyxqinin taq'al xob'l kyplech, tu'n kykub' qe xjal meb'a kyu'n ex qe mans ex qeju in che b'et tuj tumel.

15Ex tu'nx kyspad kb'ajel xyu'n kyanmi, ex che b'ajel toqj qe xob'l kyplech.

16Aju ch'in at teju xjal b'a'n, mas nim t-xilen twitz kyq'inumab'l qe xjal mya b'a'n.

17Ex k'elel ti'n Qman kyipumal qe xjal mya b'a'n, atzun qe xjal b'a'n che b'el ttzyu'n tu'n mi kykub' tz'aq.

18Qeju minti' kypaltil, kwentin qe tu'n Qman, ex aju kyetzb'il kukx ktel te jumajx.

19Tuj tq'ijlalil mya b'a'n ok ttzaj we'yaj, mlay kub' kych'ixwi tu'nju at nim kywa.

20Atzun qe xjal mya b'a'n, che b'ajel tz'e'y ik tza'n tzqij ch'im, ex qe aj q'oj ti'j Qman che b'el naj ik tza'n sib'.

21Aju xjal mya b'a'n in tqanin tch'ex ex minti'tl nna'j tchjo'n, atzunte xjal b'a'n in tz'e'y tk'u'j ti'j juntl ex in xi tq'o'n kotzb'aj.

22Qeju ky'iwla'n tu'n Qman ok kyk'ma' tx'otx' te kyetzb'il, atzun qeju tkub' kysentens tu'n, che najel.

23In xi tyek'un Qman alkye b'e tu'n t-xi ti'n xjal, ex in kub' tq'o'n tuj b'e b'a'n nne'l tuj twitz;

24maske ma tzik' tz'aq, pero in jaw twab'an tib', ex tzyu'n tq'ab' tu'n Qman.

25Ku'xun qine nej, atzun ja'lo ma chin tijine; ex b'ajx wile jun xinaq b'a'n otoq kyaj kolin, ex b'ajx wile in che mo'n qe tk'wa'l.

26Tkyaqil q'ij in q'aq'an tk'u'j kyi'j xjal ex in xi tq'o'n pwaq te kych'ex; qe tk'wa'l in che kub' ky'iwla'n tu'n Qman.

27Pa'mil tib'a ti'j ju mya b'a'n ex b'inchama ju b'a'n, ex kukxtzun ktel tnajb'ila.

28In tzalaj Qman qi'j qa in qb'incha'n ju tz'aqlxix, ex minti' in che kyaj tkolin qeju wa'lxix tuj kyokslab'l, atzun qeju mya b'a'n, in che naj tu'n ex minti' in kyaj tq'o'n kyiyjil.

29Qe xjal b'a'n ok che etzal ti'j ju tx'otx', ex ax che tel tuj te jumajx.

30Aju xjal b'a'n at tnab'l tyol ex in yolin tuj tumel,

31tku'x tley Dios tuj tanmi, ex mlayx jaw jilj tqan.

32Aju xjal mya b'a'n in xq'uqin ti'j ju xjal b'a'n, ex in ximan ti'j tu'n tkub' tb'yo'n;

33pero mlay txi tq'o'n Qman amb'il te tu'n tkub' tz'aq xjal b'a'n tuj tq'ab', ex ok tok xjal b'a'n tuj xjel, mlay taq' Dios amb'il tu'n tkub' t-sentens.

34Qe'k tk'u'ja ti'j Qman ex nimanxa, tu'ntzun jlu kjawil nimsa'na tu'n ex ktzajel tq'o'n aju tx'otx' te tetzb'ila, ex ok tila'ya ok kynaj qe xjal mya b'a'n.

35O wile ju xjal mya b'a'n ex puro jawni, ik tten ik tza'n jun tze' kyja' tch'iy wen ex puro pim t-xaq;

36pero tej wik'e juntl maj ya mi a'l, in jyone ti'j ex minti' knet wu'ne.

37Q'o'nka kwent ti'j ju xjal tz'aqlxix ex minti' tpaltil; tuj tq'ijlalil tzul ktel xjal lu tuj txub'txaj.

38Atzun qeju mib'an che niman, che najel te jumajx; tuj tq'ijlalil tzul che najel qe mya b'a'n.

39In che klet qe xjal tz'aqlxix tu'n Qman, a in kolin kyi'j tuj tq'ijlalil yajb'il.

40A Qman onil kye ex in che kolpet tu'n. In che klet tu'n tuj kyq'ab' qeju mya b'a'n, tu'nju atzun q'uql kyk'u'j ti'j tu'n kyklet.